- Bosh sahifa
- Maslahatchi minbari
- Firmaga nom tanlashda mas’uliyat bilan yondashish kerak
Firmaga nom tanlashda mas’uliyat bilan yondashish kerak
Tadbirkorlik, ishbilarmonlik xalqimiz hayotida azaldan muhim o‘rin tutib, uning o‘ziga xos an’analari asrab-avaylangan, bunday fazilatga ega kishilar qadrlangan.
Mustaqillik yillarida yurtimizda
tadbirkorlikka, ayniqsa, oilaviy tadbirkorlikka keng yo‘l ochildi. Bugun o‘z
biznesini yo‘lga qo‘yib, o‘zi, oilasi, mahalla, el-yurt farovonligiga munosib
hissa qo‘shayotgan, iqtisodiyotimiz taraqqiyotiga xizmat qilayotgan
tadbirkorlar, xususiy korxonalar safi tobora kengaymoqda. Yurtimiz aholisi
o‘rtasida kichik biznes va xususiy tadbirkorlik faoliyati bilan shug‘ullanishga
qiziqish tobora ortib bormoqda.
Keyingi yillarda respublikamizda tadbirkorlikni
rivojlantirish, investitsiyalarni jalb qilish
va biznesni yuritish uchun qulay muhit yaratish, tadbirkorlarga
ko‘maklashish, ularning faoliyatini qo‘llab-quvvatlash borasida, tadbirkorlarning qonuniy manfaatlarini himoya qilishning huquqiy
kafolatlarini mustahkamlash sohasida keng ko‘lamli ishlar amalga oshirilmoqda.
Jumladan, soliq tizimi tubdan isloh qilindi, uch yildan ortiq vaqtdan
buyon faoliyat ko‘rsatib kelayotgan hamda soliqlarni muddatida to‘lab kelgan,
lekin moliyaviy ahvoliga ko‘ra soliq qarzini to‘lash imkoniyatiga ega bo‘lmayotgan
tadbirkorlik subyektlariga soliqlarni bo‘lib-bo‘lib to‘lash huquqi berildi.
Bank kreditlari bo‘yicha kompensatsiya va kafilliklar kredit shartnomalari
sonidan qat’iy nazar berilmoqda. Tadbirkorlik
subyektlarining moliyaviy-xo‘jalik faoliyati bilan bog‘liq bo‘lmagan rejali tekshirishlar
bekor qilindi. Mamlakatimizdagi
qulay ishbilarmonlik muhiti, xorijiy investorlar uchun yaratilayotgan imtiyoz va
imkoniyatlar yangi loyihalarni amalga oshirishga xizmat qilmoqda. Bu esa, davlatimiz
tomonidan olib borilayotgan soha faoliyatini rivojlantirishga doir islohotlar,
ularning oldidagi mavjud to‘siq va g‘ovlarni bartaraf etish, korxonalar faoliyati barqarorligini ta’minlash hamda
yanada rivojlantirishda muhim o‘rin tutadi.
Bugungi kunda ish bilan band
aholi daromadining 70 foizdan ortig‘i aynan kichik biznes hisobiga to‘g‘ri
kelmoqda. Shu bois, tadbirkorlarning huquqlarini muhofaza qilish mutasaddi
davlat organlari, muassasalari, huquq-tartibot organlarining ustuvor vazifasiga
aylandi.
Yurtboshimiz
rahnamoligida mamlakatimizda kichik va xususiy tadbirkorlik subyektlariga
sharoit hamda kafolatlar yaratish, soliq, bojxona imtiyozlarini kengaytirish,
ularning qonuniy huquq, manfaatlarini himoya qilishga katta ahamiyat berilmoqda.
O‘zbekiston Respublikasi Prezidentining 2017-yil 12-dekabrdagi “Aholiga davlat xizmatlari ko‘rsatishning milliy tizimini tubdan isloh qilish chora-tadbirlari to‘g‘risida”gi PF-5278-son Farmonini ijro etish yuzasidan O‘zbekiston Respublikasi Adliya vazirligi huzurida Davlat xizmatlari agentligi va hududiy bo‘limlari tomonidan aholiga tadbirkorlik faoliyatini tashkil etilishida amaliy-huquqiy ko‘maklar berib kelinmoqda.
