- Bosh sahifa
- Maslahatchi minbari
- Nima uchun ko‘cha harakati qoidasini buzgan kishiga militsiya hushtak chaladi-yu, butun bir tilni buzayotgan odamlarga hech kim hushtak chalmaydi?
Nima uchun ko‘cha harakati qoidasini buzgan kishiga militsiya hushtak chaladi-yu, butun bir tilni buzayotgan odamlarga hech kim hushtak chalmaydi?
“Nima uchun ko‘cha harakati qoidasini buzgan kishiga
militsiya hushtak chaladi-yu, butun bir tilni buzayotgan odamlarga hech kim
hushtak chalmaydi”
Abdulla Qahhor
Davlat tili – muayyan mamlakatda
qonun chiqarish, ijroiya va sud hokimiyatlarida ish yuritish uchun rasmiy
belgilangan til. Odatda, koʻp millatli mamlakatlarda, masalan, Hindiston,
Kanada, Shveysariyada qaysi til yoki tillar rasmiy ekanligi konstitutsiyalarida
belgilab qoʻyilgan. Davlatlarning koʻpchiligida rasmiy til bilan davlat tili
aynan bir xildir. Faqat ayrim mamlakatlardagina rasmiy til maqomi davlat tili
maqomidan farqlanadi. Masalan, Shveysariyada konstitutsiyaga binoan nemis,
fransuz, italyan tillari – rasmiy til; nemis,
fransuz, italyan va retoroman tillari – davlat tili
sanaladi.
Oʻzbekistonda shoʻrolar hukmronligi paytida davlat tili
haqida umuman gapirish ham mumkin boʻlmagan, aksincha, oʻzbek tilining ijtimoiy
hayotda qoʻllanilishi tobora cheklanib qolgandi. Jamiyatni qayta qurish
maʼnaviy poklanishni boshlab berdi. Uning natijasi oʻlaroq 1989-yil 21-oktabrda
Oʻzbekiston Respublikasining “Davlat tili to‘g‘risida”gi Qonun qabul qilindi. O‘zbek
tiliga davlat tili maqomi berildi. Bu qonun oʻzbek xalqi milliy ongining
rivojlanishida, mamlakat mustaqilligi mustahkamlanishida, madaniy merosning
tiklanishida muhim rol oʻynadi. Mazkur qonun qoidalari Oʻzbekiston
Konstitutsiyasida mustahkamlab qoʻyildi. Konstitutsiyaning 4-moddasiga binoan
Oʻzbekiston Respublikasining davlat tili oʻzbek tilidir. Qoraqalpogʻistonda
bunday maqom qoraqalpoq tiliga ham berilgan. Mamlakatda yuz berayotgan real
jarayonlar va imkoniyatlarni hisobga olib, lotin yozuviga asoslangan oʻzbek
alifbosini uzil-kesil joriy etishni bosqichma bosqich amalga oshirib borish
vazifasi til islohoti bilan bogʻliq masalalarga zarur tuzatishlar kiritish
ehtiyojini tugʻdirdi va qabul qilingan “Davlat tili to‘g‘risida”gi Qonunning
koʻpgina moddalariga oʻzgartirishlar hamda qoʻshimchalar kiritishni taqozo etdi.
Natijada 1995-yil 22-dekabrda Oʻzbekiston Respublikasining “Davlat tili to‘g‘risida”gi
Qonuni yangi tahrirda qabul qilindi. Oʻzbek tilining Oʻzbekiston Respublikasi
hududida davlat tili sifatida amal qilishining huquqiy asoslari ushbu qonun va
boshqa qonunlar bilan belgilandi.
“Davlat tili to‘g‘risida”gi
Qonunning qabul qilinganiga 30 yildan oshdi. Shu davr ichida o‘zbek tilining davlat
tili sifatida maqomi mustahkamlandimi?
Bu qonun oʻz vaqtida
xalqimizning Istiqlolga boʻlgan umid-ishonchini, milliy gʻurur tuygʻusini
kuchaytirdi, mustaqilligimizning oʻziga xos poydevori vazifasini bajardi desak,
mubolagʻa boʻlmaydi.
