- Bosh sahifa
- Maslahatchi minbari
- ONA TILINI BILISH – O‘ZLIKNI ANGLASH
ONA TILINI BILISH – O‘ZLIKNI ANGLASH
Tanqid – achchiq, mevasi – shirin
Ochig‘ini aytish kerak, navbatdagi
yig‘ilish o‘ziga xos bo‘ldi. U tanqidiy-tahliliy ruhda o‘tgan bo‘lsada, zalda
ko‘tarinkilik kayfiyati hukmron edi. To‘g‘rida, davlat tilini rivojlantirish
borasida bundan bor-yo‘g‘i 3-4 yil oldin butun boshli mamlakatda bajarilishi u
yoqda tursin, hatto xayolga ham kelmagan ishlar, mana bir yil davomida faol
amalga oshirib kelinmoqda.
Ha, Alisher Navoiy nomidagi Toshkent
davlat o‘zbek tili va adabiyoti universitetida vazirlik, idora va xo‘jalik
birlashmalari rahbarlarining maʼnaviy-maʼrifiy ishlar samaradorligini
oshirish, davlat tili to‘g‘risidagi qonun hujjatlariga rioya etilishini
taʼminlash masalalari bo‘yicha maslahatchilari faoliyati tahliliga
bag‘ishlangan yig‘ilish mana shunday muhitda o‘tdi.
Unda maslahatchilarning 2020-yilning o‘tgan davridagi faoliyatiga
tahliliy-tanqidiy baho berildi. Rasmiyatchilik bir tomonga surib qo‘yilib, yo‘l
qo‘yilgan kamchiliklarni bartaraf etish borasida aniq takliflar berildi. Mavzu
yuzasidan qolgan boshqa masalalar ham atroflicha tahlil etildi. Shu bilan
birga, zamon talablaridan kelib chiqib o‘zaro hamkorlikda faoliyat yuritish
lozimligiga ham eʼtibor qaratildi.
“Aqlli munosabatlar” ko‘pgina chalg‘ishlarning
oldini oladi
Biz bugun globallashuv jarayonlari,
tezkor axborot xurujlari davrida yashayapmiz. Bunday murakkab vaziyat har
birimizdan zukkolik, ogohlik, “oq”ni “qora”dan ajratadigan mustaqil fikrga ega
bo‘lishni taqozo etadi. Shu maʼnoda bugungi virtual olamda ayrim noxolis
yoritilayotgan xabarlar, ijtimoiy tarmoqlarda turli asossiz yoxud aholini
chalg‘itish maqsadida maxsus tashlab qo‘yiladigan “munosabat”larga qarshi
asosli, daqiq, to‘laqonli, boshqacha aytganda, “aqlli munosabat” bildirish
zarur. Tadbirda bunday holatlarda tegishli vazirlik, idora va tashkilotlar
asoslantirilgan tezkor munosabatlarni bildirishda yaqindan hamkor bo‘lishga
chaqirildi.
Vatan ostonadan boshlanadi
Har bir mamlakatga tashrif buyurgan
sayyohning ushbu diyor to‘g‘risidagi ilk taassuroti aeroportdan, temir yo‘l
vokzali, umuman, ushbu davlat hududi chegarasiga kiraverishdagi ostonadan
boshlanadi. Shu nuqtai nazardan, majlisda rejali tekshiruv amalga oshirilgan
bir qator tashkilotlar, jumladan, “O‘zbekiston havo yo‘llari”, “O‘zbekiston
temir yo‘llari” tizimida davlat tilining joriy etilishi talab darajasida
emasligi misollar orqali asoslantirildi. Mazkur tashkilotlarda ahvolni
o‘zgartirish yuzasidan tegishli topshiriqlar berildi.
“Birgina Toshkent shahrida osig‘liq
reklamalarning 70 foizi boshqa tillarda yozilgandan keyin nima ham deyish
mumkin. Tasavvur qiling, siz Buyuk Britaniyaga bordingiz-u, u yerdagi barcha
yozuvlar nemis tilida bo‘lsa, qayerga kelib qoldim, deb ajablanmaysizmi?! Bizda
qayoqqa qaramang, peshlavhalarning aksariyati ajnabiy tillarda. Bu nima degani,
buni qanday tushunish mumkin”, dedi Vazirlar Mahkamasi Davlat tilini rivojlantirish deparatmenti
mudiri Abdug‘affor Qirg‘izboyev majlisda mazkur masalalar yuzasidan qilgan
maʼruzasida.
Shubhasiz, ota-bobolarimiz yaqin
o‘tmishda o‘z ona tilida ish yurita olmay, erkin fikr bildira olmay, bir umr
armonda yashab o‘tdilar. Axir, bugun ularning tarixiy orzulari ushalgan
davrda umrguzaronlik qilyapmiz.
Mustaqil
O‘zbekiston tarixida Prezidentimizning ilk marotaba BMT minbarida sof o‘zbek
tilida nutq so‘zlashi tom maʼnodagi siyosiy jasorat va haqiqiy vatanparvarlikdir.
Buni butun turkiy tilli
davlatlar ommaviy axborot vositalarida bildirilgan munosabatlar ham tasdiqlab
turibdi.
Ona tilimizga eʼtibor – davlat siyosati
darajasida
Bugun ona tilimizga va uning mavqeyini
oshirish masalalariga eʼtibor kuchaygan. “O‘zbek tili bayrami kunini belgilash
to‘g‘risida”gi qonun va boshqa qator meʼyoriy hujjatlar orqali ham yurtimizda
o‘zbek tilining davlat tili sifatidagi mavqeyi tobora mustahkamlanmoqda.