Ayni paytda kundan
kunga kichik biznes subyektlari soni ortib bormoqda. Bu esa O‘zbekistonning ijtimoiy-iqtisodiy taraqqiyotiga
munosib hissa qo‘shadi, albatta.
Lekin hozirgi kunlarda ijtimoiy tarmoqlarda
tadbirkorlik subyektlarining firma nomi bilan bog‘liq xabarlar tarqalib, turli muammolarga
sabab bo‘lmoqda. Mas’uliyati cheklangan jamiyat tashkil qilib, uning nomini “Вторая жена замминистра» - «Zamministrning
ikkinchi xotini», deb qo‘yishibdi.
Yuqorida muhokamaga sabab bo‘lgan
Mas’uliyati cheklangan jamiyatning “Zamministrning ikkinchi xotini” deb
nomlanishi ham saviyasizlik, ham axloqsizlik , shuningdek, boy ona
tilimiz me’yorlarining buzilishidir.
Firmaga nom
tanlashda mas’uliyat bilan yondashish kerak, chunki u korxonaning yuzi
hisoblanadi. Korxonangiz yoki mahsulotingiz haqida ilk tasavvur hosil qiluvchi
ma’lumot bu uning nomidir. Nom tanlashda, avvalo, «Davlat tili haqida»gi
qonunda belgilangan me’yorlarga amal qilish lozim.
Hamkorlikda chet el firmalari bilan asos
solinayotgan, faoliyati yo‘lga qo‘yilayotgan qo‘shma korxonalar nomini tushunsa
bo‘ladi, chunki ularning nomi xalqaro talablarga mos, har ikki mamlakat fuqarolari
uchun birday tushunarli bo‘lishi shart. Ammo mahallaning ichida qurilgan do‘konlarning
peshtoqlariga ajnabiy nom bitib qo‘yilishiga nima deysiz?
Ajnabiy tillardagi nomlar bilan xizmat
ko‘rsatayotgan tamaddixona, do‘kon, firma, korxonalarni poytaxtimizda ko‘plab
uchratishimiz mumkin. Masalan, “Bleck cat”, “Bibigon”, “Florense” kabi atamalar
allaqachon xuddi o‘zbek tilidagi so‘zlardek muomala vositasiga aylanib
ulgurgan. Biroq ba’zi ona tilimizda nomlangan korxonalar, do‘kon,
tamaddixonalar ham borki, o‘qisa yoki eshitsa beixtiyor kishi hayron-u lol qoladi.
Shu o‘rinda
savol tug‘ilishi mumkin. Bu borada tegishli tashkilot va muassasalar qanday ish
olib bormoqda?
Davlat xizmatlari agentligi yuridik shaxslarni
davlat ro‘yxatidan o‘tkazuvchi vakolatli organ vakili sifatida mazkur masalaga oydinlik
kiritmoqchiman.
Birinchidan, «Tadbirkorlik faoliyati erkinligining
kafolatlari to‘g‘risida»gi Qonunning 33-moddasiga asosan yuridik shaxs bo‘lgan tadbirkorlik
faoliyati subyekti firma nomiga bo‘lgan huquqqa ega, bu nomni uning o‘zi mustaqil
ravishda belgilaydi va o‘z ta’sis hujjatlarida ko‘rsatadi.
Ikkinchidan, 2017-yil 1-apreldan boshlab
tadbirkorlik subyektlari «Tadbirkorlik subyektlarini davlat ro‘yxatidan o‘tkazish
va hisobga qo‘yishning avtomatlashtirilgan tizimi orqali (o‘zi kelgan holda yoki
onlayn usulda) davlat ro‘yxatidan o‘tkaziladi.
