- Bosh sahifa
- Maslahatchi minbari
- Yoshlar va qadriyatlar
Yoshlar va qadriyatlar
Bugungi kunda
jamiyatda maʼnaviy qadriyatlarni tiklash, axloqiy ideallarni shakllantirish va
millatning, ayniqsa, yoshlarning intellektual salohiyatini yuksaltirish ustuvor
vazifadir. Yosh avlodni zamonaviy bilim va tajribalar, milliy va umuminsoniy
qadriyatlar asosida mustaqil va mantiqiy fikrlaydigan, ezgu fazilatlar egasi
boʻlgan jismonan va maʼnan sogʻlom, vatanparvar insonlar etib voyaga yetkazish
uchun barcha kuch va imkoniyatlarni safarbar etish talab etiladi. Negaki,
maʼnaviy-axloqiy rivojlanish mamlakatni modernizatsiya qilishning asosiy
omillaridan biri hisoblanadi.
“Ijtimoiy fikr” respublika
jamoatchilik fikrini oʻrganish Markazi jamiyatda fuqarolarning qadriyatlarini
oʻrganish, soʻnggi yillardagi ijtimoiy-iqtisodiy oʻzgarishlar va hayotning
barcha sohalarining erkinlashtirilishi taʼsirida aholining, ayniqsa,
yoshlarning siyosiy, ijtimoiy-iqtisodiy, axloqiy, huquqiy ongida sodir
boʻlayotgan asosiy oʻzgarishlarni aniqlash maqsadida “Oʻzbekiston
fuqarolarining qadriyatlari” mavzusidagi sotsiologik tadqiqotni muntazam
ravishda monitoring tartibida oʻtkazib keladi. Tadqiqot natijalariga koʻra,
Oʻzbekistonda roʻy berayotgan ijtimoiy, siyosiy va iqtisodiy oʻzgarishlar
fuqarolar va, ayniqsa, yoshlarning qadriyatlar tizimiga oʻz taʼsirini
koʻrsatmoqda.
Jumladan, soʻrov natijalari
maʼnaviy-axloqiy xususiyatlar va eʼtiqodlar oʻzbekistonliklarning asosiy
qadriyatlari tarkibida markaziy oʻrinni egallashini koʻrsatdi. Mamlakat
aholisining ijtimoiy ongida anʼanaviy ravishda erkin, ozod hayot kechirish va
inson huquqlariga amal qilinishi, salomatlikni saqlash, baxtli oila qurish,
farzandni dunyoga keltirish va tarbiyalash, oʻqimishlilik, yaxshi ish va
munosib moddiy ahvol, yuksak professionallik, tadbirkorlik, mustaqillik,
mehnatsevarlik, masʼuliyat, barkamollik va yangi ijtimoiy-iqtisodiy
sharoitlarga moslashish kabi maʼnaviy-axloqiy qadriyatlar asosiy qadriyatlar
sifatida saqlanib qolmoqda.
Fuqarolarning fikriga koʻra, har bir
oʻzbekistonlik hayotidagi asosiy qadriyat bu - oila, u inson uchun ishonchli
tayanch, bitmas-tuganmas mehr-muhabbat, oʻzaro hurmat, tushunish va sabr-toqat
manbai ekanligiga respondentlarning ishonchi komil. Ularning taʼkidlashlaricha,
mustahkam oilaviy munosabatlar – bu yetuk, masʼuliyatli jamiyatning poydevori,
yurtimiz baxtli kelajagining kafolatidir. Shuningdek, mamlakat aholisi uchun
qarindoshlar va doʻstlarga gʻamxoʻrlik, keksalarga yordam va yosh avlodni
qoʻllab-quvvatlash, ishonch, mehr-oqibat, sadoqat, oʻzaro tushunish, oila
aʼzolariga hurmat ham asosiy qadriyatlar hisoblanadi.
