- Bosh sahifa
- Maslahatchi minbari
- Farzandlarimizga mos bo‘lgan ismlarni qo‘yishga nimalarga e’tibor berishimiz zarur!?
Farzandlarimizga mos bo‘lgan ismlarni qo‘yishga nimalarga e’tibor berishimiz zarur!?
Chaqaloq tug‘ilganda unga chiroyli
ism qo‘yish har bir ota-onaning farzand oldidagi burchidir. Shuning uchun bu
muhim ishga alohida e’tibor bilan yondashishi lozim. Farzand ulg‘ayib, katta
bo‘lganida o‘z ismidan uyalmasin, balki ism unga ziynat bo‘lishi kerak.
O‘zbek xalqi azaldan o‘z farzandiga
ma’noli va chiroyli ism qo‘yishga harakat qiladi. Toki, ulg‘ayganda ismini
aytib chaqirishganda uyalmasin. O‘zbekistonda yashayotgan turli millatlar
vakillari o‘z farzandlariga eng ko‘p qaysi ismlarni qo‘yishyapti?
O‘zbekiston Respublikasi Prezidentining 2020-yildagi
Farmoniga asosan 2020-yil 1-apreldan boshlab FHDY organlari Adliya vazirligi huzuridagi
Davlat xizmatlari agentligi tasarrufiga o‘tkazildi.
Davlat xizmatlari agentligi O‘zbekistonda 2021-yilning ortda qolgan
davri mobaynida yangi tug‘ilgan eng ko‘p qo‘yilayotgan o‘g‘il bolalar va qizlar
ismlari haqida ma’lum qiladi.
2021-yilning 8 oyida O‘zbekistonda
54660 nafar o‘zga millatga mansub chaqaloq dunyoga keldi, shundan 23,3 ming
hafari – tojik bo‘lib, ularga Muhammadali va Mustafo ismlari eng ko‘p
qo‘yilgan. Turkman va uyg‘ur bolalarga Muhammad, rus chaqaloqlariga Sofiya,
qozoq chaqaloqlarga Alixon ismi eng ko‘p
qo‘yilgan.
2021-yilning yanvar-avgust oylarida O‘zbekistonda
yashovchi boshqa millat vakillarining umumiy 54660 tug‘ilish holati qayd
etildi.
Davlat xizmatlari agentligi ma’lumotlariga ko‘ra, eng
ko‘p – 23,3 ming tug’ilish tojik millatiga to‘g‘ri keladi. Oxirgi 8
oyda tojik chaqaloqlarga qo‘yilgan asosiy ismlar, Muhammadali va Mustafo
ismlari bo‘ldi.
2021-yilning oxirgi uch oyida O‘zbekiston bo‘yicha
yangi tug‘ilgan o‘g‘il bolalarga Muhammadali ismi, qizlarga esa Sofiya ismi eng
ko‘p qo‘yilgan.
2021-yilning 9 oyida O‘zbekistonda yangi tug‘ilgan
o‘g‘il bolalarga (20 570 nafar) Muhammad ismi, qizlarga (21 323
nafar) esa Soliha ismi eng ko‘p qo‘yilgan.
Dunyoda turli millatlar, xalqlar mavjud. Ularning
ichida bir xil ism bilan ataluvchilari talaygina. Jumladan, dunyoning 25
davlatida Safiya ismi keng tarqalgani ma’lum. Muhammad, Payg‘ambarimiz Muhammad
(S.a.v.) ismlari musulmonlar ichida mashhurdir. Bugungi kunda Daniya, Angliya,
Gollandiya va Belgiyada yangi tug‘ilgan chaqaloqlarning ko‘chiligiga Muhammad
ismi berilmoqda. Hisob-kitoblarga qaraydigan bo‘lsak, dunyo bo‘ylab 150 mln. kishilar
Muhammad (arabcha, ma’nosi: oliy martabali, yuksalgan, ulug‘vor) ismi
bilan atalgan.
