- Bosh sahifa
- Maslahatchi minbari
- Ma’naviyat karvoni zamini javohirlarga, qalblari ma’naviy gavharga to‘la navoiyliklar huzurida
Ma’naviyat karvoni zamini javohirlarga, qalblari ma’naviy gavharga to‘la navoiyliklar huzurida
Olam
ahli bilingizkim ish emas dushmanlig‘,
Yor o‘ling bir-biringizgakim, erur yorlig‘ ish.
Alisher Navoiy
Yurtimizda ma’naviy-ma’rifiy ishlarning
ta’sirchanligini oshirish, siyosiy, iqtisodiy, ijtimoiy, ma’naviy-ma’rifiy
islohotlarning mazmun-mohiyatini jamoatchilik o‘rtasida keng targ‘ib etish
orqali vatanparvar, xalqqa muhabbat va sadoqat tuyg‘usi bilan yashaydigan
barkamol avlodni tarbiyalashga alohida e’tibor qaratishdek mas’uliyatli
«yuk»larni yelkasiga ortgan «Ma’naviyat karvoni»ning navbatdagi manzili hazrat
Nizomiddin Mir Alisher Navoiy bobomiz nomi bilan atalgan viloyat bo‘ldi.
Taniqli shoiru yozuvchilar, ilmu fan arboblari, san’atkorlar, kino san’ati
darg‘alaridan iborat karvon bepoyon kengliklar ichra yashayotgan mard va tanti,
ma’rifatparvar insonlar vatani sari yo‘l oldi.
Toshkenti azimdan chiqqan poyezdimiz oldinga yeldek uchardi. Yana ijodiy
safarga otlanganmiz, yana oldinda qanchadan-qancha samimiy uchrashuvlar,
manfaatli fikr almashuvlar bizni kutmoqda.
Bizning Alisher Azimov boshchiligidagi ijodiy guruhimiz a’zolari
viloyatning Konimex tumaniga kechga yaqin yetib bordi. Mehmonxonaga
joylashiboq, Zafarobod shaharchasidagi 5-son kon boshqarmasi sari yo‘l oldik.
Chunki bu yerda 300 ga yaqin konchilar va ularning oila a’zolari
bizni kutishayotgan ekan. Konchi mehnatkashlar shoir-yozuvchilarimizning ijod
namunalarini dildan tinglashdi, taniqli san’atkorlarimizga qo‘shilib, raqsga
tushib, qo‘shiqlariga jo‘r bo‘lishdi. Shunday qilib, ilk ma’naviy-ma’rifiy
tadbirimiz ko‘tarinki ruhiyatda boshlandi.
– Kombinatimiz asosan burg‘ilash ishlariga, uranni qayta ishlashga ixtisoslashgan, – deya tanishtirish barobarida so‘z boshladi 5-son kon boshqarmasi bosh muhandisi Sulton Mahmudov. – Bu yerda uch mingga yaqin ishchi faoliyat ko‘rsatib, oilalarining kundalik ehtiyojlarini qondiradi, ma’rifiy tadbirlar o‘tkazib, madaniy dam oladilar.
Keyingi manzilimiz tuman Ma’naviyat va ma’rifat markazida bo‘ldi. Bu
yerda ma’naviy merosimizning nodir namunalarini aholi, ayniqsa, yoshlar
o‘rtasida keng yoyishga qaratilgan «Milliy qadriyatlar» taqdimoti o‘tkazildi.
Bunda qozoq xalqining «Betashar» (bet ochar), «Tusaukeser» (tushov kesish),
«Besekke salu» (go‘dakni beshikka solish), qoraqalpoq xalqlarining «Qiz
uzatu» (kelin salom), choy qo‘yish kabi milliy urf-odatlari, marosimlari bizda
olam-olam zavq-shavq bag‘ishladi.
Shundan so‘ng "Navro‘z", "Do‘stlik",
"Guliston" mahalla fuqarolar yig‘ini aholisi, yoshlari bilan
uchrashuv bo‘lib o‘tdi. Ona Vatan madh etilgan she’rlar yangrab, mahalla ahli
bilan samimiy muloqotga ulanib ketdi.