Inson hayotining muhim qadriyati va
boyligi sifatida oilaning barqarorligi zamonaviy jamiyat hayotining asosini
tashkil etadi, mamlakatning demografik, iqtisodiy va ruhiy-ijtimoiy salomatligiga
bevosita taʼsir koʻrsatadi. Markaz tomonidan “Oila toʻgʻrisida
oʻzbekistonliklarning fikri” mavzusida oʻtkazilgan soʻrov jarayonida inson
hayotida oilaning roliga oʻzbekistonliklar bergan baholarning umumiy
tendensiyalari aniqlandi. Soʻrov natijalari oʻzbekistonliklarga oilaning inson
hayotidagi roliga tafovutli baho berish xosligini koʻrsatdi, unda oilaning
naslni davom ettirish uchun zarurligi va insonning ruhiy-ijtimoiy toʻkisligi
uchun manba sifatidagi oʻrni toʻgʻrisidagi tasavvurlar asosiy hisoblanadi.
Yosh oilalarda munosabatlar
muvaffaqiyatini taʼminlashda, soʻralganlarning fikriga koʻra, qizlarning
maishiy muammolarni mustaqil hal qila olishlari, xoʻjalik yurita bilishlari,
yigitlarning esa, moddiy mustaqil boʻlishlari, barqaror doimiy ishga yoki
daromad manbasiga ega boʻlishlari kabi gender oʻziga xoslikni tavsiflovchi
omillar juda muhim hisoblanadi.
Soʻrov natijalarining
koʻrsatishicha, bugungi kunda oʻzbekistonliklar moddiy mustaqillik va moliyaviy
alohidalik boʻlishini, oila uchun alohida doimiy uy-joyning mavjudligi va
boʻlgʻusi juftlikning jismonan sogʻlomligi hamda maʼnan bir-biriga mosligini
oila qurish uchun asosiy shartlar deb hisoblaydilar. Ayni paytda Oʻzbekiston
jamoatchiligi fikrida oʻzaro muhabbat hamda ota-ona maslahati bilan boʻlgʻusi
kelin yoki kuyovni tanlash va nikohga kirish anʼanalari asosida qurilgan oila
haqidagi tasavvurlar ustuvorlik qiladi.
Tadqiqotda oʻzbekistonliklarning
yoshlarni oila qurishga tayyorlashning zarurligi toʻgʻrisidagi gʻoyani
qoʻllab-quvvatlash tendensiyasi aniqlandi. Soʻrov ishtirokchilarining fikricha,
oilaga tayyorlash jarayonida yoshlarning ota-onalari asosiy rol oʻynashlari
kerak.
Oilalardagi nizolar sabablari
haqidagi tasavvurlar moddiy qiyinchiliklar va oila aʼzolari oʻrtasidagi oʻzaro
tushunmovchiliklar bilan bogʻliq. Soʻrovda yurtdoshlarimiz er-xotin, qaynona va
kelin, ona bilan qiz, hatto qaynota va kelin oʻrtasidagi nizolarni eng koʻp
uchraydigan nizolar sifatida koʻrsatishdi.
85,3 foiz ishtirokchilar oilada er
tomonidan ayolga nisbatan jismoniy zoʻravonlik qoʻllashga yoʻl qoʻyib
boʻlmaydi, degan fikrdalar. Lekin soʻrov ishtirokchilarining asosiy koʻpchiligi
tomonidan oilada zoʻravonlik muammosi qoralanishiga qaramasdan har oʻninchi
respondentning ayrim, alohida hollarda zoʻravonlik qoʻllanilishi mumkin, deb
hisoblashi tashvishli holdir. Respondentlar ushbu fikrining amaldagi ifodasi
Axborot va ommaviy kommunikatsiyalar agentligida Mahalla va oilani
qoʻllab-quvvatlash vazirligi mutasaddilari ishtirokida oʻtkazilgan matbuot
anjumanida qayd qilindi: mamlakatda xotin-qizlarga nisbatan qayd etilgan tazyiq
va zoʻravonlik holatlarining 73 foizi ularning oilalarida sodir etilgan.
Umuman olganda, soʻrov natijalari
oila maʼnaviyatini mustahkamlashga yoʻnaltirilgan tadbirlar sifati, targʻibot
ishlarini yanada kuchaytirish va bu borada barcha davlat, nodavlat hamda jamoat
tashkilotlarining imkoniyatidan keng foydalanish zaruriyatini koʻrsatdi. Bu
boradagi saʼy-harakatlar va mavjud salohiyatlarning birlashtirilishi,
shak-shubhasiz, oilaga jamiyat va davlatning eʼtibori yanada kuchayishiga,
uning barqaror rivojlanishiga, oila manfaatlarini huquqiy, ijtimoiy-iqtisodiy
himoya qilishni kuchaytirish boʻyicha oʻtkazilayotgan barcha ishlarni sifat
jihatidan yangi darajaga koʻtarishga, pirovard natijada esa jamiyatimiz hayotining
ruhi sogʻlom va tetik boʻlib, uning iqtisodiy jihatdan taraqqiy etishiga imkon
beradi.
