- Bosh sahifa
- Maslahatchi minbari
- Qadring baland bo‘lsin, Ona tilim!
Qadring baland bo‘lsin, Ona tilim!
Dunyodagi qadimiy va boy tillardan biri bo‘lgan o‘zbek tili xalqimiz uchun milliy o‘zligimiz va mustaqil davlatchilik timsoli, bebaho maʼnaviy boylik, buyuk qadriyatdir. Ona tilimizning bor latofati, jozibasi va taʼsir kuchini, cheksiz imkoniyatlari munis onalarimiz allalarida, ming yillik dostonlarimizda, o‘lmas maqomlarimizda, baxshi va hofizlarimizning sehrli qo‘shiqlarida o‘z ifodasini topadi. Bu tilda o‘zbek adabiyotining mashhur adiblari Rabg‘uziy “Qissasi Rabg‘uziy”, Yusuf Xos Hojib “Qutadg‘u bilig”, Maxmud Qoshg‘ariy “Devonu lug‘otit-turk” asarlarini yaratib, ushbu asarlari orqali til tarixidan so‘zladi. Buyuk mutafakkir Alisher Navoiy “Xazoyin ul- maoniy ”dek bebaho va “Xamsa”dek shoh asarni bunyod etib, so‘z mulkining sultoni bo‘ldi.
Jonajon ona tilimizga eʼtibor Mustaqillik yillarida juda kuchaydi. Milliy tilimizni rivojlantirish borasida hurmatli Prezidentimiz va hukumatimiz tomonidan qator farmon va qarorlar qabul qilindi. O‘zbekiston Respublikasi Prezidentining “O‘zbek tilining davlat tili sifatidagi nufuzi va mavqeyini tubdan oshirish chora-tadbirlari to‘g‘risida”gi PF-5850–sonli Farmoni,O‘zbekiston Respublikasi Prezidentining “Mamlakatimizda o‘zbek tilini yanada rivojlantirish va til siyosatini takomillashtirish chora-tadbirlari to‘g‘risida” gi PF-6084 –son Farmoni, O‘zbekiston Respublikasi Vazirlar Mahkamasining”Lotin yozuviga asoslangan o‘zbek alifbosiga bosqichma bosqich to‘liq o‘tishni taʼminlash chora-tadbirlari to‘g‘risida”gi 61-sonli qarori shular jumlasidandir. O‘zbekiston Respublikasi Vazirlar Mahkamasining 2022-yil 6-iyun kungi 118-son yig‘ilish bayoniga asosan o‘zbek tilini targ‘ib qiluvchi ijodiy izlanishlarni rag‘batlantirish va ommalashtirishga qaratilgan “Qadring baland bo‘lsin, Ona tilim!” respublika tanlovining o‘tkazishni belgilanishi ham jonajon ona tilimizga bo‘lgan eʼtiborning bir ko‘rinishidir.
Har birimiz davlat tiliga bo‘lgan eʼtiborni mustaqillikka bo‘lgan eʼtibor deb, davlat tiliga bo‘lgan ehtirom va sadoqatni ona vatanga ehtirom va sadoqat deb bilishimiz kerak, shunday qarashni hayotimiz qoidasiga aylantirishimiz kerak. Bu oliyjanob harakatni barchamiz o‘zimizdan, o‘z oilamiz va jamoamizdan boshlashimiz, ona tilimizga, urf-odat va qadriyatlarimizga hurmat, Vatanga mehrimizni amaliy faoliyatda namoyon etishimiz kerak.
Farg'ona viloyati Dang'ara tumani maslahatchisi
Shahnoza Bohodirjanovna