4-son bolalar musiqa va san’at maktabi ustoz-murabbiylari hamda
o‘quvchilari bilan muloqot ham o‘zgacha tarovat kasb etdi. Bu
maskanda o‘quvchilar do‘mbira, dutor, karnay-surnay, pianino kabi musiqa
asboblaridan saboq olisharkan. «Shuhrat» medali sohibi, milliy estradamizda
o‘ziga xos ovozga ega Umidjon Shahobovning tanbur chertish bo‘yicha
o‘tkazgan mahorat darsi, O‘zbekistonda xizmat ko‘rsatgan artist Gulchehra
Nosirovaning rollarni ijro etish san’ati, kinoaktrisa hamda teleradio
boshlovchi Mukarram Bekmurodovaning dil so‘zlari, xushovoz xonanda
Kamoliddin Mirsoliyevning maqom yo‘nalishidagi qo‘shiqlari, O‘zbekiston
Yozuvchilar uyushmasi a’zosi, shoir Mirza Karimning ota-ona,
ustoz-murabbiylarga bag‘ishlangan she’rlari, qolaversa, O‘zbek milliy akademik
drama teatri aktyori Laziz Orziyevning boshlovchilik va so‘z o‘yinlari mahorati
ishtirokchilarga manzur bo‘ldi.
Tadbir so‘nggida salkam 40 yillik ish stajiga ega bo‘lgan tajribali
pedagog, maktab direktori Mahbuba Adnayeva kelgusi rejalar haqida
zavq-shavq bilan so‘zlab berdi.
Muhimi, «Yangi O‘zbekistonda el aziz, inson aziz» shiori ostida
o‘tkazilgan har bir tadbir barchamizga dili bir, dini bir, qadriyatlari bitta
xalq ekanimizni takroran yodimizga solgandek bo‘ldi...
Xuddi shoir ta’kidlaganidek,
O‘zbek, Qozoq, Qoraqalpoq, Tojik,
Turkmanmiz,
Olloh dargohida oqu, qora –
barchamiz tengmiz.
Bani odammiz, basharmiz –
ahil turkiymiz,
Qondosh, jondosh, dindosh,
og‘a-inimiz!
INSONNING QADRI INSON BILAN
Kimki bir ko‘ngli buzuqning xotirin shod aylag‘ay,
Oncha borkim, Ka’ba vayron bo‘lsa, obod aylagay.
Alisher Navoiy
Tadbirlarimiz doirasida Mehr-saxovat loyihasi ham mavjud bo‘lib, unga
ko‘ra, qariyalar, nogironligi bor shaxslar, bemor yurtdoshlarimiz holidan xabar
olish ko‘zda tutilgan. Biz ham tumanning «Navro‘z» MFYdagi bir necha
xonadonlarda bo‘ldik. Ularning mahzun ko‘ngillariga biroz bo‘lsa-da,
quvonch ulashishga harakat qilindi. Shoirlarimiz ta’sirchan ijod namunalarini
o‘qishgan bo‘lsa, san’atkorlarimiz o‘zlarining diltortar navolari bilan ularni
xushnud etishdi, dil bilan dildan suhbat qurishdi. «G‘animatim onajon»
qo‘shig‘ini jo‘r ovozda xirgoyi qilishgan guruhimizning eng yosh va umidli
xonandalari «Nihol» mukofoti sohibasi Guljahon Xolxo‘jayeva
va Akmaljon Xolxo‘jayevlarning jarangdor ovozlaridan ular g‘oyat
to‘lqinlanib, hatto ko‘zlariga sevinch yoshlari ham keldi.
Quvonarlisi shundaki, mazkur MFYning Berdaq ko‘chasi 3-uyda
yashayotgan nogironligi bor ayolning
qizi – Arzigul Aldanazarovaning ishga joylashishi yuzasidan
qilingan iltimosi bo‘yicha tuman hokimi
o‘rinbosari Quvonchbek Shamsiyev tomonidan shu yerning o‘zidayoq
amaliy yechimga kirishildi.
