- Bosh sahifa
- Maslahatchi minbari
- Hoshiyaga bitilgan – umrboqiylik
Hoshiyaga bitilgan – umrboqiylik
Dunyo yaralib,
unda bashariyat paydo bo‘lgandan buyon tug‘ilmoq va o‘lmoq inson qismatiga
bitilgan. Umrimizning chegaralanganligi uni chiroyli o‘tkazish sabog‘ini o‘rgatadi.
Boshqacha aytganda, bu sinovli dunyoning har birimiz uchun atalgan
chig‘iriqlaridan qay tarza o‘tish, foniy dunyodan, boqiylikka qay yo‘sin qadam
qo‘yish qaysidir ma’noda o‘z qo‘limizda. Alloh tomonidan aql va idrok in’om etilgan
har bir inson bu haqiqatni tushunadi va shu yo‘lda harakat qiladi.
Oramizda yashashni
sevmagan, uzoq yashashga intilmagan insonni topish mushkul. Faqat yashash
mazmunini har kimsa o‘z qarichi bilan baholaydi. Kimdir dunyo qadrini mol-dunyo
yig‘ishda deb bilsa, kimdir faqirona bo‘lsa ham ko‘ngil xotirjamligida
umrguzaronlik qilishga intiladi. Yana kimdir havas bilan yashasa, boshqa bir
inson hasad bilan borliqni va borlig‘ini qorong‘ulikka burkaydi. Oramizda bir
umr boshqalar haqida bir daqiqa ham qayg‘urmagan, o‘z olamida yashab o‘tganlar,
yoinki, ko‘p yaxshi amallari bilan nafaqat el koriga yaragan, balki, shu orqali
o‘zining ikki dunyosini ham munavvar etgan bashar farzandlari ham bor. Ularni
o‘zi necha yillar oldin tabiat xodisasi tufayli yo‘q bo‘lib ketgan bo‘lsa-da
shu’la taratib turgan yulduzlarga qiyoslaysan kishi. Bugun men ana shunday
“yulduzlar”dan biri, xalqimizning sevimli adibi O‘tkir Hoshimov haqida qog‘oz
qoralashni niyat qildim.
Adib tug‘ilmoq va
o‘lmoq jarayonini ikki eshik orasidagi masofaga qiyoslagan edi. Bu o‘xshatishdan
biz juda keng ma’noni anglashimiz mumkin. Shaxsan men bu qiyoslashni
quyudagicha talqin etgan bo‘lar edim. Go‘ya hayot ikki eshikdan iborat bir xona
misoli-yu, insonlar esa bir eshikdan kirib, ikkinchi eshikdan chiqib ketuvchi
mehmonlardek. Kirish va chiqish oralig‘i esa – umr yo‘li.
O‘tkir Hoshimov o‘zining Yaratgan in’om etgan hayotiga
mazmun baxshida eta olgan inson edi. U hayot, tug‘ilish va yashashning asl
mohiyatini chuqur anglagan va ana shu haqiqatlarni mohirona tarzda o‘z
asarlarida ifodalay olgan adib sifatida xotiramizdan joy oldi. Uning birgina
“Daftar hoshiyasidagi bitiklar” kitobining o‘zi ham yuqoridagi fikrlarimizning
yaqqol dalili bo‘la oladi. Kitobni ilk sahifasida keltirilgan quyudagi satrlar
sizga yozuvchi haqida ko‘p xulosalarni taqdim etadi:
“Aziz o‘quvchim! Bu kitobchani qariyb qirq yil
yozdim. Bular mening Kuzatuvlarim, o‘ylarim… Bir qadar armonli, bir qadar istehzoli, bir qadar tabassumli
xulosalarim... Aslida, ularning har birini alohida asar qilsa ham bo‘lardi-ku... mayli... Men bularni uzoq o‘ylab
yozganman. Iltimos, Siz ham kitobni shoshilmasdan, o‘ylab o‘qisangiz...”
Adibning ushbu
asari kirib bormagan xonadon bo‘lmasa kerak. Bu mo‘jaz kitobni qo‘limga olganimda, hali talaba edim.
Bugun hayotning achchiq-chuchugini totgan inson sifatida uni qayta varaqlar
ekanman, asardagi qimmatli fikrlarga o‘zga bir qarash, o‘zga bir xulosalarni
tuyaman. Beixtiyor mazkur fikrlar bejiz qirq yillik mehnat mahsuli bo‘lmaganiga
iymon keltiraman. Bugun o‘z xulosalarimni siz bilan o‘rtoqlashish niyatidaman.
Asardagi insonga
berilgan ta’rifga e’tiboringizni qaratmoqchiman:
“Inson shu qadar buyukki, uning fazilatlarini o‘lchash –
dunyodagi eng baland tog‘ning
eng baland cho‘qqisiga emaklab
chiqish zahmati bilan teng. Inson shu qadar tubanki, uning illatlarini o‘lchash – dunyodagi eng baland tog‘ning eng baland cho‘qqisidan emaklab tushish zahmati
bilan teng”.
Bu satrlarni mutolaa qila turib, qalbingizda bir oz g‘ashlikni his etasiz. Beixtiyor sinovli
umr yo‘lida turfa xil insonlar orasida inson degan nomga munosib bo‘lib yashash
mashaqqati hayolingizdan o‘tadi. Boshqacha aytganda, qalban o‘zingizni taftish qilasiz.
Bir onga fikrlaringizni jamlashga qiynalasiz… O‘zingizcha xulosalar yasaysiz.
Shuningdek, asardagi “Xom sut emgan banda” sarlavhasi ostidagi quyudagi bitiklar ham insonni
mulohazaga chorlaydi.
