- Bosh sahifa
- Maslahatchi minbari
- YAXSHIGA EL DIL OCHAR yoxud “mahallabay” ishlash tizimi yangi bosqichda
YAXSHIGA EL DIL OCHAR yoxud “mahallabay” ishlash tizimi yangi bosqichda
Inson qadri uchun
Odamlarni ertaga emas, bugun rozi qilish tamoyiliga
asoslangan islohotlar tobora jadallashmoqda. Bu jarayonda mahallalardagi hokim
yordamchilari ham tobora muhim rol o‘ynayotir.
Hokim yordamchilari dastlab “xalq ichiga kirish”,
“ularning dardiga quloq solish”, “g‘amu anduhlari, tashvishlariga sherik
bo‘lish” va “muammolarni joyida hal etish” tamoyillari asosida mahalla hududida
yashovchi har bir oilani xatlovdan o‘tkazish orqali ishsiz aholi ro‘yxatini shakllantirdilar.
O‘z hududlaridagi bo‘sh binolar, foydalanilmayotgan obʼektlar va yerlar
to‘g‘risidagi maʼlumotlarga aniqlik kiritdilar. Ularning tavsiyalari asosida
o‘sha joylar foydalanishga berildi, tadbirkorlik yo‘lga qo‘yildi, qo‘shimcha
ishchi o‘rinlari yaratildi.
Buning samarasi o‘laroq, biri ikki bo‘lmayotgan,
topgan daromadini yeyish-ichishdan orttira olmayotgan kishilarning yer va mulk
egasiga, tadbirkor, kasb egasiga aylangani, davlatga ishonchi ortdi. Mahallalarda
hokim yordamchisi ko‘magi va beg‘araz yordami tufayli hayotda o‘z yo‘lini topib
ketganlar soni ortib borayotgani ham bor gap.
“Mahallabay” ishlash, tadbirkorlikni rivojlantirish,
ish o‘rinlarini yaratish orqali kambag‘allikni qisqartirish borasida Farg‘ona
viloyatining Bag‘dod tumanida amalga oshirilayotgan ishlarni o‘rganish
jarayonida bunga yana bir bor amin bo‘ldik. Harakatlar zoye ketmayotgani
odamlarning xursandlik va quvonch ufurib turgan samimiy so‘zlari va nigohlarida
aks etayotir.
O‘ziga yuklatilgan vazifani sidqidildan, vijdonan
bajarayotgan “Bog‘ishamol” MFYdagi hokim yordamchisi Qobiljon Qo‘ldoshevning
faoliyati yuqoridagi so‘zlarimizga isbotdir.
Qobiljonning tavsiyasiga ko‘ra, MFYdagi Qo‘rg‘oncha
ko‘chasida yashovchi tug‘ma nogironligi (kar-soqov) bo‘lgan O‘rinboy Olimov va
Mavluda Jabborova xonadoniga subsidiya orqali zamonaviy tikuv mashinasi
ajratilgan. Bugungi kunda ular o‘z xonadonida sifatli bosh kiyimlar tikmoqda.
Hozir mavsum bo‘lgani sabab qo‘llari qo‘llariga tegmaydi.
Ular kamtarona va halol mehnati orqali 3 farzandni
katta qilmoqda. Ota-ona kar-soqov bo‘lsa-da, farzandlarning uchalasi ham
sog‘lom voyaga yetmoqda. Ilgari qo‘lda sanoqli bosh kiyimlar tikib, kun ko‘rgan
bo‘lsalar, tikuv mashinalik bo‘lganlaridan keyin mahsulotlari sifati va soni
keskin oshgan. Homiylik tariqasida ularga yana bitta zamonaviy tikuv mashinasi
berilgani esa nur ustiga aʼlo nur bo‘ldi.
Endi Mavludaxon o‘ziga shogird ham olib, yoshlarga
hunar o‘rgatish va ishlab chiqarishni ko‘paytirishni maqsad qilib qo‘ydi.
Bundan tashqari, joriy yil oktabr oyida ekin-tikin uchun oilaga 0,15 gektar
sug‘oriladigan yer ajratilgan. Yerga bahorgi kartoshka ekish rejalanib,
kartoshka urug‘i ham olib qo‘yilgan.
Xonadonning katta qizi Madinaxon katta bo‘lganida
surdotarjimon kasbini egallab, ota-onasiga xizmat qilishi hamda kar-soqovlarni
o‘qitishga o‘zini bag‘ishlashini bildirdi.
Viloyatning Bag‘dod, Buvayda, Oltiariq, Rishton va
So‘x tumanlarida hokim yordamchilari faoliyati bilan tanishib, Qobiljon kabi
fidoyi yoshlar ko‘pligiga to‘liq ishonch hosil qildik.
Hokim yordamchilari faoliyati yo‘lga qo‘yilishi bilan
aholimiz orasidagi boriga shukr qilib yashayotgan andishali, yuz-xotirli, talay
muammolari bo‘lsa-da, ularni oilasidan tashqariga chiqarishdan tortinib yurgan,
ammo qo‘shimcha daromad topish, yashash sharoitini yaxshilashga umidi bo‘lgan
kishilar xonadonbay so‘rovnomalar orqali aniqlandi.
Hokim yordamchilari fuqaroning sharoitini bevosita
uning xonadoniga borib o‘rganadi, moddiy va maʼnaviy imkoniyatlari bilan joyida
tanishadi. Bu esa vaziyat va masalaning yechimi yuzasidan haqqoniy va to‘g‘ri
xulosa qilishga zamin yaratadi.
Bugun hokim yordamchilari ko‘magi bilan mahallaning
o‘zida tikuvchilik, hunarmandlik, dehqonchilik kooperatsiyalari tashkil
etilmoqda. Ishlarni tashkil qilish jarayonlari muntazam monitoring qilib
borilmoqda. Subsidiya orqali tadbirkorlikni boshlagan shaxslarning xomashyo,
aylanma mablag‘larga bo‘lgan ehtiyojlari imkon darajasida qondirilmoqda.
Hech qaysi mahallada kambag‘allikka olib keladigan
sabab yoki omillar mavjud emas. Biroq aholining tadbirkorlik, omilkorlik,
moliyaviy imtiyozlar va kreditlardan foydalanish borasidagi huquqiy
savodxonligi yetishmayotgani yaqqol ko‘zga tashlanmoqda. Quvonarlisi, ana shu
bo‘shliqni to‘ldirishda ham hokim yordamchilari kamarbasta.
Hokim yordamchilari va masʼullar islohotlarning
oldingi safida ekani ular zimmasidagi masʼuliyat va javobgarlik zalvorini
oshiradi.
Habibulla AZIZOV,
Davlat bojxona qo‘mitasi raisi maslahatchisi, bojxona
xizmati polkovnigi