Maʼnaviyat – inson ichki dunyosining
bamisoli bir koʻzgusi, u insonning ruhiy va aqliy olami ifodasi. Maʼnaviyatga
tamal toshi, avvalo, oilada qoʻyiladi, soʻng hayotda umr davomida, insonni
oʻrab turgan muhit, yaqinlari taʼsirida, keyinchalik jamoada dunyoni oʻrganish,
oq-qorani ajratish, yaxshi-yomonning farqiga borish, taʼlim va tarbiya
jarayonida, ideallarga intilish va ularga taqlid qilish, dunyoqarashni kengaytirish
va hayotiy andazalarga moslashish taʼsirida bosqichma-bosqich shakllanib
boradi. U kishilarning falsafiy, huquqiy, ilmiy, badiiy, axloqiy, diniy va
boshqa sohalardagi hayotiy tasavvurlari, barcha sohalarda orttirgan bilimlari
hamda hayotiy tajribasini oʻz ichiga oladi va insonga butun umri davomida
yoʻlchi mayoqdek yoʻl koʻrsatib boradi.
Hayotda maʼnaviyatning oʻrni hech
qachon boʻsh boʻlmaydi, agar biz eʼtiborsizroq boʻlsak, uni boshqalar toʻldiradi.
Oddiy misol, kundalik hayotda oddiy aloqa vositasi sifatida faoliyat boshlagan
uyali telefon hammani, ayniqsa, yoshlarni oʻz toʻriga tortib olgan oʻrgimchakka
aylandi. Aholining bir qismi iftixorimiz boʻlmish tilimizni buzib, yarim-yorti
soʻzlashga odatlandi. Ijtimoiy tarmoqlardagi koʻpgina izohlarni oʻqib, buni
yozayotgan odam qaysi maktabda oʻqigan ekan, deb oʻylaysiz beixtiyor. Boshqa
tillardagi ayrim soʻzlarning hech bir istisnosiz hamma joyda, hatto ayrim
ommaviy axborot vositalaridagi rasmiy xabarlar orqali ham toʻgʻridan-toʻgʻri
tilimizga kirib kelayotgani-chi?! Misol uchun, “lider” soʻzi. Xolisona
aytganda, juda chiroyli va jarangdor eshitiladi. Men zamonaviy axborot
vositalarining hayotimizda tutgan oʻrnini va tilimizning zamonaviy atamalar
hisobiga boyib borishini inkor etish fikridan yiroqman. Internet, smartfon,
ijtimoiy tarmoqlardan oʻz oʻrnida ongli ravishda foydalanish insonning
rivojlanishiga, uning kasbiy oʻsishi va maʼnaviy kamolotiga, umuman olganda,
jamiyat taraqqiyotiga xizmat qiladi, jamiyat rivoji bilan birga til ham boyib
boradi. Lekin meʼyor degan narsa ham bor. Agar zamonaviy taraqqiyot
vositalaridan ongli ravishda foydalanishni maʼnaviy immuniteti shakllanmagan
yoshlarga oʻrgatmasak, oʻz tilimizda muqobili yetarlicha boʻlgan soʻzlarni ham
boshqa tillardan chiroyli yoki jarangdor deb indamay oʻzlashtiraversak,
chek-chegarani bilmasak, bu shiddatli dunyoda ommaviy madaniyatning kishi
bilmas xurujidan asl milliy va umuminsoniy qadriyatlarimizni qanday saqlab
qolamiz?!