QADRI BALAND, MEHRI DARYO KONIMEXLIKLAR
Aql ila olam yuzin obod qil,
Xulq ila olam elini shod qil.
Alisher Navoiy
Erta tongdan
"Yuksalish" MFYsi binosi turli xalq vakillari, yoshlar
bilan gavjum. Ular bilan uchrashuv mazmunli, qiziqarli bo‘ldi. Yana bir
quvonchli jihati – shu elning sevimli farzandi, viloyatning Konimex,
Tomdi va Uchquduq tumanidan Oliy Majlis qonunchilik palatasiga
deputat etib saylangan Axshagul Tulegenova bizga hamrohlik qildi
va yaqindan yordam berdi. Konimexliklar orasidan ikki nafar O‘zbekistonda
xizmat ko‘rsatgan madaniyat xodimi, ikki nafar Qoraqalpog‘iston xalq
artisti, 3 nafar O‘zbekiston Yozuvchilar uyushmasi a’zosi, o‘n nafarga yaqin
xizmat ko‘rsatgan chorvadorlar faoliyat ko‘rsatishar ekan.
SAHRODA INNOVASIYA
Yana bir qiziq
ma’lumot. Konimexlik cho‘ponlar Qizilqum yaylovlaridagi o‘tovlarida quyosh
panellarini o‘rnatishmoqda. Bir paytlari faqat shamchiroqda o‘tiriladigan
o‘tovlar endilikda elektr chirog‘ida nurafshon bo‘lmoqda.
Konimexning chekka ovullariga safarimiz ulkan taassurotlarga boy bo‘ldi.
Tuman markazidan 250 kilometr uzoqlikda joylashgan qozoq, qoraqalpoq ovullariga
yetib bordik. Shundoq yuzlaridan tabassum ufurib turgan bu kishilar o‘ta
samimiy, mehmondo‘st va san’atsevar ekan. Ovuldagi har bir erkak kishi o‘z
milliy cholg‘u asboblarini chalishni xush
ko‘radigan, xushchaqchaq insonlar.
KARVON YO‘LI:
TOSHKENTDAN TOMDIGACHA
Ma’naviy-ma’rifiy tadbirlar
viloyatning markazidan tortib, Tomdi tumanining eng so‘nggi ovullarigacha
bo‘lgan chekka hududlarda ham qizg‘in davom etdi. Iste’dodli shoir,
O‘zbekiston Yozuvchilar uyushmasi a’zosi Humoyun Akbarovning ilhomi jo‘shib,
«Tomdi, yuraklar yondi» she’ri dunyo yuzini ko‘rdi va shu kunning o‘zidayoq
O‘zbekistonda xizmat ko‘rsatgan artist Toshpo‘lat Matkarimovning ajoyib
ijrosida qo‘shiq bo‘lib butun navoiyliklar qalbidan joy oldi.
QATRADA AKS ETAR QUYOSh
Naf’ing agar xalqqa beshakdurur
Bilki, bu nafʼ o‘zungga ko‘prakdurur.
Alisher Navoiy
Millatlararo totuvlik muhitini yanada mustahkamlash
borasida jonbozlik qilib faoliyat yuritayotgan tuman hokimi Ruslan Ro‘ziyev
quyidagilarni so‘zlab berdi: – tumanimizning jami aholisi 40 mingdan
ziyod bo‘lib, 14 ta turli millat va elat vakillari mehr-oqibat, bag‘rikenglik,
o‘zaro totuvlikda: ovullaru mahallalarimizda o‘zbek, qozoq millatiga mansub,
dili, tili va niyatlari bir xil insonlarning bir-biriga bo‘lgan shirin
munosabatini ko‘rib, ko‘nglingiz yayraydi. Bir-birini izzatlab umrguzaronlik
qilishadi.