Xususan, ona tilimizning xalqimiz hayotida va xalqaro miqyosda nufuzini
oshirish, yoshlarimizni vatanparvarlik, milliy anʼana va qadriyatlarga sadoqat
ruhida kamol toptirishga qaratilgan ustuvor vazifalar va strategik yo‘nalishlar
belgilanishi shular jumlasidandir. Zero, Prezidentimizning: “Ona tilimiz –
milliy maʼnaviyatimizning bitmas-tuganmas bulog‘idir. Shunday ekan, unga
munosib hurmat va ehtirom ko‘rsatish barchamizning nafaqat vazifamiz, balki
muqaddas insoniy burchimizdir”, degan so‘zlari har birimiz uchun dasturilamal
bo‘lishi kerak.
Maslahatchi xulq-atvori (fitrati)da talab
etiladigan to‘rt fazilat
Hozirgi buyuk evrilishlar
silsilasida bu ishlarga bevosita daxldor bo‘lgan biz, maslahatchilarning
zimmasiga yuklanadigan vazifa ham o‘ta masʼuliyatlidir. Bunda, albatta, har bir
maslahatchidan kerakli bilim-malaka, go‘zal odob, intiluvchanlik, fidoyilik
singari zaruriy fazilatlarga ega bo‘lish talab etiladi.
Ushbularni nazarda tutgan holda
majlisda kelgusidagi samarali faoliyat yuritishlari uchun maslahatchilarda
to‘rtta asosiy fazilat bo‘lishi lozimligi alohida taʼkidlandi. Yaʼni
maslahatchi, avvalambor, o‘z fikrini to‘g‘ri, aniq, lo‘nda tushuntirib bera
oladigan notiq, keng mushohadaga asoslangan fikrlarini bayon qila oladigan
o‘tkir qalam sohibi, tabiatan kuchli tashkilotchi va jamoani ortidan ergashtira
oladigan lider hamda jamoada obro‘li, o‘z mustaqil fikriga, hamkasblar
hurmatiga sazovor inson bo‘lishi lozim. Asosiysi, bu vazifada ishlaydigan kishi
o‘z yurti, millati, tilini jonu dildan sevadigan, jonkuyar, ijtimoiy faol,
irodasi kuchli shaxs bo‘lishi zarur. Ana shundagina bunday maslahatchiga
suyangan holda belgilangan zalvorli vazifalarni talab darajasida bajara olish
mumkin.
Taraqqiyot raqobat demakdir
Bugun globallashuv, texnika
taraqqiyoti shunchalik jadal rivoj topmoqdaki, oqibatda dunyoda mavjud (statistik
maʼlumotlarga qaraganda, taxminan yetti mingdan ziyod) tillardan
aksariyati bir-biriga qo‘shilib, birikib yoki asta-sekin yo‘q bo‘lib ketish
arafasida turibdi.
Dunyodagi yetti mingdan ziyod tildan
14 tasida bashariyatning uchdan ikki qismi gaplashadi. Bu tillarning har birida
so‘zlashadiganlar soni esa 50 milliondan ziyod. Dunyodagi 70 tilda
gaplashadiganlar 5 milliondan ko‘p bo‘lsa, qolgan tillarda muloqot qiladiganlar
1 milliondan kam.
Vaholanki, YUNESKO tomonidan eʼlon
qilingan “Yo‘qolish arafasida turgan dunyo tillarining atlasi”da
taʼkidlanishicha, Yevropadagi 50 ta, Tinch okeani mintaqasidagi 2000 ta, Afrika
qitʼasidagi 250 ta til halokat yoqasida turibdi. Asrimiz oxiriga borib hozir
mavjud bo‘lgan tillarning teng yarmi yo‘qolib ketishi mumkinligi taxmin
qilinmoqda. Bunday vaziyat esa, o‘z navbatida, biz – o‘zbeklar va o‘zbek tilida
so‘zlashadigan insonlar zimmasiga zalvorli vazifalarni yuklashi tayin.
Shu maʼnoda, avvalo o‘zimiz, yaʼni
shu masalaga mutasaddilar ona tilimiz qonun-qoidalarini puxta o‘zlashtirsak va
tilimizning qon tomirimizdek bizga yaqinligini teran anglasakkina, uni
boshqalar ham hurmat qila boshlaydi, bilishga qiziqadiganlar ko‘payadi.
Qarabsizki, asta-sekin tilimiz mavqeyi boshqa millat va elatlar nazarida ham
ortib boradi.
Yig‘ilish so‘nggida o‘zaro
savol-javoblar bo‘lib o‘tdi, takliflar bildirildi, maslahatchilarning o‘z
faoliyatida foydalanishlari uchun qo‘llanma tarqatildi.
Xulosa o‘rnida
Biz o‘zbeklar ko‘p ming yillik
tiriklik sinovidan o‘tgan, tili, madaniyati, sanʼati asrlar osha sayqallangan
va boshqalarga ibrat bo‘la oladigan bunyodkor xalq sifatida bugun yurtimizga
intilayotgan dunyoni munosib qarshilashimiz lozim.
Demak, ona
tilimiz va ushbu moʻtabar, latif tilda so‘zlashuvimiz bizga o‘zligimizni
ifodalashga asos bo‘larkan, bu talato‘p jarayonlarda o‘z tilimizni
asrab-avaylashimiz, uning takomillashuvi yo‘lida fidoyilarcha mehnat
qilishimizni zaruriyat qilib qo‘ymoqda. Bu zaruriyat o‘zbekistonlikning
muqaddas vazifasiga aylangandagina, o‘z mevasini bera boshlaydi.
Obiddin MAHMUDOV,
Iqtisodiy taraqqiyot va kambag‘allikni
qisqartirish
vazirining maslahatchisi