Shu o‘rinda сhaqaloqlar
ismini yozishda yo‘l qo‘yilayotgan xatolar haqida to‘xtalib o‘tmoqchi edim. Afsuski, hujjat va imloning mos
tushmasligi hamda shu bilan bog‘liq muammolarga nafaqat tahririyat ishida,
balki kundalik hayotda ham tez-tez duch kelish mumkin.
Avvallari xatolar davlat mahkamalarida, asosan, rus millatiga mansub
kishilarning ishlashi bilan izohlanar edi. Bu muammo ma’lum ma’noda bartaraf
etildi ham, biroq xatolardan hanuz qutilmadik. Ayniqsa, “h” va “x” xarflari
qatnashgan ism-familiyalarning to‘g‘ri yozilganidan noto‘g‘risi ko‘p.
Qolaversa, shunday ismlar ham borki, ularning asl imlosi allaqachon unutilib
ketganday: Mashkura (Mahshura), Timur (Temur), Boxodir
(Bahodir) kabi ismlar imlosi ham mana shunday kamsavodlik mahsulidir, desak
adashmaymiz.
Ism noto‘g‘ri yozildimi, demak qachondir, undan hosil
bo‘ladigan familiya ham xato bilan yoziladi. “Muxamedov”, “Tadjiyev”, “Kasimov”,
“Yuldashev”, “Kadirov”, “Ibragimov” kabi familiyalarning kelib chiqish tarixi ham
shu bilan bog‘liq. Afsus, ularning yangi egalari ham bu familiyalarni xatosi
bilan birga qabul qilishmoqda. Mana, masalan, ko‘p uchraydigan familiyalardan
biri – “Artikov”, “Artik” yoki “Akilov”, “Akil” degan
ism bormi? Yoki “Yakubov”, “Abdugapparova”. Nahot familiya egalari bir so‘zdagi
uchta xatoga ko‘z yumsa!
Ha, ko‘pсhilik shaxsini tasdiqlovchi hujjatni sobiq
sho‘rolar davrida olgan. Bu hujjatlardagi ism, familiyalar avloddan avlodga o‘tib kelmoqda.
Ism-shariflarning avvallari xato yozilgani-ku mayli, bugun bu muammoning
mavjudligini qanday izohlash mumkin? Hazrat Navoiy timsolida butun Sharq
olamini tilga e'tiborli bo‘lishga undagan millatning vakili ism-sharifini xato
yozsa, buni qanday oqlab bo‘ladi? Nima uchun bu hanuzgacha muammoligicha
qolmoqda.
Mana, o‘zbek tiliga davlat tili maqomi berilganiga ham
32 yil bo‘ldi. Izohli lug‘atlar, imlo qoidalari jild-jild kitoblar holida bosib
chiqarildi. Xo‘sh, qachongacha xatoni tamg‘aday ko‘tarib yurish mumkin?
Hujjatlardagi xatolarni to‘g‘irlab takroran olish
mumkin. Biroq bu keyinchalik rasmiy hujjatlar bilan ishlayotganda qiyinchilik
tug‘diradi, degan xayolda ko‘pchilik bu qarordan voz kechadi. Ayniqsa, biror
ko‘chmas mulkka egalik qilganlar yoki tadbirkorlik bilan shug‘ullanadiganlar
ism-familiyadagi bittagina harfni ham o‘zgartirishga cho‘chisharkan.
Aytishlaricha, bir hujjatda ismni to‘g‘irlash boshqa hujjatlarga ham o‘zgartirish
kiritishni taqazo qiladi.
Ism-sharifdagi imloviy xatoni to‘g‘irlash qiyinchilik tug‘dirmaydi, Tug‘ilganlik
to‘g‘risidagi guvohnoma va pasportning takroran berilishini so‘rab tegishli
idoralarga ariza yoziladi. Ism-familiya o‘zgartirilgandan keyingi yuritiladigan
hujjatlarga esa shaxsni tasdiqlovchi hujjatning dastlabkisi va o‘zgartirilgani,
shuningdek, o‘zgartirish sababi qayd etilgan ma'lumotnoma ilova qilinadi.