Hududda fosforit xomashyosini chuqur qayta ishlashga ixtisoslashgan, 100
nafardan ortiq aholi ishlaydigan «Qizilqum fosforit» MCHJ tomonidan
mineral xomashyo chuqur qayta ishlanib, qishloq xo‘jaligi va sanoat korxonalari
uchun boyitilgan mineral mahsulot sanaladi.
Bundan tashqari, tumanda sement, yonuvchi slanets, fosforit va mineral
tuzlar kabi noruda zaxiralar mavjud bo‘lib, viloyat va respublika
sanoat korxonalarini xomashyo mahsulotlari bilan ta’minlab bormoqda.
Tuman boshqa hududlardan chorvachilik yo‘nalishi rivojlanganligi bilan
ajralib turadi. Misol uchun, tuyachilik yo‘nalishini olaylik, boshqa
hududlardagi fuqarolar tuya sutini iste’mol qilib,
o‘zining sog‘ligini tiklab bormoqda. Bu esa, o‘z navbatida, tibbiy
xizmatlarning rivojiga hamda insonlarning salomatligi tiklanishiga munosib
hissasini qo‘shmoqda.
Hududda eksport salohiyati rivojlanmoqda. Misol uchun, bundan besh yil
oldin birgina qorako‘l terisi eksport qilingan bo‘lsa, hozirda meva-sabzavotlar, gips, qayta
ishlangan jun, trikotaj materiallari eksportga chiqarilmoqda.
Muhimi, tuman hududining kattaligi, ovullarining olis-yaqinligi mutasaddilarning faoliyati shiddati, xalqchil islohotlarni amalga oshirishiga to‘sqin qilolmasligining guvohi bo‘ldik. Albatta, bularning zamirida tarqoq istiqomat qilayotgan konimexlarning o‘zaro ma’nan yaqinligi, madaniy birligi, samimiyligi va og‘izbirchiligi yotganini anglash qiyin emas.
NAVOIY VILOYATI
RAQAMLARDA
Viloyatning
ijtimoiy-iqtisodiy taraqqiyoti raqamlarda ham kuzatishimiz mumkin. Jumladan,
hisobot davrida yalpi hududiy mahsulot hajmi 105,5 foiz, sanoat mahsulotlari
ishlab chiqarish 105,3 foiz, xalq iste’mol mollari 106,9 foiz, qurilish-pudrat
ishlari 108,6 foiz, chakana savdo 111,9 foiz, jami xizmatlar 114,7 foizga
o‘sishi ta’minlandi.
Shuningdek, 3
244 ta yangi kichik biznes sub’ektlari tashkil etildi. Ularning asosiy qismi
Navoiy shahri (509 ta), Qiziltepa tumani (462 ta), Xatirchi tumani (389 ta) va
Karmana (380 ta) tumanlari hissasiga to‘g‘ri kelmoqda.
Davlatimiz
rahbarining «Tarmoqlar va hududlar o‘rtasida o‘zaro kooperatsiya bo‘lmas ekan,
qo‘shilgan qiymat zanjirini va yangi industrial taraqqiyotni tasavvur ham qilib
bo‘lmaydi», degan da’vatlari hudud taraqqiyotida o‘z isbotini topmoqda. Masalan,
joriy yilning 20-21 oktyabr kunlari hududiy tarmoqlararo sanoat yarmarkasi
tashkil etildi. Unda 1 613 ta, jumladan, 41 ta tarmoq va 1 572 ta hududiy
ishlab chiqarish korxonalari mahsulotlari, jumladan, tog‘-kon metallurgiya,
elektrotexnika, kimyo sanoati va qurilish materiallari sanoati mahsulotlari
namoyish etildi. Shuningdek, yarmarkada energetika, metallurgiya sohasi va
boshqa korxonalar ham o‘z mahsulotlari bilan ishtirok etgani ham
ilmiy-innovatsion rivojlanishdan darak beradi.
