- Bosh sahifa
- Maslahatchi minbari
- Bilimli va zakovatli bo‘lish vositasi
Bilimli va zakovatli bo‘lish vositasi
Yusuf Xos Hojib ilm-ma’rifat jarchisi
va homiysi sifatida bilimni baxt-saodatga erishishning bosh omili deb hisoblaydi.
Mazkur asarning “Til odobi” deb nomlangan bobida tilning jamiyat va madaniy hayotdagi
o‘rni, til ilmi, nutq odobi va notiqlik san’ati kabi masalalar keng ochib berilgan.
Yusuf Xos Hojib, til bilimli va zakovatli bo‘lishning asosiy vositasi ekanligini,
tilning sharofati bilan inson o‘z bilimi, aql-idrokiga sayqal berishi, fikrini oydinlashtirishini
ta’kidlaydi.
Mahmud Qoshg‘ariy ham “Devoni lug‘oti
turk” asari bilan tilimiz ravnaqiga bebaho hissa qo‘shib, davlat tilining nufuzini
oshirish, ona tilimizning ravnaq topishiga xizmat qilgan. Asarda alifbo, fonetik
qonuniyatlar va orfografik qoidalar, turkiy so‘z tuzilishi an’analari, so‘z tartibi,
fe’l shakllari, so‘z etimologiyasiga oid bilimlarni keng yoritilgan.
“Islom madaniyatining oltin asri” deb
atalmish Ikkinchi Renessans – dunyoning ulkan geografik hududlarida siyosiy, iqtisodiy
va ijtimoiy yirik islohotlar orqali yaxlit qudratli davlatni barpo etgan Sohibqiron
Amir Temur nomi bilan bog‘liq. Bu davrda ham davlatning til siyosati beqiyos rivojlandi.
Saltanat hujjatlari va Amir Temurning “Temur tuzuklari” qomusiy qo‘lyozmasi ona
tilimizda bitildi. Buyuk bobomiz Alisher Navoiy milliy so‘z san’atimiz, ona tilimiz
ravnaqi, uning jahonga tanilishiga beqiyos hissa qo‘shib jahon adabiyotining nodir
durdonasi hisoblanadigan asarlarini, xususan, besh dostonni o‘zida jamlagan “Xamsa”
to‘plamini yaratdi. Dostonlar tilining nihoyatda boyligi, go‘zalligi hamda purma’noligi
hamon hayratga sazovor.
Shu o‘rinda yon atrofimizdagi, ko‘cha-kuydagi,
ommaviy axborot vositalari, televidenie, radio hamda ijtimoiy tarmoqlardagi yozuvlar
va chiqishlar e’tiborimizni tortmasdan qolmaydi. Ularda yo‘l qo‘yilgan xato va kamchiliklar
esa ba’zan ko‘ngilga og‘ir botadi. Chunki, til millatning bebaho boyligi, uni buzishga
esa hech kimni haqi yo‘q.
Globallashuv davrida o‘zgarishlariga
ko‘r-ko‘rona yondashmasdan, zehnimizni ishga solib o‘z ona tilimiz sofligini saqlaylik!
Buni har birimiz eng avvalo, oilamizdan, mahallamizdan, shahrimizdan, qolaversa
kasb egasi sifatida faoliyat olib borayotgan sohamizdan boshlashimiz lozim. Chunki, davlat tili talablari barchaga
barobar, unga yosh ham, qari ham birdek rioya etishi shart.
Bu borada davlat bojxona xizmati idoralari tomonidan talay ishlar olib borilmoqda. Avvallari
ruscha ish yuritadigan faoliyatimizga o‘zbek tili davlat tili sifatida kirib bordi, o‘z o‘rnini topdi. Barcha
ish qog‘ozlari nusxalari, ilmiy ishlar, tadqiqotlar o‘zbek tilida yoziladigan bo‘ldi.
Hozir yana bir qiyin jarayon shaxsiy tarkibning
nutq madaniyatini tarkibga keltirish yuzasidan qurama nutqqa ega xodimlarni nutq
madaniyati hamda notiqlik mahoratini oshirish, davlat tilida ish yuritish bo‘yicha
o‘quv kurslarida o‘qitish tashkillashtirilgan. Bu borada esa Alisher Navoiy nomidagi
Toshkent davlat o‘zbek tili va adabiyoti universiteti huzurida Davlat tilida ish
yuritish asoslarini o‘qitish va malaka oshirish markazi va uning joylardagi filiallari bilan yaqin hamkorlik o‘rnatilgan.
Hujjat almashinuvi to‘liq davlat tilida
amalga oshirilmoqda. Davlat tilida ish yuritishni to‘g‘ri tashkil etish bo‘yicha
2021-yilning o‘tgan davrida 50 mingdan ortiq xat-hujjatlar davlat tilida ro‘yxatga
olindi. 7 mingdan ortiq idoraviy va ichki hujjatlar to‘liq davlat tilida ishlab
chiqildi. 14 mingdan ortiq chiqish xatlari ro‘yxatga olindi. Qonun ijodkorligi yuzasidan 2021 yilning o‘tgan davrida
40 ta normativ-huquqiy hujjatlar davlat tilida ishlab chiqildi.
O‘zbek tilini xalqimiz ijtimoiy hayotida
to‘laqonli joriy etish va xalqaro miqyosdagi obro‘-e’tiborini tubdan oshirish, oliy
ta’lim muassasalarida davlat tilini o‘qitish tizimini yanada takomillashtirish bilan
bog‘liq masalalarni ilmiy tahlil qilish va zarur taklif hamda tavsiyalar ishlab
chiqish maqsadida joriy yilning oktyabr oyida til bayrami munosabati bilan, Bojxona
instituti hamda Davlat bajxona qo‘mitasi hamda Respublika Ma’naviyat va ma’rifat
markazi bilan hamkorlikda tomonidan “O‘zbek tili ta’limini takomillashtirishning
dolzarb masalalari” mavzusidagi ilmiy-amaliy davra suhbati, “G‘alaba bog‘i” yodgorlik
majmuasida “O‘zbek tilida harbiy terminologiyaning masalalari”ga bag‘ishlangan davra
suhbati hamda Adiblar xiyobonida,“Ona tilim,
o‘zingsan buyuk!” mavzusida bir qator ma’naviy-ma’rifiy va madaniy tadbirlar
o‘tkaziladi. Bundan tashqari, tizim va uning tarkibiy tuzilmalari shaxsiy tarkibi
o‘rtasida “Ona tilim faxrim” xeshtegi ostida fotosuratlar tanlovi boshlandi.
O‘zbek tilining sofligini saqlash, uni
yot unsurlardan himoya qilish, bojxona sohasiga oid terminlarni milliylashtirish
borasida ishlar davom ettirilmoqda. Davlat bojxona qo‘mitasi mas’ul xodimlari va
Bojxona instituti professor-o‘qituvchilari tomonidan yangi tahrirdagi “Davlat tilida
ish yuritish” qo‘llanmasi, “Bojxona ensiklopediyasi” va “Bojxona ishi sohasida
qo‘llaniladigan terminlar lug‘ati” kitoblari tayyorlanib nashrdan chiqarildi.
Shuni alohida qayd etish joizki, jamiyat
hayotining turli jabhalarida, jumladan davlat bojxona xizmati organlarida ham davlat
tili birlashtiruvchi va hal qiluvchi kuch sifatida namoyon bo‘lishi zarur.
Habibulla AZIZOV,
Davlat bojxona qo‘mitasi raisining maslahatchisi,
bojxona
xizmati polkovnigi