- Bosh sahifa
- Maslahatchi minbari
- ODDIY LUG‘ATDAN MILLIY TIL KORPUSIGACHA
ODDIY LUG‘ATDAN MILLIY TIL KORPUSIGACHA
Til — millat ko‘zgusi
Davlatimiz rahbarining 21-oktabr – O‘zbek tili bayrami
kuni munosabati bilan mamlakatimiz xalqiga yo‘llagan tabrigida
taʼkidlanganidek, oxirgi uch yilda o‘zbek tilining davlat tili sifatida
rivojlanishi, jamiyatimizda keng qo‘llanishi va ilm-fan sifatida taraqqiy
etishida 2020-2030-yillarga mo‘ljallangan davlat tilini rivojlantirish va til
siyosatini takomillashtirish konsepsiyasining qabul qilinganligi alohida
ahamiyat kasb etmoqda.
Ayniqsa, tilimizning sofligini saqlash, uning lug‘at
boyligini oshirish va taraqqiy ettirish borasida muhim natijalarga
erishilmoqda. Bugungi kunda oddiy lug‘atdan tortib milliy til korpusini
yaratishgacha jarayonlarda olib borilayotgan saʼy-harakatlar natijasida davlat tilining
zamonaviy axborot texnologiyalari va kommunikatsiyalariga integratsiyalashuvi
taʼminlanmoqda.
O‘tgan qisqa davr mobaynida mutaxassislar tomonidan
izohli, o‘quv va turli sohaga oid terminologik lug‘atlarning yaratilishi
borasida katta qadam tashlandi. Jumladan, ijtimoiy-siyosiy terminlarning
qisqacha izohli lug‘ati, bank-moliya terminlarining izohli lug‘ati, xalqaro
munosabatlarga oid terminlarning izohli-illyustrativ lug‘ati, jismoniy tarbiya
va sport atamalarining izohli lug‘ati, o‘zbek raqsi terminlarining izohli
lug‘ati, tashkilot, korxona va muassasa nomlarining izohli-tavsifiy lug‘ati,
korpus lingvistikasi atamalarining qisqacha izohli lug‘atlari yaratildi.
Yana bir quvonarli holat, uch ming
yillik tarixga ega o‘zbek tiliga oid barcha ilmiy, nazariy va amaliy
maʼlumotlarni o‘zida jamlagan elektron ko‘rinishdagi o‘zbek tili milliy
korpusini yaratish ustida amaliy ishlar olib borilmoqda. Buning zamirida o‘zbek
tili korpusini internet tizimida joylashtirish orqali ona tilimizni internet
tiliga aylantirish, dunyoning global tillari qatoriga olib chiqishdek buyuk
maqsad mujassam. Zotan, hozirgi axborot asrida milliy til korpusining
yaratilishi o‘sha tilning yashab qolishini taʼminlovchi muhim omil sanalmoqda.
Agar dunyo tan olgan tillarning rivojlanishiga eʼtibor
bersak, baʼzi tillar bundan yarim-bir asr oldin o‘z milliy til korpuslarini
yaratganlar. Ular mukammallik darajasi va matnni ilmiy qayta ishlash imkoniyati
bilan farq qiluvchi o‘zining milliy korpusiga ega. Hozirda internet tizimida
faoliyatda bo‘lgan 70 yaqin til korpuslari, jumladan, ingliz, ispan, xitoy,
arab, fransuz, rus, nemis, polyak, polyak-ukrain, chex, slovak, serb, xorvat,
bosniya, bolgar, bolgar-rus, makedon, shotland, niderland, niderland-fransuz,
shved, norveg, island, italyan, portugal, rumin, litva, latish, grek, alban,
hind, fin, ural tillari, eston, venger, udmurt, gruzin, ingliz-gruzin, lazgin,
turk, tatar, tojik, boshqird, qrim-tatar, qalmiq, yapon tillarning korpuslari
yaratilganligi haqidagi maʼlumotlar mavjud.
Bugungi kunda Yevropa tillarining (ispan, italyan,
xorvat) milliy korpuslari tobora takomillashib bormoqda. Masalan, Chexiyada
millionlab so‘z va so‘z shakllarini o‘z ichiga olgan chex milliy Korpusidan
2000-yildan beri foydalanib kelinadi.
Til korpusining oddiy lug‘at yoki elektron
kutubxonadan ajratib turadigan jihati, undan bir so‘zning qo‘llanadigan barcha
sohalari va u haqidagi maʼlumotlarni qisqa muddat ichida amaliy misollari bilan
topish imkoniyatining berilishidir. Bunda nafaqat vaqt tejaladi, balki har bir mutaxassislik
uchun eng kerakli maʼlumotlarni tezda saralash imkoniyati yaratiladi.
Til korpusi hajm jihatdan juda katta bo‘lib, u
o‘rtacha 100 millionlab so‘zlarning qo‘llanish holatini qamrab oladi, tilning
turli davrda mavjud bo‘lgan barcha turdagi ilmiy, rasmiy, publitsistik, badiiy
matn namunalarini o‘zida jamlaydi. Hattoki, turli mavzudagi gazeta va jurnallar
materiallari, fanning barcha sohasiga tegishli ilmiy, ilmiy-ommabop asarlar,
reklama, shaxsiy yozishmalar matnini ham korpusdan topish mumkin.
Milliy til korpusini yaratish ustida ish olib
borayotgan tilshunos olimlarimiz shu kungacha yaratilgan mavjud til korpuslarni
tahlil qilish, ilmiy-tadqiqot ishlarini o‘rganish, o‘zbek tili milliy korpusini
loyihalash, o‘zbek tili matnlarini qayta ishlash, o‘zbek tili milliy korpusini
shakllantiruvchi dasturiy taʼminot yaratish va uni sinovdan o‘tkazish, korpus
asosida tilshunoslik tadqiqotlari uchun dasturiy vositalar ishlab chiqish,
saylanma matnlar asosida kichik korpuslar yaratish kabi vazifalar ustida tinimsiz
ish olib bormoqdalar.
Bugun jahon hamjamiyatida elektron o‘quv lug‘atlar
bilan birga milliy til korpuslaridan foydalanish ko‘nikmasining ortib
borayotganligi bejiz emas. Shunday ekan, global va integratsiyalashgan dunyoda
o‘zbek tilining milliy korpusini takomillashtirish va qamrovini kengaytirib
borish tilimiz nufuzi va maqomini oshirishning, taraqqiyotga erishishining
garovidir.
Odina JAMOLDINOVA,
Oliy va o‘rta maxsus taʼlim vaziri maslahatchisi