- Bosh sahifa
- Maslahatchi minbari
- Metrologiya sohasida xizmat ko‘rsatish davlat tilida raqamlashtirildi
Metrologiya sohasida xizmat ko‘rsatish davlat tilida raqamlashtirildi
O‘zbekiston
Texnik jihatdan tartibga solish agentligi tizim tashkiloti hisoblangan O‘zbekiston milliy
metrologiya instituti (O‘zMMI) tomonidan davlat tili to‘g‘risidagi qonun hujjatlariga
rioya etilishini ta’minlash, tadbirkorlar uchun xizmat ko‘rsatish
yo‘nalishlarini davlat tilida raqamlashtirish ishlariga alohida e’tibor qaratib
kelmoqda.
Ishbilarmon
va tadbirkorlar uchun navbatdagi yana bir muhim qulaylik bo‘lib yaratilgan Metrologiya
xizmati axborot tizimi «e-metrologiya» fikrimizga
dalil bo‘la oladi. Tizim orqali barcha turdagi ariza va murojaatlar davlat tilida
onlayn tarzda qabul qilinib, qisqa muddatda
elektron shartnoma tuzish imkoniyatidan foydalanilmoqda.
Respublika Prezidentining
2020-yil 28-apreldagi “Raqamli iqtisodiyot va elektron hukumatni keng joriy etish
chora-tadbirlari to‘g‘risida”gi Qarori ijrosi doirasida yaratilib ishga tushirilgan
ushbu tizim institutga qilinadigan murojaatlar bilan ishlashda ortiqcha qog‘ozbozlik,
inson omili ishtirokini keskin kamaytirib, aholi va ishbilarmonlar doirasi vakillarining
vaqtini tejashga xizmat qilmoqda. Bu esa, o‘z navbatida, sohada korrupsiyaga yo‘l
qo‘yilishining oldini oladi.
Murojaat qiluvchilar tizimning barcha imkoniyatlaridan to‘liq foydalanishlari
uchun ro‘yxatdan o‘tib, shaxsiy kabinet orqali ishlashi lozim. Ro‘yxatdan o‘tish
soddalashtirilgan tartibda joriy qilingan. Jismoniy va yuridik shaxslarning ro‘yxatdan
o‘tish jarayoni 3 bosqichda bo‘lib, shaxsiy elektron raqamli imzo (ERI) orqali mobil
telefon raqam kiritiladi va telefon raqamiga yuborilgan tasdiqlash kodi tizimga
yoziladi. Shundan so‘ng, pastki qismda arizachi elektron pochta manzili to‘ldiriladi
va ro‘yxatdan o‘tish jarayoni tugaydi.
Shartnomalar tuzish jarayonlari ham sodda ko‘rinishga ega bo‘lib, foydalanuvchiga
tushunarli tarzda yaratilgan. Murojaat qabul qilinib, shartnoma tuzilgandan so‘ng
eng ko‘pi bilan 15 ish kunida barcha xizmatlar ko‘rsatiladi va elektron guvohnoma
(sertifikat) taqdim etiladi.
Bugun institutga
30 nafarga yaqin tadbirkor va ishbilarmonlar va hamkor korxonalar vakillari taklif
etilib, «e-metrologiya» axborot tizimining ishlash
holati, undan samarali foydalanish imkoniyatlari, tizimning o‘ziga xos tomonlari
haqida mutaxassislar tomonidan keng tushuncha va ma’lumotlar berildi.
Tadbirda O‘zbekiston Respublikasining
“Davlat tili haqida”gi Qonuni, O‘zbekiston Respublikasi Prezidentinig qator farmonlari,
shuningdek, Vazirlar Mahkamasining 2020-yil 20-yanvardagi “Mamlakatda davlat tilida
ish yuritishni samarali tashkil qilish chora-tadbirlari to‘g‘risida”gi qarori ijrosini
ta’minlash maqsadida davlat tilida davlat xizmatlari ko‘rsatishda
metrologiya xizmatining o‘zaro bog‘langan axborot resurslari kompleksi (ma’lumotlar
bazasi)ni ifodalaydigan va amalga oshirilgan o‘lchashlar natijalarini kuzatib borish
mumkin bo‘lgan yagona tizim yaratilib, ishga tushirilganligi ta’kidlandi. Tizimdagi
eng muhim jihatlardan biri onlayn ariza berish, onlayn shartnoma tuzish bilan bir
qatorda elektron sertifikat taqdim etish va umumiy bazada saqlash imkoniyati yo‘lga
qo‘yilgani aytildi.
Tadbirda tadbirkorlar,
xususan, Elektron hisoblagich, O‘lchash asboblarini sozlash va “Test gaz servis”
korxonalari vakillari tizim bo‘yicha savol va takliflarini bildirishdi. Mutaxassislar
savollarga javob berish davomida, tizim foydalanuvchilar uchun qulay interfeysga
ega bo‘lib, barcha ma’lumotlar qulay va tushunarli ko‘rinishlarda “Davlat tili haqida”gi
Qonunga muvofiq tarzda berilgan va barcha ma’lumotlar ishonchli saqlanishi ta’minlanganligiga
urg‘u berishdi.
Naibaxon Mamadalieva,
Bosh direktor maslahatchisi, professor