“Odam uchta
narsaning qadrini doim kechikib biladi. Yoshlik. Sog‘lik. Tinchlik.” Ushbu fikrlar ayni siz-u biz yashayotgan davr
va sharoitda naqadar mos keladi. Pandemiya sharoitida sog‘lik barcha boyliklardan ustun
turishini anglamagan inson qolmadi, nazarimda, biroq bu holat ko‘pchiligimiz
uchun kasallikdan keyingi xulosa bo‘lgani achinarli hol, albatta. Yoshlik ham
insonga g‘animat hisoblanadi.
Kuch-g‘ayratga to‘la onlardan mazmunli foydalana olishni barcha ham uddalay
olmaydi. Keksalikning qay tarzda kechishi yoshlikni qay tarzda qadrlanganiga bog‘liq.
Yuqoridagilardan ana shu mazmunni anglash mumkin, nazarimda...
“Ko‘ngil” sarlavhasi ostidagi
fikrlarni mutolaa qila turib esa, beixtiyor ko‘zingizga yosh keladi. Hayot
tashvishlaridan horigan jismimiz, ruhimiz uchun aslida eng zarur bo‘lgan mehrning bugun qimmatlashib
borayotgani yodimizga tushadi. Aslida, mehr dunyo yaratilishiga sabab bo‘lgan, borliqni bor etib turgan
tuyg‘u desam mubolag‘a bo‘lmaydi. Qarindoshlik rishtalari, qo‘shnichilik, er-xotin, ota-ona
hamda farzandlar o‘rtasidagi rishta, qo‘yingki barcha munosabatlarning negizidir mehr:
“Odam hamma narsaga to‘yishi mumkin. Boylikka… Amalga ham… Shon-shuhratga… Xudoning o‘zi kechirsin-ku, hatto… hayotga ham… Qarib-churiganida
“Omonatingni olaqol, yaratgan Egam”, deydiganlar, chin dildan gapiradi… Odam hamma narsaga
to‘yishi mumkin. Faqat bir
narsaga – Mehrga to‘ymaydi. Bu masalada
shohu-gado barobar. Holbuki, dunyoda bundan arzon narsa yo‘q. Bir og‘iz shirin So‘z,
bir chimdim Mehr kimni o‘ldiribdi!
Biz esa shuni ham bir-birimizdan ayaymiz...”
Adibning falsafiy mazmundagi quyudagi bitiklari haqida
soatlab fikr almashmoq, ularni tahlil qilmoq mumkin:
“Umr o‘lchovi yolg‘iz Ollohga, mazmuni esa ko‘p jihatdan insonning o‘ziga
bog‘liq.”
“Donolik bilan nodonlik shu qadar yaqinki, odam donolikni
qancha ko‘p da’vo qilsa, shuncha
nodon bo‘ladi!”
“Dono nodondan o‘zini bir
pog‘ona quyi tutsa, hayron bo‘lmang. Tarozining yukli pallasi bo‘sh palladan pastroqda turadi”.
“…Inson – aqlli. Inson – donishmand. Inson – telba!”
“Yomonning
yaxshisi bo‘lgandan yaxshining yomoni bo‘l.
Yomondan – yomonlik yuqadi. Yaxshidan – yaxshilik”.
“Rost gapir. Rostgo‘y odam
jasur bo‘ladi”.
“Toshni maydalab, qumga aylantirish uchun bir daqiqa
kifoya. Ammo qumning toshga aylanishi uchun ming yil kamlik qiladi. Do‘stlik ham shunga o‘xshaydi.”
“Haqiqat havoga o‘xshaydi. Rangini ko‘rmaysiz.
Ovozini eshitmaysiz. “Hidini bilmaysiz… Ammo bir lahza havosiz qolsangiz, bo‘g‘ilib ketasiz…”
“Nar lochin yemish
topib kelarkan. Moda lochin o‘ljani
polaponlariga bo‘lashib
berarkan. Biron falokat bo‘lib,
moda lochin o‘lib qolsa, nar
lochin har qancha yemish topib keltirmasin, baribir, polaponlar ochidan nobud
bo‘lar ekan. Negaki, nar lochin
o‘ljani bolalariga burdalab
berishni eplolmas ekan… Tabiat naqadar beshafqat, tabiat naqadar dono!”
Asarning har bir
sahifasida bu kabi qimmatli fikrlarga duch kelasiz. Boshqacha aytganda,
kitobchadagi o‘zida katta ma’no-mazmunni ifodalagan kichik bitiklar adib
e’tirof etganidek, o‘quvchi
rohat qilib o‘qishi uchun,
iztirob chekib yozilgan.
Xulosa o‘rnida kitobdagi quyudagi fikrlarni
keltirmoqchiman:
“Ikkita
eng xolis hakam – Kitobxon va Vaqt sinovidan o‘tgan asar haqiqiy asardir”. Biz
adibning qalamidan to‘kilgan har bir ijod mahsuliga ana shunday ta’rif bera
olamiz. Ular bugun xalq e’tiborini, xalq muhabbatini va nihoyat xalq e’tiqodini
qozondi hamda O‘tkir Hoshimov siymosini adabiyot tarixiga o‘chmas tarzda
muhrladi. Biz esa ushbu durdonalar uchun adibdan minnatdorlik hissini tuyib yashaymiz.
Shahriyor Mansurov
Qurilish vazirining ma’naviy-ma’rifiy
ishlar samaradorligini oshirish,
davlat tili to‘g‘risidagi qonun
hujjatlariga rioya etilishini ta’minlash
masalalari bo‘yicha maslahatchisi