- Bosh sahifa
- Maslahatchi minbari
- “O‘Z TILIGA SADOQAT, BU – VATANIY ISHDIR”
“O‘Z TILIGA SADOQAT, BU – VATANIY ISHDIR”
Til – buyuk neʼmat. U millatning mavjudligi, g‘ururi
va o‘ziga xosligini ifodalaydi. Shunday ekan, har bir inson o‘z tilini bilishi,
uni ulug‘lashi va shu bilan birga boshqa xalqlarning tilini ham hurmat qilishi,
imkon qadar o‘rganishi foydadan xoli emas. Bu turli xalqlar o‘rtasidagi
munosabatlarni mustahkamlashi barobarida tilning nufuzi va mavqeyini oshirishga
xizmat qilishi tabiiy. Til tarixi va tuzilishini xalqning rivojlanish tarixi va
milliy o‘ziga xosligidan ayri holda o‘rganib bo‘lmaydi. Chunki har bir xalq
tilida millat o‘tmishi, asriy qadriyatlari, madaniyati o‘z ifodasini topadi.
Turkiy tilni ilk bor garammatik nuqtayi nazardan tadqiq etgan alloma bobomiz
Mahmud Qoshg‘ariy “Devonu lug‘otit turk” asarida “Erdam boshi
tildir”, yaʼni “Barcha fazilatlar, ezguliklar tildan boshlanadi”, deb
taʼkidlaydi.
Buyuk
maʼrifatparvar bobomiz Abdulla Avloniy har bir xalqning nufuzi va dunyodagi
o‘rni uning ona tilisini nechog‘lik qadrlashiga bog‘liq deya taʼrif beradi. Yaʼni, “Har bir
millatning dunyoda borlig‘ini ko‘rsatadurgan oyinai hayoti til va adabiyotidur.
Milliy tilni yo‘qotmak millatning ruhini yo‘qotmakdur”, deya eʼtirof etadi.
Zero, inson qalbidagi jamiki ezgu fazilatlar, avvalo, ona allasi, ona tilining
betakror jozibasi bilan singishi haqiqat.
Shu nuqtaуi nazardan, O‘zbekiston davlat mustaqilligini
qo‘lga kiritishida 1989-yilning 21-oktabrida “Davlat tili haqida”gi Qonunning
qabul qilinishi asnosida O‘zbek tiliga davlat tili maqomi berilgani muhim
ahamiyat kasb etgani maʼlum. Binobarin, hali sobiq Ittifoqning totalitar
hukmronligi so‘nmay turgan bir kezda bu xalqimizni tom maʼnoda jipslashtirib,
o‘z haq-huquqi va erki yo‘lida kurashga ruhlantirgani, shubhasiz. Istiqlolga
erishgach, Bosh Qomusimizda davlat tilining maqomi huquqiy jihatdan
mustahkamlandi. Ushbu sana mamlakatimiz, yurtdoshlarimiz hayotidagi unutilmas,
tarixiy voqeaga aylandi. So‘nggi yillarida barcha sohalarda bo‘lgani kabi
tilimiz taraqqiyotida ham muhim o‘zgarishlar yuz bermoqda. O‘zbek tilining
xalqaro miqyosda obro‘yi oshib, faol muloqot vositasiga aylanib bormoqda.
Prezidentimiz “Dunyodagi qadimiy va boy tillardan biri
bo‘lgan o‘zbek tili xalqimiz uchun milliy o‘zlik va mustaqil davlatchiligimiz
timsoli, bebaho maʼnaviy boylik, mamlakatimizning siyosiy-ijtimoiy,
maʼnaviy-maʼrifiy taraqqiyotida g‘oyat muhim o‘rin egallab kelayotgan buyuk
qadriyat” ekanini alohida taʼkidlab o‘tgandi. Darhaqiqat, ona tilimizni kelgusi
avlodlarga maʼnaviy boylik sifatida sof holda yetkazish uchun esa yoshlarni ona
tiliga hurmat ruhida tarbiyalashimiz lozim.
Islohotlar izchil davom ettirilib, davlatimiz
rahbarining 2019-yilning 4-oktabrda “O‘zbekiston Respublikasining “Davlat tili
haqida”gi Qonuni qabul qilinganining o‘ttiz yilligini keng nishonlash
to‘g‘risida”gi Qarori hamda 21-oktabr sanasida “O‘zbek tilining davlat tili
sifatidagi nufuzi va mavqeyini tubdan oshirish chora-tadbirlari to‘g‘risida”gi
Farmoni qabul qilindi. Farmonga binoan 21-oktabr sanasi yurtimizda “O‘zbek tili
bayrami kuni” deb eʼlon qilindi. Mazkur bayram – ona tilimizni sharaflash,
uning qaddini va qadrini yanada yuksaltirishga xizmat qilishi kerak.
