- Bosh sahifa
- Maslahatchi minbari
- MILLIY OʻZLIGIMIZ TIMSOLI, MAʼNAVIYATIMIZ ASOSI BOʻLGAN ONA TILIMIZGA EʼTIBOR YANADA KUCHAYTIRILADI
MILLIY OʻZLIGIMIZ TIMSOLI, MAʼNAVIYATIMIZ ASOSI BOʻLGAN ONA TILIMIZGA EʼTIBOR YANADA KUCHAYTIRILADI
Soʻnggi yillarda yaxshi bir anʼanaga guvoh boʻlyapmiz. Yaʼni yangi yil
boshlanishidan avval Prezident Sh.M.Mirziyoyevning Oliy Majlis va xalqimizga
Murojaatnomasi eʼlon qilinadi. Ushbu Murojaatnomada tugayotgan yil sarhisobi,
asosiysi kelgusi yilda rejalashtirilayotgan masalalar, sohalar rivoji haqidagi
rejalar eʼlon qilinadi. Shu bois ham ushbu murojaatnomani koʻpchilik intiq
kutishadi.
Kuni kecha boʻlib oʻtgan Murojaatnomada Prezidentimiz 2023-yilga yurtimizda
“Insonga eʼtibor va sifatli taʼlim yili” deb nom berishni taklif qildi. Davlatimiz rahbari taʼkidlaganlaridek, “Najot – taʼlimda,
najot – tarbiyada,
najot – bilimda.
Chunki, barcha ezgu maqsadlarga bilim va tarbiya tufayli erishiladi”. Barcha rivojlanishlarning asosi taʼlimdan boshlanadi.
Murojaatnomada davlatimiz rahbarining “Milliy oʻzligimiz timsoli,
maʼnaviyatimiz asosi boʻlgan ona tilimizga eʼtibor yanada kuchaytiriladi.
Albatta, chet tilini bilish-zamon talabi. Ammo ona tilini bilishni majbur
qilish kerak”, degan
soʻzlari biz – davlat tili boʻyicha rahbar
maslahatchilarini hayajonga solgan eng muhim soʻzlar boʻldi.
Soʻngi yillarda davlat
tilining nufuzini oshirish uchun bir qancha Farmonlar va Qarorlar qabul
qilindi. Oʻzbekiston Respublikasi Vazirlar Mahkamasining 2021-yil 10-fevraldagi
“Lotin yozuviga asoslangan oʻzbek alifbosiga
bosqichma-bosqich toʻliq oʻtishni taʼminlash chora-tadbirlari toʻgʻrisida”gi 61-sonli qarori ijrosi yuzasidan bugungi kunga kelib deyarli barcha
vazirlik va idoralarda ish yuritish lotin alifbosida tashkil etilmoqda. Qolgan
tashkilotlar ham 2023-yilgacha lotin alifbosiga oʻtishi rejalashtirilgan.
Shu oʻrinda taʼkidlash
kerakki, 2022-yilda Monopoliyaga qarshi kurashish qoʻmitasi huzuridagi
Isteʼmolchilar huquqlarini himoya qilish agentligi tomonidan “Reklama toʻgʻrisida”gi Oʻzbekiston Respublikasi Qonunning yangi tahrirdagi
loyihasi ishlab chiqilgan boʻlib, Mazkur Qonun joriy yilning 7-iyun sanasida
qabul qilindi. Ushbu yangi tahrirdagi Qonunda, Oʻzbekiston Respublikasi
hududida reklamani tarqatish (joylashtirish) tiliga oid alohida normalar
kiritilgan. Jumladan, Oʻzbekiston Respublikasi hududida reklama
Oʻzbekiston Respublikasining davlat tilida tarqatilishi va qoʻshimcha ravishda
boshqa tillarda takrorlanishi mumkin.
Qonun ijrosi yuzasidan
Isteʼmolchilar huquqlarini himoya qilish agentligi tomonidan tashqi reklama va
axborot obyektlaridagi (konstruksiyalaridagi) reklamalarning davlat tilida
boʻlishini taʼminlash, tashqi yozuv va boshqa axborot matnlarining qonunchilik
hujjatlari talablariga muvofiqligi yuzasidan oʻrganishlar oʻtkazilgan.
Xususan, respublika
hududlarida joylashtirilgan jami 39 215 ta tashqi reklama va axborot
obyektlari (konstruksiyalari) xatlovdan oʻtkazildi.
Xatlov davomida, 11 555 ta
tashqi reklama va axborot obyektlarida (konstruksiyalarida) joylashtirilgan
reklamalarda turli kamchiliklar aniqlangan. Shundan 9 139 ta holatda
tashqi reklama obyektlari orqali joylashtirilgan reklamaning matni boshqa
tillarda (asosan rus tilida) berilganligi kuzatildi.
Shuningdek, 2 416 ta
reklama vositalari orqali joylashtirilgan reklama va eʼlonlar matni imloviy va
lugʻaviy xatolar bilan berilganligi aniqlandi.
Shu oʻrinda, aniqlangan
kamchiliklarni bartaraf etish maqsadida, tadbirkorlik subyektlariga, reklama tarqatuvchilarga tushuntirish va
targʻibot-tashviqot ishlari olib borilib, ularga tashqi reklama orqali
joylashtirilgan reklama matni davlat tilida boʻlishini taʼminlash yuzasidan
tushuntirishlar berildi.
Muhtaram Prezidentimiz aytganidek: “Oʻzbek
tili xalqimiz uchun milliy oʻzligimiz va mustaqil davlatchilik timsoli, bebaho
maʼnaviy boylik, buyuk qadriyatdir”. Uni
asrab-avaylash, rivojlantirishga har birimiz masʼulmiz.
QODIROVA Goʻzal Toshkenboyevna Monopoliyaga qarshi kurashish qoʻmitasi raisining
maʼnaviy-maʼrifiy ishlar samaradorligini oshirish, davlat tili toʻgʻrisidagi
qonun hujjatlariga rioya etilishini taʼminlash masalalari boʻyicha
maslahatchisi