“So‘zda aytish oson-da”, – dersiz hoynahoy. Axir
rasmiy hujjatlar haqida gap ketganida odamlarimiz ko‘z o‘ngiga idorama-idora
yurish, sarsongarchilik, eshiklar oldida soatlab navbat poylash kabilar keladi.
Qolaversa, bu yerda gap hujjat olish emas, borini to‘g‘irlash haqida ketganidan
keyin, “shunisi ham bo‘laveradi” deydiganlar topiladi.
Ma’lumki, qonunchilikka asosan bolaga ism
qo‘yish ota-onaning huquqidir. Tug‘ilganlik haqidagi guvohnomaga ham ism
ota-ona qanday xohlasa, shunday yoziladi. Aytaylik, ismning xato bilan
yozilishini talab qilish ham ota-onaning huquqidir.
Ushbu masalaga aniqlik kiritadigan bo’lsak, tug‘ilganlik
haqidagi guvohnomani olish uchun kelgan ota yoki boshqa vasiy shaxs chaqaloqqa
qo‘yiladigan ismni arizada yozma ravishda taqdim qiladi. FHDYo xodimlari uni
imlo lug‘atlaridan tekshiradilar. Agar xatolik bo‘lsa, to‘g‘ri variantni
ko‘rsatib, tushuntirish ishlarini olib boriladi. Tug‘ilishni
qayd etish yozuvida doim imlo lug‘ati va ismlar
kitoblari tayanadilar.
Xo‘sh, lug‘atlardan foydalanishsa, xatolar nima uchun
kamaymayapti? Bu masalaga butkul aniqlik kiritadigan bo‘lsak, tug‘ilganlik
to‘g‘risidagi guvohnomaga bolaning familiyasi ota-onasining pasportidan (agar
boshqa familiya berilmasa) ko‘chiriladi.
Tug‘ilishni qayd etish yozuvida bolaga
familiya ota-onasining kelishuviga ko’ra ota yoki onaning familiyasi,
shuningdek, milliy an’analarga muvofiq ota yoki ona tomonidan boboning ismi
bo’yicha beriladi. Mustabid tizimi davrida yozilgan hujjatlardagi xatoliklar
haqida yuqorida gapirdik. Bugunda FHDY bo‘limlarida ota familiyasidagi xato
farzandining hujjatiga to‘g‘irlab yozilishi tartibi yo‘lga qo‘yilgan. Biroq
qonunchilikka asosan, faqat ota-ona roziligi bilangina bunday o‘zgartirish
kiritilishi mumkin.
Bolaga ism ota-onaning roziligiga ko‘ra beriladi.
Bolaning manfaatlaridan kelib chiqqan holda, unga kelgusida uning sha’ni va
qadrini kamsitishi mumkin bo‘lgan ism berilishiga yo‘l qo‘yilmaydi. Bola ismiga
doir kelishuv mavjud bo‘lmaganda paydo bo‘lgan kelishmovchilik vasiylik va
homiylik organi tomonidan hal etiladi.
Bolaning ota ismi uning otasininga ko‘ra beriladi.
Otasi haqida ma’lumotlar tug‘ilganlik haqida dalolatnoma yozuvi va guvohnomada
yozuvlar shaxsni tasdiqlovchi hujjatlar asosida o‘zgartirishsiz yoziladi.
Achinarlisi, ko‘pchilik familiyadagi xatoning
tuzatilishini istamaydi. “Xato bo‘lsa ham, familiyamiz bir xil bo‘la qolsin!”
deyishganda, FHDYo xodimining familiyani xato bilan yozishdan boshqa iloji
qolmaydi.