Umuman, Navoiy
viloyati mavjud cheksiz imkoniyatlari va ulkan istiqbollari bilan
mamlakatimizda munosib o‘rniga ega. Misol uchun, joriy yilning 9 oyligida yalpi
hududiy mahsulot ishlab chiqarish bo‘yicha respublikaning 7,9 foiz va sanoat
mahsulotlari bo‘yicha 16 foizini tashkil etgani holda har ikki ko‘rsatkichda
ham uchinchi o‘rinni egallab
turibdi.
MA’NAVIY EHTIYOJ: «HAR HAFTADA BITTA KITOB O‘QIYMIZ»
Kitob — beminnat ustoz, bilim va ma’naviy yuksalishga erishishning eng
asosiy manbai
Alisher Navoiy
Konimex tumaniga biriktirilgan Yoshlar ittifoqi viloyat Kengashi
raisi Tohir Abdurahmonov viloyatda
kitob mutolaasi tizimi yo‘lga qo‘yilganligi, bu «Har haftada bitta kitob mutolaa qilamiz» intellektual tanlovi deb nomlanganligini
aytib qoldi.
"Kitobxonlik tanlovi viloyatimizdagi barcha tuman va shaharlarda
har haftaning chorshanba, payshanba hamda juma kunlari e’lon qilingan bitta
kitob muhokamasiga bag‘ishlab tizimli ravishda o‘tkazib kelinmoqda. Kitob
mutolaasi, asarlar mazmun-mohiyatini anglash insonni komil, zukko, teran
tafakkur sohibiga aylantirishi, shubhasizdir", deydi u.
MUZEYLAR XALQ
TARIXIDAN SO‘ZLAYDI
«Ma’naviyat karvon»ining ziyolilari tarixiy qadamjolar,
ziyoratgohlar, muzeylarga tashrif buyurdi. Jumladan, viloyatdagi «Qatag‘on qurbonlari
xotirasi» muzeyiga sayohat o‘zgacha bo‘ldi.
– Ushbu muzey Prezidentimiz topshirig‘i bilan tashkil qilingan
bo‘lib, viloyatimiz ahlining yaqin 150 yillik og‘ir va zalvorli tarixini o‘z
ichiga olgan. Ayniqsa, muzey ekspozitsiyalarida aks etgan yurtdoshlarimizning
taqdiri,surgun va siyosiy qatag‘onlarga duchor qilinganlarning hayoti va
qismati aks etgan lavhalar kishini o‘ylantiradi. 2020 yilda ishchi
guruhimiz bilan birgalikda Navoiy viloyatining Nurota, Karmana,
Xatirchi, Qiziltepa tuman davlat arxivlarida saqlanayotgan hujjatlar asosida
4000 dan ortiq qatag‘on qilingan vatandoshlarni nomma-nom aniqlashga
muvaffaq bo‘ldik, – deydi muzey direktori,
dotsent Xurshid Qurbonov.
Darhaqiqat, muzeylar xalq tarixidan so‘zlab, u elning asrlar davomida
qo‘lga kiritgan yutuqlari, ilm-ma’rifatga qo‘shgan hissasi haqida ma’lumot
beradi, ko‘rgazmali, ishonchli, ilmiy asoslar bilan insoniyatga ma’naviyat
ruhini tarqatadi.
SO‘NGGI SO‘Z
O‘RNIDA
Umidim shulki, umidingga yetgaysan
Alisher Navoiy
bugungi islohotlarimizning tag-zamini «Inson qadri uchun» degan
ustuvor tamoyilga tayanadi. Darhaqiqat, jahon minbarlarida ilgari surilayotgan
xalqaro, mintaqaviy va milliy tashabbuslar, bularning barchasi Yangi
O‘zbekistonning islohotlar yo‘li to‘g‘ri tanlanganidan dalolat beradi. Zotan,
Ma’naviyat karvonining ezgu maqsadi ham ma’rifatli jamiyatni bunyod etishda
beminnat ziyo ulashishdir...
Obiddin MAHMUDOV,
Respublika ma’rifat targ‘ibotchilari a’zosi