- Bosh sahifa
- Maslahatchi minbari
- Tashqi yozuv va peshlavhalar: davlat tiliga e’tibor vijdon ishiga aylanishi kerak
Tashqi yozuv va peshlavhalar: davlat tiliga e’tibor vijdon ishiga aylanishi kerak
Sir emaski, bugun davlat tiliga e’tibor, o‘zbek tilini
rivojlantirish, uning davlat tili sifatidagi nufuzi va maqomini oshirish bilan
bog‘liq tarixiy islohotlar davrida yashamoqdamiz. Ushbu
ezgu amaliy sa’y-harakatlarning, avvalo, muhtaram Yurtboshimiz tomonidan dadil
boshlab berilganligi, bugun davlat tiliga e’tiborning tobora yuksalib
borayotganligini alohida qayd etish joiz.
Ta’bir
joiz bo‘lsa, tashqi yozuv va peshlavhalarni hayotimizda kechayotgan yorqin
islohotlarning ko‘zgusi deyish mumkin. Ammo ming taassufki, ushbu ko‘zgu yillar
davomidagi e’tiborsizlik oqibatida anchayin xira tortdi. Ya’nikim, tashqi
yozuvlar, peshlavhalar, reklama va axborot matnlari aralash-quralash tilda,
o‘zbilarmonlik bilan yoziladigan bo‘ldi. Yaxshilab razm solinsa, shahar va
ko‘chalarni yomg‘irdan keyingi qo‘ziqorinlar kabi turli shaklda yozilgan,
imloviy xatolarga to‘la lavha va matnlar egallab oldi.
Shuning uchun ham hozirda shahar markaziy
ko‘chalaridagi tashqi yozuvlar, peshlavhalar hamda reklama matnlarini davlat
tili to‘g‘risidagi qonun hujjatlariga muvofiqlashtirish borasidagi
sa’y-harakatlar amalga oshirilmoqda. Albatta, bu
jarayonda O‘zbekiston Respublikasi Vazirlar Mahkamasining Ma’naviyat va davlat
tilini rivojlantirish masalalari departamentining hissasi katta bo‘lmoqda.
Vazirlik, idoralar, shuningdek, tuman hokimlarining
ma’naviy-ma’rifiy ishlar samaradorligini oshirish, davlat tili to‘g‘risidagi
qonun hujjatlariga rioya etilishini ta’minlash masalalari bo‘yicha
maslahatchilari o‘zaro bir yoqadan bosh chiqarib, tegishli xizmatlar
xodimlarini jalb qilgan holda, poytaxtimiz tumanlarida tashqi yozuv,
peshlavhalar reklama va axborot matnlarini o‘rganish, bu borada aniqlangan
kamchiliklarni bartaraf qilish, tadbirkorlarga amaliy yordam ko‘rsatish
tadbirlarini olib bormoqdalar. Jumladan, Favqulodda vaziyatlar vaziri
maslahatchisi va Toshkent shahar Bektemir tumani hokimi maslahatchisi tomonidan
tumandagi barcha aloqador xizmatlar mas’ul xodimlari bilan birgalikda markaziy
ko‘chalardagi tashqi yozuvlar va peshlavhalarni davlat tili talablariga
moslash, bu borada tadbirkorlarga zarur tavsiyalar berish, davlat tili
talablariga muvofiq kelmagan peshlavhalarni yangilariga almashtirish bilan
bog‘liq amaliy tadbirlar tashkillashtirilmoqda.
Bu kabi tadbirlarni amalga oshirishdan maqsad –
kimningdir reklamasini joyidan yulib tashlash, unga zarar yetkazish emas, balki
tadbirkorga reklama xizmatini tashkil qilishda qulaylik yaratish, uni davlat
tilida ish yuritishga o‘rgatish va bu borada yaqindan yordam berishdan
iboratdir.
Ijtimoiy tarmoqlarda ayrim fuqarolar tomonidan ushbu
islohotlarni noto‘g‘ri tushunish, tadbirkorning mulkiga shikast yetkazish
o‘rnida talqin qilish holatlari kuzatilmoqda. Aslida esa hech bir tadbirkorga
ziyon yetkazilayotgani yo‘q, aksincha markaz joylarda noqonuniy holda qurilgan
va shahar husnini buzib turgan reklama konstruksiyalari bartaraf qilinmoqda.
Keling, xolisona o‘ylab ko‘raylik. Qanaqadir reklama,
e’lon matni yoki peshlavhani istagan joyga, istagan ko‘rinishda, xohlagan tilda
yozib, joylashtirib tashlash kimga kerak?.. Axir biz azaldan o‘z qadriyatlari,
urf-odatlari, odob-axloq, uyat-andisha, hurmat-tavoze’ deb atalgan ulug‘
insoniy tuyg‘ularga ega xalqmiz. Bundan tashqari, xalqimizda shahar – bedarvoza
emas, degan dono naql bor...
Bizning joylashtirgan qaysidir yozuvimiz, e’lon yoki
lavhamiz nafaqat o‘z yurtimiz, balki boshqa yurtlardan kelgan sayyoh –
mehmonlarning e’tiborini ham tortishini unutmasligimiz kerak. Shunday ekan,
tashqi yozuv va e’lonlarni yozayotganimizda, avvalo, davlat tili talablariga
e’tibor qaratishimiz, matnlarni xatosiz yozdirishimiz, bu ishni amalga
oshirishda yonimizga filolog mutaxassislarni jalb qilishimiz, matn
yaratuvchilardan ham, o‘z navbatida, savodxonlikni talab qilishimiz maqsadga
muvofiqdir. Chunki xato yozilgan e’lonning tadbirkorga ikki karra qimmatga
tushishi aniq gap...
Xalq ichiga kirib borganing sari shuni anglaysan
kishi: inson toki o‘zi tug‘ilib o‘sgan, yashayotgan vatani, xalqi, o‘zi
so‘zlayotgan ona tili bilan faxrlanish, iftixor hissini yurak-yurakdan tuymas
ekan, unga hech qanday so‘z, chora ta’sir ko‘rsata olmaydi.
Taassufki, o‘rganish va amaliy yordam ko‘rsatish jarayonlarida ayrim
fuqarolarimizning davlat tiliga nisbatan anchayin sayoz, beparvo, hissiz munosabatlariga
ham guvoh bo‘lmoqdamiz. Shukrki, ko‘pchilik yurtdoshlarimiz, tadbirkorlarimiz
bu boradagi tashabbuslarni qo‘llab-quvvatlab, bildirilgan tavsiyalarni quloqqa
olib, o‘zlariga tegishli binolardagi peshlavhalarni talab darajasiga
keltirmoqdalar.
Xulosa shuki, davlat tiliga e’tibor tuyg‘usi
qon-qonimizga singib ketmog‘i, ona tiliga hurmat – ona Vatan, xalq, tug‘ilgan
go‘shaga nisbatan cheksiz mehru muhabbatga omuxta bo‘lishi zarur. Buning uchun
esa farzandlar tarbiyasida ona tilining o‘rni beqiyos bo‘lishi lozim. Ana shundagina
davlat tiliga e’tibor haqiqiy burch, qalb amri va vijdon ishiga aylanadi!
Bahodir Valiyev,
Favqulodda vaziyatlar vazirining maslahatchisi
Oybek Sapayev,
Bektemir tumani hokimining maslahatchisi
"uza.uz" saytidan olindi