- Bosh sahifa
- Maslahatchi minbari
- Inomjon Azimov: Millat kelajagiga beparvo boʻlmang, muhtaram deputatlarimiz!
Inomjon Azimov: Millat kelajagiga beparvo boʻlmang, muhtaram deputatlarimiz!
“Milliy tiklanish” partiyasi
yetakchisi Alisher Qodirovning mulohazalarini oʻqib, toʻgʻrisi, tashvishga
tushib qoldim. Nahotki,
deputatlarimiz shunchalik loqayd, shunchalik dunyoqarashi tor?!
Oʻqimaganlar uchun: “Qonun loyihasini muhokamasida XDPning sovetcha
qarashlari va “Milliy tiklanish”ni azaldan jini suymaydiganlar bilan qonunga
jiddiy e’tibor bermayotganlarning kayfiyatlari ustuvorlik qilmoqda. O‘zbek tili qadrini ko‘tarish va uni
ustuvorligini ta’minlash uchun kiritayotgan takliflarimiz “qolgan millatlarni
xafa qilib qo‘ymasligimiz kerak” yondashuvi bilan qabul qilinmay qoladigandek.
Kechagi sessiyada shunday normalardan biri yetarli ovoz yig‘madi. Qonunning
11-moddasida davlat xizmatchisi o‘zbek tilini bilishi shartligi belgilangan.
Hali bu moddaga yetib kelmadik. Lekin 4-moddada fuqaroni davlat tilini
bilmaganligi uchun huquqini cheklamaslik to‘g‘risida norma ko‘pchilik ovoz
bilan qabul qilindi.
Taxmin qilayapman, shu ketishda 11-moddadagi davlat xizmatchisiga davlat
tilini bilish, 13-moddadagi davlat idoralari arizalarni davlat tilida qabul
qilishi va javob berishi, 17-moddadagi barcha millatlarni o‘z ona tillarida
ta’lim olishlariga ustuvorlik berish bo‘yicha normalar ham chiqarib tashlanadi.
Hammani o‘ylash albatta yaxshi, o‘ylayapmiz ham, bu qonun loyihasida
bironta boshqa millatli vatandoshlarimiz huquqini kamsitadigan norma yo‘q...
lekin bu mehribonlik o‘zimizni kamsitish hisobiga bo‘lmasligi kerak...”.
Hurmatli deputatlar! Sizlar muhokama qilayotgan qonun Abdulla Avloniy
ta’biri bilan aytganda “dunyoda millatimizning borligini koʻrsatuvchi” ona
tilimizning ravnaqi, rivoji, nufuzi, mavqeyi, kelajagi uchun naqadar ahamiyatli
ekanini unutmang.
Ehtimol, koʻp qonunlarni tushunib-tushunmay, nomiga tugmachani bosib oʻtkazib
oʻtirgandirsiz, lekin bu qonunga bunday
munosabatda boʻlishingiz millat uchun xoinlik hisoblanadi.
Sizlardan iltimos, boshqa davlatlar qonunlarini yaxshilab oʻqing,
vaqtingizni ayamang, mulohaza qiling. Qoʻshnilarimizda yashovchi
millatdoshlarimiz qozoq, qirgʻiz, turkman tillarini majburan oʻrganyapti-ku!
Hatto Turkmanistonda oʻzbek maktablari
yopilib ketganiga 15 yil boʻldi. Ular boshqa millatlar xafa boʻlib qolmasmikan,
deb oʻtirishgani yoʻq, oʻz tili haqida qaygʻuryapti.
Agar yuqoridagi holatda qabul qiladigan boʻlsangiz, yaxshisi qabul qilmang,
unda eskisidan umuman farqi qolmaydi. Esingizda boʻlsa, bu vazifa 2019-yilda
yurtboshimiz tomonidan qoʻyilgan edi: “Avvalo, bundan o‘ttiz yil muqaddam qabul
qilingan “Davlat tili haqida”gi qonunni bugungi kun talablari nuqtayi nazaridan
har tomonlama chuqur tahlil qilib, takomillashtirish zarurati sezilmoqda”.
Shunday ekan, xorij tajribalarini oʻrganib, chuqur, har tomonlama tahlil
qiling, takomillashtiring. Yangi qabul qilinadigan qonun yana 5-10 yilda tahrir
qilinadigan, oʻzgaradigan emas, balki ona tilimizni har tomonlama muhofaza
qiladigan, haqiqiy davlat tili sifatida oʻzligini namoyon qilishga qaratilgan
umrboqiy qonun boʻlishi kerak. Millat kelajagiga beparvo boʻlmang, muhtaram
deputatlarimiz!
Inomjon Azimovning “facebook”dagi sahifasidan olindi