- Bosh sahifa
- Maslahatchi minbari
- Millat taraqqiyotiga daxldor
Millat taraqqiyotiga daxldor
Mamlakatimizda o‘zbek tilining davlat tili sifatidagi maqomi va nufuzini
oshirish borasida nihoyatda muhim o‘zgarishlar, yangilanishlar amalga
oshirilmoqda
Buni xususan, bandlik va mehnat munosabatlari
vazirligi tizimidagi ishlarda ham yaqqol ko‘rish mumkin.
Tizimda ayni vaqtda ushbu yo‘nalishda jadal
islohotlar davom etmoqda. Xususan, hujjat almashinuvi to‘liq davlat tilida
amalga oshirilmoqda. Ish qog‘ozlari lotin yozuviga asoslangan o‘zbek
alifbosiga o‘tkazilgan. Vazirlik va uning tasarrufidagi bino peshlavhalari va
boshqa ko‘rgazmali axborot matnlari xatolarsiz joylashtirilishiga jiddiy
eʼtibor qaratilmoqda.
Xodimlarning lotin alifbosiga asoslangan davlat
tilida ish yuritish borasida bilim va ko‘nikmalarini oshirish maqsadida qisqa
o‘quv kurslari tashkil qilindi. «Davlat tilida ish yuritish» (lotin va kirill
alifbosida), «O‘zbek tilining izohli lug‘ati» (5 tomdan iborat to‘plam)
kitoblar hamda turli sohalarga oid izohli lug‘atlardan iborat adabiyotlar
xodimlarning faoliyatida muhim ahamiyatga ega risolalarga aylandi.
«Davlat tili to‘g‘risida»gi qonun buzilishi
holatlarini aniqlash, uni bartaraf etish borasida vazirlik, idora va barcha
tashkilotlar bilan hamkorlikda tizimli ishlashni yo‘lga qo‘yganmiz.
Shu o‘rinda sohada mazkur yo‘nalishdagi muhim
ishlardan biriga to‘xtalib o‘tishni joiz deb bildik. Bu davlat tilida ish
yuritishda soha xodimlari uchun qo‘llanma vazifasini o‘taydigan «Mehnat va
bandlik sohasiga oid atamalar izohli lug‘ati»dir. Ayni vaqtda nashrga
tayyorlanayotgan ushbu lug‘atni tuzishda «Aholi bandligi to‘g‘risida»gi qonun,
yangi tahrirdagi Mehnat kodeksi, Xalqaro mehnat tashkilotining konvensiya va
tavsiyalari, Prezidentning mehnat, aholi bandligi to‘g‘risidagi farmon va
qarorlari, statistik to‘plam, mehnat bozori bo‘yicha o‘quv va uslubiy
qo‘llanmalar va xalqaro ilmiy adabiyotlardan foydalanilgan. Izohli lug‘atda
so‘z, atama va iboralar alifbo tartibi asosida joylashtirilgan.
Hozirda izohli lug‘atning onlayn versiyasi
lotin va kirill alifbolarida vazirlikning rasmiy saytiga joylashtirildi. Nasib
bo‘lsa, yaqin kunlarda nishonlaydigan ulug‘ sanalardan biri – O‘zbek tili
bayramida kitobxonlar qo‘liga yetib boradi, degan umiddamiz.
Sohadagi ishlar ulug‘ maqsad – Vatan va Millat
taraqqiyotiga uyg‘unligi bilan bizga alohida kuch va shijoat baxsh etadi. Zero,
o‘zbek tilining xalqaro miqyosdagi obro‘-eʼtiborini yuksaltirish Yangi
O‘zbekistonning dunyo sahnidagi mavqeyini oshirishdagi muhim vositalardan
biridir.
Gullola ISOQOVA,
Bandlik va mehnat
munosabatlari
vazirining
maslahatchisi