Uchinchidan, O‘zbekiston Respublikasi «Firma
nomlari to‘g‘risida»gi Qonunning 4-moddasiga asosan firma nomida:
davlatning rasmiy nomi, xalqaro,
hukumatlararo yoki nodavlat notijorat tashkilotining qisqartirilgan yoki to‘liq
nomi;
tarixiy yoki O‘zbekiston
Respublikasida mashhur bo‘lgan shaxsning to‘liq yoki qisqartirilgan
ismi, belgilangan tartibda beriladigan ruxsatsiz;
firma nomining egasi, uning faoliyat
turi yoki u kelib chiqqan mamlakat xususidagi soxta yoki iste’molchini
chalg‘itishi mumkin bo‘lgan belgilar;
jamiyat manfaatlariga, insonparvarlik
va axloq prinsiplariga zid bo‘lgan belgilar ko‘rsatilmasligi
kerak.
To‘rtinchidan, Davlat xizmatlari agentligi
tomonidan Tadbirkorlik subyektlarini davlat ro‘yxatidan o‘tkazish va hisobga
qo‘yishning avtomatlashtirilgan tizimida «Firma nomlari to‘g‘risida»gi
Qonunga asosan firma nomlarida ishlatilishi mumkin bo‘lmagan so‘zlardan
foydalanish bo‘yicha cheklovlar
qo‘yildi. Ushbu ro‘yxat mutaxassislar tomonidan muntazam ravishda yangilanib
boriladi.
Muhokamaga sabab bo‘layotgan
tadbirkor aslida boshqa nom ostida ro‘yxatdan o‘tkazilgan bo‘lib, joriy yilning
22-dekabr kuni Zangiota tumani Davlat xizmatlari markazi orqali qayta ro‘yxatdan
o‘tkazilgan va nomini o‘zgartirgan. Muhokama
sabab bo‘lgan tadbirkorlik subyektining firma nomi tadbirkor bilan olib
borilgan tushuntirishlardan keyin belgilangan tartibda o‘zgartirildi.
Тil – millat ko‘zgusi. Shuningdek, u tarbiya vositasi hamdir. Korxona, firma, do‘kon
peshtoqlaridagi tilimizga yot so‘zlar yoki jumlalar milliy
mentalitetimiz rivojiga salbiy ta’sir ko‘rsatmasligiga
kim kafolat beradi?
Milliy madaniyat, til, ma’naviyatimizni
asrash mana shunday kamchiliklarni bartaraf etishdan boshlansa, ajabmas. Zero,
ma’naviyati yuksak bo‘lgan xalqgina
dunyoda o‘zining munosib o‘rnini topa
oladi. Farzandlarimizni milliy urf-odatlarimizga, qadriyatlarimizga
muhabbat ruhida kamol toptirish,
avvalambor, o‘z ona tilimizga bo‘lgan hurmatda aks etadi.
Shunday ekan, tadbirkorlar firma, korxonalarga milliy mentalitetimizdan
kelib chiqqan holda nom tanlashsa va bu nomlarni savod bilan yozdirishsa,
maqsadga muvofiq bo‘lar edi. Chunki tilga e’tibor, deganda savodxonlik ham
nazarda tutiladi.
Ona tilimiz Markaziy Osiyodagi eng qadimiy
va boy tillardan biridir. O‘zbek tili o‘zining so‘z boyligi, har bir so‘zning o‘nlab
ma’no kasb etishi bilan jahon tillari ichida o‘z o‘rniga ega. O‘zimizning ulug‘vor tilimizda minglab
chiroyli so‘zlar bo‘la turib, xalqimiz, mentalitetimiz uchun zid bo‘lgan
atamalar bilan nomlashni oqlab bo‘lmaydi. O‘zbek tilimizga hurmat
vatanparvarlik va millatparvarlik namunasidir.
Xakimova Zebinisa Muzaffarovna
Davlat xizmatlari agentligi direktorining
maʼnaviy-maʼrifiy ishlar samaradorligini oshirish, davlat tili to‘g‘isidagi
qonun hujjatlariga rioya etilishini taʼminlash masalalari bo‘yicha
maslahatchisi