- Bosh sahifa
- Maslahatchi minbari
- TIL RIVOJIGA FAQAT MUTASADDILARGINA MASʼUL EMAS...
TIL RIVOJIGA FAQAT MUTASADDILARGINA MASʼUL EMAS...
O‘tmishdan
maʼlumki, davlat tili jamiyat maʼnaviyati va taraqqiyotining asosini tashkil
qiladi. Shunday ekan, respublikamizdagi ko‘pgina tashkilotlarda hanuzgacha rus
tilida ish yuritilayotgani davlat tilini amalga to‘liq joriy qilish jarayonini
sustlashtirishi, muddatni uzaytirishi, oxir-oqibatda milliy davlatchilik
xususiyatiga putur yetkazishi bilan xavotirli. Vaholanki, davlat tilida ish
yuritish uchun barcha imkoniyatlar va salohiyat yetarli. Ularni qonun
ustuvorligi asosida maqsad sari yo‘naltirish, qunt va masʼuliyat bilan
yondashish talab etiladi.
To‘g‘ri,
katta tizimlarda, xususan, keng tarmoqli va o‘ziga xos jihatlarga ega sog‘liqni
saqlash sohasida davlat tili borasidagi ishlarni tubdan amalga oshirish
murakkab va anchayin qiyin kechishi tabiiy. Ammo bu sustkashlikka asos bo‘la
olmaydi.
Taʼkidlash
joizki, bugungi kunda vazirlik tizimidagi ko‘plab muassasalarda davlat tilida
ish yuritishni samarali tashkil etish va uning ijrosini nazorat qilish bo‘yicha
tuzilgan ishchi guruhlar faoliyatida quvonarli natijalarga erishila boshlandi.
Avvalo, vazirlik tomonidan buyruq va ko‘rsatma xatlarning barchasi davlat
tilida chiqarilayotgani qayd etib o‘tish mumkin bo‘lgan natijalardan biri. Bu
borada Vazirlar Mahkamasining Maʼnaviyat va davlat tilini rivojlantirish
masalalari departamenti bilan hamkorlikda butun tizim “Davlat tilida ish
yuritish” va 5 jilddan iborat “O‘zbek tilining izohli lug‘ati” kitoblari bilan
taʼminlangani muhim omil bo‘ldi.
Qolaversa,
ishchi guruh faoliyatini yanada faollashtirish yuzasidan joylarda davlat tilini
samarali tashkil qilish bo‘yicha uslubiy-amaliy yordam yo‘lga qo‘yilgani ham
ijobiylik kasb eta boshladi. Davlat tilini rivojlantirish va nufuzini tubdan
oshirishga qaratilgan chora-tadbirlar muntazam amalga oshirilmoqda. Joylardagi
barcha tibbiy muassasalarda, aholi o‘rtasida O‘zbekiston Prezidentining 2019-yil
21-oktabrdagi “O‘zbek tilining davlat tili sifatidagi nufuzi va mavqeyini
tubdan oshirish chora-tadbirlari to‘g‘risida”gi farmoni va Vazirlar
Mahkamasining 2020-yil 20-yanvardagi “Mamlakatda davlat tilida ish yuritishni
samarali tashkil etish chora-tadbirlari to‘g‘risida”gi qarori mazmun-mohiyati
haqida targ‘ibot va tushuntirish ishlari yo‘lga qo‘yildi.
Jumladan, Sog‘liqni saqlash vazirligi tizimidagi
barcha muassasalarda yuqoridagi qaror ijrosi holatini o‘rganish hamda amaliy
yordam ko‘rsatish maqsadida mamlakat bo‘ylab joylarga mutaxassislardan iborat
yettita ishchi guruhi safarbar etildi. Ularning asosiy vazifasi vazirlik tizimidagi
muassasalarda davlat tilida ish yuritish holatini to‘liq o‘rganish va amaliy
yordam ko‘rsatish, yo‘l qo‘yilgan xato-kamchiliklarni tanqidiy baholash,
muammolar va ularning yechimlari yuzasidan tavsiyalar berishdan iborat qilib
belgilandi. Albatta, bu kabi harakatlar beiz qolmaydi. Tadbirkorlik subyektlari
tomonidan o‘rnatilgan, joylashtirilgan peshlavhalar, reklama va eʼlonlar,
ko‘rgazmali boshqa axborot matnlarining davlat tilida bo‘lishini taʼminlashda
ham sezilarli ishlar amalga oshirilayotgani bu boradagi intilishlar natijasi,
shubhasiz.