Xatoni hujjat bilan bog‘ladik, hatto ko‘pchilikning
ortiqcha qog‘ozbozlikni xushlamagani uchun uni tuzatmasligini bildik. Biroq, o‘z
ismimizni to‘g‘ri yozamizmi yoki yo‘q? degan savol tug‘iladi. “Facebook” ijtimoiy
tarmog‘ida O‘zbekistonlik foydalanuvchilarning ko‘pchiligi ism-sharifini
profiliga xato(lar) bilan yozgan. Hatto, katta yoshli, ayrim hollarda oliy ma’lumotli
kishilar ham ismlarini xato bilan yozishganini ko‘rish mumkin. Gazetalarimizda
ham ism-shariflarning xatolar bilan yozilishiga tez-tez ko‘zimiz tushadi.
Tahririyatlar buni hujjat bilan aynanlikni ta’minlash bilan izohlashadi.
Xatolar shunchaki imlo bilan bog‘liq bo‘lsa mayli,
biroq ba’zida ular lug‘aviy ma’noga ham ta’sir qilishi mumkin. Ism qo‘yishda
uning ma’nosiga ham ahamiyat berish lozimdir. Muqaddas dinimiz ta’limotida
farzand dunyoga kelar ekan, ota-ona oldida ko‘plab mas’uliyatlar paydo bo‘ladi.
Shunday mas’uliyatlardan biri bolaga chiroyli va ma’noli ism qo‘yishdir. Hadislarda
aytilishicha, farzandiga chiroyli, ma’noli ism qo‘yish ota-onalarning, xususan,
otaning vazifasidir. O‘z davrida payg‘ambarimiz (S.A.V.) ismidan shikoyat qilib
kelgan kishilarga chiroyli ism tanlab bergan ekanlar. Hatto ism o‘z sohibining
fe’l-atvoriga, taqdiriga ta’sir etishi bejiz e’tirof etilmagan. Ota-bobolarimiz
ismlarga tole yashirin ekanini his qilganlar va bolalarini go‘zal ismlar bilan
ataganlar. Afsuski, bugun ayrim kishilar uchun ismning ma’nosidan ko‘ra,
ma’nisiz bo‘lsa-da, uning yaltiroqligi, jarangdorligi muhim, chog‘i.
Ko‘p hollarda farzand dunyoga kelganda, ota-onalar
ularga ism qo‘yish borasida bosh qotiradilar-u, ismning ma’nosi haqida o‘ylamaydilar.
Hozirgi kunda shunday bir holatlarni ham kuzatishimiz mumkinki, farzandlariga
hech qanday ma’noga ega bo‘lmasa-da, ma’nosi g‘aliz bo‘lsa-da, kimlargadir
havas qilib, umuman, dinga to‘g‘ri kelmaydigan, zamonaviy hamda mashhurlar
ismlarini qo‘yish odat tusiga kirgan. Shu ismni qo‘yganda jaranglab tursin,
boshqa ismlardan ajralib tursin, deb. Masalan, Shoxsanam, Tavifa, Samira, Simran, Zinnura, Hyuram, Indira... Bu
kabi yangicha ismlarni qo‘yish urfga kirdi. Sug‘diyonani “Sagdiana” yo Ibrohimni “Ibragim” deyish G‘arbga ko‘r-ko‘rona taqlid qilishday gap. Sport ishqibozlari esa o‘zining sevimli yulduzlarining
ismlarini farzandiga qo‘yadigan bo‘lishdi: o‘zbek
bolasi Zinedin, Ronaldo, Messi ismlari bilan chaqiriladigan bo‘ldi. Yoki bir ayol
“Esmeralda” serialini ko‘rib, qiziga “Esmeralda” deb ism qo‘ygan. Bu kabi holatlarga ko‘p duch kelish mumkin.
Bular boshqa-boshqa mavzulardir balki,
lekin ularni tutashtiradigan savol bir: ism qo‘yish mas’uliyatini qachon his
qilamiz?
Vatanparvarlik o‘zlikni anglashdan boshlanadi.
O‘zliging esa, avvalambor, ota-onang bergan noming, ismingdir.
Zebiniso Hakimova
Davlat xizmatlari agentligining maʼnaviy-maʼrifiy
ishlar samaradorligini oshirish va
davlat
tili toʼgʼrisidagi qonun hujjatlariga rioya
etilishini taʼminlash masalalari
boʼyicha maslahatchisi