Mana shu o‘rinda o‘zbek tili rivoji va sofligiga
to‘siq bo‘layotgan muammolardan biri haqida so‘z yuritsak. Taraqqiyot,
globallashuv sabab respublikamizning deyarli har bir ko‘chasida zamonaviy turarjoy,
savdo komplekslari, xizmat ko‘rsatish shaxobchalari qad ko‘tardi. Rivojlanish
o‘z yo‘liga, ammo aksariyatining nomlanishi ajnabiy tilda ekani achinarli hol.
“Korzinka”, “Makro”, “Wunderkind”, “Profi Educations”, “Turi v Dubay”, “Beauty
Salon”, “Dark hall”, “Tal Pich”, “Barduck”, “Riviera”, “Mi otkrilis”, “Indenim”
kabi xorijiy nomlarni ko‘rib, chet elda yurgandek his qilasiz. Bu kabi holat
zamona zaylidir, biroq “Rayhon”, “Yalpiz”, “Novvot”, “Chopar” kabi restoranlar,
“Samarqand darvoza”, “Navro‘z” kabi o‘zbekcha va qulog‘imizga tanish nomlar
bilan atalgan ko‘ngilochar savdo majmualarining bozori “o‘lgani yo‘q-ku”!
“Tashkent Sity”, “Nest One”, “Golden House” kabi
poytaxtimizning ko‘rki bo‘lgan turarjoy va biznes komplekslari bunyod
etilyapti. Har bir viloyatda “sity”lar qurilyapti, biroq shu o‘zgarishlarni
o‘zbekcha nom bilan atasak, maqsadga muvofiq bo‘lmaydimi? “Olmazor”,
“Sohilbo‘yi” kabi nomlarning nimasi yomon?
Xorij kompaniyalari bilan hamkorlikda qurilayotgan
obyektlarni tushunish mumkin, ammo xalq puliga qad ko‘tarayotgan turarjoy va
savdo markazlarini nomlashda shoshma-shosharlikka yo‘l qo‘ymaslik kerak. Bu zamonaviylikka intilish, boshqalardan bir pog‘ona
yuqorida ekanini ko‘rsatish yoki xalqimiz uchun umuman yot bo‘lgan atamalarni
ko‘r-ko‘rona qo‘llashmi?
Muammoning ildizi chuqur. Ona tiliga daʼvat etishi
kerak bo‘lgan telekanallarda ham ahvol havas qilgudek emas. Davlat va nodavlat
telekanallaridagi sof o‘zbekcha nomli ko‘rsatuvlar tobora kamayib ketmoqda.
“Bojalar community”, “Hello Afrika”, “Real Xit”, “Like bos”, “The Cover up”,
“Bumerang”, “MTV Show”, “Tv Sale”, “My Shop”, “Bingo”. Ularning o‘rnida
“Assalom, O‘zbekiston”, “Oydin hayot”, “O‘zingni angla”, “Mening bog‘im”, “Siz
bilan”, “Uyga qaytib”, “Hayot va xayol yo‘llari” singari yoqimli va mushohadaga
chorlaydigan nomlar chiroyli jaranglamaydimi?
Afsuski, mana shu omillar natijasida bugun
yoshlarimizda ona tili va adabiyotimizni o‘rganishga mehr va ishtiyoq
sustlashdi. Savodxonlik darajasi ham ko‘ngilni xira qiladi. Bu millat taraqqiyoti
uchun ulkan fojia. Chunki qaysi yurtning farzandlari o‘z ona tillarida o‘qishni
to‘xtatsa, o‘sha til yo‘qlik qaʼriga singadi. Uni yot taʼsirlardan saqlash yurt
kelajagini belgilaydi. Shunday ekan, ona tilimizning xalqaro miqyosdagi
obro‘-eʼtiborini yuksaltirish, milliy va umumbashariy tushunchalar asosida
taraqqiy etgan tillar safiga qo‘shishda har birimiz tilimizga chuqur hurmat
bilan yondashishimiz kerak.
Shu o‘rinda maʼrifatparvar bobomiz, o‘z davrida o‘nga
yaqin dunyoviy tillarni puxta o‘rgangan olim Isʼhoqxon Ibratning quyidagi
fikrlari eʼtiborga molik: “Bizning yoshlar, albatta, boshqa tilni
bilish uchun saʼy-harakat qilsinlar, lekin avval, o‘z ona tilini ko‘zlariga
to‘tiyo qilib, ehtirom ko‘rsatsinlar. Zero, o‘z tiliga sadoqat – bu vataniy
ishdir”.
Zebinisa HAKIMOVA,
Davlat xizmatlari agentligi direktorining maslahatchisi
"Yangi O'zbekiston" gazetasining 2021-yil 12-yanvardagi 7-sonidan olindi