- Bosh sahifa
- Maslahatchi minbari
- O‘zbek tili bayrami kuniga bag‘ishlandi
O‘zbek tili bayrami kuniga bag‘ishlandi
Favqulodda vaziyatlar vazirligi markaziy
apparatida tashkil qilingan navbatdagi ma'naviyat va ma'rifat mashg‘uloti 21-oktabr – O‘zbek tili bayrami kuniga
bag‘ishlandi.
Tadbir karantin talablariga asosan ijtimoiy masofani saqlagan holda o‘tkazildi.
Mashg‘ulotni vazir maslahatchisi Bahodir Valiyev olib borib, o‘z so‘zida
bugungi kunda davlat tili nufuzi va maqomini oshirish borasida mamlakatimizda
amalga oshirilayotgan tarixiy ishlar mazmuniga qisqacha to‘xtalib o‘tdi.
Shundan so‘ng O‘zbekiston xalqaro islom akademiyasi bo‘lim boshlig‘i falsafa
fanlari bo‘yicha falsafa doktori Munira Qahhorova “Ona tili va ma'naviyat”
mavzusida ma'ruza qildi.
Ma'ruzachi ona tili haqida fikr yuritar ekan, uning ma'naviyat tushunchasi
bilan uzviy bog‘liq ekanligini alohida qayd etdi. Ma'naviyat va til har bir
xalq, jamiyat, davlat uchun hayot-mamot masalasi kabi muhimligini tarixiy,
hayotiy misollar asosida sharhladi. O‘z navbatida, barchani ona tilini
qadrlash, uning rivojlanishiga faol hissa qo‘shishga chaqirdi.
Shuningdek, mashg‘ulotda O‘zbekiston Respublikasi Vazirlar Mahkamasining Davlat
tilini rivojlantirish departamenti va hamkor tashkilot hamda muassasalar
tomonidan nashrdan chiqarilgan “O‘zbek tilining izohli lug‘ati”, “Davlat tilida
ish yuritish” kitoblariga alohida urg‘u berilib, ushbu manbalarning davlat
tilida ish yuritishdagi ahamiyati xususida fikr bildirildi.
Tadbir so‘ngida ishtirokchilar o‘zlarining qiziqtirgan savollariga
ma'ruzachilardan atroflicha javoblar oldilar.
Bahodir Valiyev,
Favqulodda vaziyatlar vazirining maslahatchisi