Inson maʼnaviyatini shakllantirishda
kitob mutolaasining oʻrni beqiyos ekanligi azaldan maʼlum. Markaz tomonidan
“Yoshlarning kitob mutolaasiga munosabati” mavzusida oʻtkazilgan soʻrov
natijalariga koʻra, kitob mutolaasida Internetning roliga nisbatan umuman
olganda ziddiyatli baho berilayotganligi aniqlandi: respondentlarning qariyb
yarmi (48,1%) Internetdan kitoblarni qidirish va yuklab olish uchun manba
sifatida foydalanadi. 56,5% respondentlar yoshlarning ijtimoiy tarmoqlarga
berilganligi ular tomonidan kam kitob oʻqilayotganligining yoki umuman
oʻqilmayotganligining asosiy sababi, deb hisoblaydilar. Bundan tashqari, kitob
oʻqishga qiziqadigan yoshlar sonining birmuncha kamayishi respondentlar
tomonidan yoshlarning pul topishga berilganligi, ota-onalar farzandlarida kitob
oʻqishga qiziqish uygʻotish bilan shugʻullanmayotganligi, yoshlar tomonidan
kitob oʻqish zerikarli va qiziqarsiz mashgʻulot sifatida idrok etilayotganligi
bilan izohlanadi.
Soʻrov natijalarining
koʻrsatishicha, yoshlar uchun kitob mutolaasi soʻrov ishtirokchilarining qariyb
uchdan biriga maʼnaviy ozuqa manbasi, chorak qismiga umumiy dunyoqarash va
savodxonlikni rivojlantirish usuli boʻlib xizmat qiladi, har besh nafar
respondentdan biri mutolaadan rohatlansa, har oltinchi ishtirokchiga mutolaa
oʻqishda qoʻshimcha bilimlar olishga yordam beradi.
Soʻralgan yoshlarning yarmi kitob
oʻqib turadi, ammo u yoki bu sababli, asosan vaqt yetishmasligiga koʻra yoshlar
tomonidan kitob mutolaa qilinmayotganligi kabi tashvishli tendensiya ham koʻzga
tashlanmoqda.
Soʻrov natijalariga koʻra, yoshlar
oʻz bilim darajasini oshirish orqali inson salohiyatini amalga oshirish
mumkinligiga ishonadilar. Ularning fikriga koʻra, oliy maʼlumot olish ish
haqining yuqori darajasi, martaba oʻsishi, moddiy farovonlik va moliyaviy
barqarorlikni kafolatlaydi. Yoshlar mehnat bozorida raqobatbardosh, talabgir
boʻlish uchun yaxshi maʼlumotga ega boʻlish kerakligini anglaydilar, ular
hayotda muvaffaqiyatga, kasbiy faoliyatda yutuqlarga erishishga va jamiyatda
oʻzlarini ishonchli his etish hamda yangi maqsadlar sari harakatning yangi
strategiyalarini yaratishga imkon beradigan ijtimoiy vosita - taʼlim ekanligini
yaxshi tushunadilar.
Yosh avlod vakillari oʻrtasida oʻtkazilgan
soʻrovda ular hayotdagi maqsadlariga qanday yoʻllar bilan erishmoqchi
ekanliklari aniqlandi. Yoshlarning aksariyati oʻz maqsadlariga, asosan, bilim
olish va oʻz mehnati bilan 76,4 foiz erishishga intilishadi. Bu, oʻz navbatida,
shaxsiy kuch va imkoniyatlarga ishonishga nisbatan ijobiy munosabatni
belgilaydi.
Oʻtkazilgan soʻrov natijalari
mamlakat zamonaviy yoshlarining ijobiy kayfiyati va sobitqadamligini,
qadriyatlar tizimiga ularning alohida eʼtiborini hamda intellektual va kasbiy
oʻsishga intilishini taʼkidlaydi. Yoshlarning davlat va jamiyat hayoti bilan
hamnafasligi hamda davlat tomonidan yoshlar muammolariga alohida eʼtibor,
shuningdek, har tomonlama qoʻllab-quvvatlash istiqbolda mamlakat, jamiyat va
umuman millatning samarali va barqaror holatiga bo`lgan ishonchni taʼminlaydi.
Yoshlarni maʼnaviyatga oshno qilish yosh avlodda milliy va umuminsoniy
qadriyatlarni tarbiyalash ishiga xizmat qiladi. Millatning zakovati va
maʼnaviyatini rivojlantirish esa davlat ahamiyatiga molik vazifadir.
Ulboʻsin ABDUMALIKOVA,
“Ijtimoiy fikr” respublika
jamoatchilik fikrini oʻrganish
markazi direktori maslahatchisi