- Bosh sahifa
- Maslahatchi minbari
- Yangi tahrirdagi alifboga munosabat
Yangi tahrirdagi alifboga munosabat
O‘zbekiston Respublikasi
Vazirlar Mahkamasi huzuridagi Davlat tilini rivojlantirish departamentining rasmiy
sahifasida departament tomonidan O‘zbekiston Respublikasining “Lotin yozuviga asoslangan
o‘zbek alifbosini joriy etish to‘g‘risida”gi qonuni loyihasi yuzasidan munosabat
bildirildi. Aslida, ushbu qonun loyihasi regulation.gov.uz saytida e’lon qilingan
kundan boshlab turli xil munozaralarga sabab bo‘lib kelayotgan edi. Bu esa o‘z o‘rnida
xalqimizning o‘zbek milliy alifbosiga bo‘lgan hurmati va e’tiboridan dalolat beradi.
Alifbo odatiy va katta ahamiyatga ega bo‘lgan hodisa sanaladi.
Kundalik hayotimizda alifbodan ko‘p foydalanamiz, ma’lumot olamiz va ma’lumot tarqatamiz.
Bu amallardan ijtimoiy kelib chiqishidan qat’iy nazar yosh-u qari bir xilda foydalanadi.
Shu bilan bir qatorda, davlat tilini ifodalovchi yozuvimizni
(alifbomizni) davlat siyosati darajasiga ko‘targanmiz. Bu yaxshi, albatta, yozuv
va uni ifodalovchi alifbo hamma zamonlarda ma’lumotlarni kelajak avlodlarga yetkazuvchi
vosita sifatida foydalanilgan. Avlodlar ilmiy, tarixiy, publitsistik asarlarni o‘z
davri olimlari yozgandek anglashi uchun bitta alifbo bo‘lishi maqsadga muvofiq.
Lekin o‘zbek milliy alifbosi ko‘p siyosiy-ijtimoiy ta’sirlarga uchragan holda bir
necha bor o‘zgardi va hozirda foydalanish jarayonida uch avlod o‘rtasida qiyichiliklar
tug‘dirmoqda.
Har bir sohada bo‘lgani
singari yozuvda ham mukammallikka hamda yakdillikka erishish munozara va muhokamalarsiz
bo‘lmaydi. Ushbu qaror loyihasi ijtimoiy xabarnomalarda e’lon qilingan kundan boshlab,
nafaqat, mamlakatimizda yashovchi fuqarolar tomonidan, balki butun dunyoga tarqalgan
o‘zbek vatandoshlarimiz tomonidan qizg‘in kutib olindi. Qaror loyihasida keltirilgan
o‘zbek tiliga asoslangan alifboga berilayotgan o‘zgartirish va qo‘shimchalar, aslida,
biz – foydalanuvchilarga yengillik yaratish maqsadida tayyorlangan. Bizningcha,
alifbodagi to‘rtta xarfning shaklan qisqarishi va o‘zgarishi katta muammo emas.
Ayrim mulohazalarda bu o‘zgarish “pashshadan fil yasagandek” taassurot uyg‘otadi.
“Alifboda tushunib bo‘lmas o‘zgarishlar sodir bo‘lmayapti, yosh avlod tez o‘rganib
olish qobiliyatiga ega”, deb mutaxassislar tomonidan bot-bot tushuntirishlar berilyapti.
Pedagogik nuqtayi nazardan, maktabgacha yoshdagi bolalar
kelajak hayoti davomida qo‘llay oladigan ma’lumotlarni 6-7 yoshgacha oladi. Ta’lim-tarbiya
jarayonida maktabgacha yoshdagi bolalarga berilayotgan har bir yangi ma’lumotga
katta mas’uliyat bilan yondashish kerak. Ularning e’tiborini jalb qiladigan lavhalar,
didaktik tarqatma materiallar imlo qoidalariga rioya etilgan holda to‘g‘ri yozilgan
bo‘lishi zarur. Sababi ular ko‘rib – eslab qolish qobiliyatiga ega bo‘lib, maktabga
tayyorlov guruhi bolalari ilk bora ta’lim-tarbiya jarayonida alifbodagi harflar
bilan tanishadilar. Harflarning talaffuzi, bosma shaklda qanday yozilishini o‘rganadilar.
Bog‘chalarda yangi tahrirdagi alifbo bilan bolajonlarni tanishtirish qiyinchilik
tug‘dirmaydi. Aynan yangi tahrirdagi o‘zbek tiliga asoslangan alifboni maktabgacha
ta’limdan boshlanishi bo‘lajak yosh avlodning savodli bo‘lib
yetishishiga sabab bo‘ladi.
Biz O‘zbekiston Respublikasi Vazirlar Mahkamasining Davlat
tilini rivojlantirish departamenti tomonidan o‘zbek tilining rivoji va ommalashuvi
yo‘lida amalga oshirilayotgan islohotlarni to‘laqonli qo‘llab-quvvatlaymiz.
K. Riskulova,
Maktabgacha ta’lim vazirining maslahatchisi