Yurtimiz ozodlikka erishgach, oʻz ona tilimizda
emin-erkin soʻzlash huquqiga ega boʻldik, tilimizning kamsitilishiga chek
qoʻyildi. O‘zbek tili mustaqil davlatimizning bayrog‘i, gerbi, madhiyasi
qatorida turadigan, qonun bilan himoya qilinadigan muqaddas timsollardan biri
aylandi. Nufuzli xalqaro minbarlarda oʻzbekcha soʻzlarimiz yangray boshladi,
tilimizni oʻrganishga qiziquvchi xorijliklar koʻpaydi. Oʻzbek tilida chop
etilayotgan matbuot nashrlari, kitoblarning turi va adadi keskin darajada
oshdi. Zamonaviy axborot texnologiyasi boʻyicha oʻzbekcha dasturlar paydo
boʻldi va hokazo. Shubhasiz, bu jarayonda bundan oʻttiz ikki yil avval qabul
qilingan “Davlat tili to‘g‘risida”gi Qonunning xizmati katta boʻldi. Ammo shu
bilan birga, tan olish kerakki, bu muhim hujjatda aks etgan bandlar ijrosini
oʻtgan yillar davomida hamisha ham taʼminlay oldik, deya olmaymiz.
Ko‘cha-ko‘ydagi peshlavhalarda, reklama va e’lonlarda,
korxona-tashkilotlarda, davlat idoralaridagi yozuvlar o‘zbek (davlat) tilida
yozilayotganligi barchamizni quvontiradi. Ammo muammo aksariyat qonunlar,
hujjatlar, ish yuritish qog‘ozlari, reklama va e’lonlar hamon rus tilida
yozilayotganida. Davlat tiliga doir qonun ijrosining nazoratsizligi, hukumatda
ish yuritish, qonunlar yozilishida rus tilidan voz kechilmaganligi rus tiliga
rasmiy maqom berish tashabbusi ko‘tarilishiga ham sabab bo‘ldi.
Shunigdek, peshlavhalarda, reklama va e’lonlardagi yozuvlar xatolar
bilan yozilganiga ko‘zingiz tushadi. So‘zlarni yozish bilan bog‘liq orfografik
xatoliklar, noto‘g‘ri qo‘llash, noto‘g‘ri tarjima qilish bilan bog‘liq uslubiy
xatoliklar, tinish belgilarini qo‘llashdagi xatoliklar juda ko‘p uchraydi. Bunday
xatoliklarning aksariyati esa lotin yozuvidagi o‘zbek alifbosida bitilgan
so‘zlar bilan bog‘liq. Xato va mantiqsiz birikmalar yozilgan peshlavhalarning
jamoat joylarida, turli muassasa-tashkilotlar binosining peshtoqi yoki boshqa
ko‘zga tashlanadigan joylarda turishi har qanday ma’rifatli kishi ko‘ngliga
ozor yetkazishi, shubhasiz. Eng
achinarlisi, bugun bunday bilimsizlik va e’tiborsizlik tufayli til bilan
bog‘liq xatoliklarni har qadamda uchratish mumkin. Bu umuman adabiy tilga bo‘lgan umumiy
munosabatni bildiradi. O‘zbek tili hozirgi zamon talablariga javob bera
oladigan, boshqa adabiy tillar bilan bir safda tura oladigan til bo‘lishini
xohlardim.
Oradan 32 yil vaqt o‘tib o‘zbek adabiy tili davlat tili maqomiga to‘liq ko‘tarila
olgani yo‘q. Chunki aksariyat yurtdoshlarimiz o‘z kelajagini o‘zbek tilini
mukammal bilish emas, rus va boshqa xorij tillarini o‘rganishda ko‘rmoqda.
Reklama va e’lonlar emas, davlat hujjatlarini yozayotgan mutaxassislarning
ko‘pi rus tilida tahsil olgan va o‘zbek tilida savodi yo‘q.
Bugun ko‘chalarimizdagi afisha, reklama va e’lonlarga
qaraganimizda ingliz, rus tillarida aralashtirib yozilgan jumlalarni ham ko‘rishimiz
mumkin. Reklamalarda o‘zbek tilidagi so‘zlarning muqobilidan foydalanib,
mahsulotning foydaliligi haqida aholiga axborot berish mumkin-ku! Bunda tadbirkor
reklama orqali o‘zbek tilidan unumli foydalanishi kerak.
Umuman olganda,
davlat tili maqomiga ega tilimiz rivoji, uni asrash va taraqqiy ettirish har
bir fuqaroning burchidir.
Xakimova Zebinisa Muzaffarovna
Davlat
xizmatlari agentligi direktorining maʼnaviy-maʼrifiy ishlar samaradorligini
oshirish, davlat tili to‘g‘isidagi qonun hujjatlariga rioya etilishini
taʼminlash masalalari bo‘yicha maslahatchisi