Soha
oldidagi asosiy vazifalardan yana biri — tibbiy atamalarni isloh qilish edi. Bu
katta salohiyat, chuqur bilim va ilmiy xulosalar talab qilishi tabiiy. Shu
bois, hozirgi kunda taniqli olimlar, yosh tadqiqotchilar hamkorligida ushbu
masalada jiddiy ilmiy izlanishlar olib borilmoqda.
2009-yilda
vazirlik tomonidan 2-jilddan iborat “Tibbiy terminlar ensiklopedik lug‘ati”
yaratilgan edi. O‘zbek—rus tillaridagi 20000 mingta tibbiy atamani o‘z ichiga
olgan mazkur lug‘atning to‘ldirilgan nashrini tayyorlash jarayoni ketyapti. Ayni
izlanishlar birmuncha murakkab bo‘lishi barobarida qiziqarli hamdir. Masalan,
tadqiqotchilar nafaqat bugungi, balki Ibn Sino yashagan va o‘sha davrda
qo‘llanilgan so‘zlarga ham jiddiy yondashib, tibbiy atamalarning muqobilini
topishga harakat qilmoqda. Albatta, bu jarayonda taniqli tilshunoslar
fikr-mulohazasi, takliflari katta tayanch bo‘lmoqda.
Tibbiyot
muassasalari va xodimlari ishtirokida davlat tiliga hurmat ruhini
shakllantirish maqsadida tilshunos olimlar, shoir va yozuvchilar, taniqli
madaniyat va sanʼat arboblari bilan bevosita uchrashuvlar o‘tkazilayotgani ham
o‘z samarasini berishi, shubhasiz. Taʼlim muassasalaridagi barcha ilmiy
kengashlar, shuningdek, rektorat va kafedra kengashlari ishi ham qatʼiy
ravishda davlat tilida olib borilishi, taʼlim va tibbiyot muassasalari
hududlariga davlat tilini targ‘ib etuvchi banner va plakatlar o‘rnatilib,
muassasalar tomonidan chiqarilayotgan buyruqlar, maʼnaviy-maʼrifiy faoliyatga
aloqador yangiliklar, eʼlonlar va barcha maʼlumotlar davlat tilida yuritilishi
yo‘lga qo‘yildi.
Bundan
tashqari, tibbiyot taʼlimi muassasalari o‘quvchi va talabalar o‘rtasida o‘zbek
tili bo‘yicha puxta bilimlarni rivojlantirish, ularning dunyoqarashini
kengaytirish, sof o‘zbek tilida gapirish va imlo xatolarisiz yozishni shakllantirish
maqsadida “Mening ona tilim — buyuk tilim”, “Ona tili — millatning ruhi”, “Ona
tilim — jonu dilim”, “Buyuk tilim — millatim ko‘zgusi” kabi mavzularda maqola
va insholar tanlovlari o‘tkazish anʼana tusiga kirdi. Talaba yoshlarga o‘zbek
adabiy tili tarixini o‘rgatish maqsadida Alisher Navoiy nomidagi Adabiyot va
sanʼat muzeyiga, taniqli adiblarimizning uy-muzeylariga tashriflar tashkil
etilyapti.
Tibbiyot
taʼlim muassasalarida tahsil olayotgan 2-kurs talabalarining o‘quv dasturiga 36
soatlik “Badiiy adabiyotda tibbiy mavzu kursi” kiritilgani ham mazkur tizimda
tilimizning mavqeyini mustahkamlash yo‘lidagi saʼy-harakatlar natijasidir.
Nofilologik OTMlar kabi tibbiyot taʼlimi muassasalarida ham 2020-2021-o‘quv
yilidan boshlab O‘zbek tili kafedralari tashkil etilib, o‘zbek tilini o‘rganish
bo‘yicha maxsus kurslar joriy etilmoqda.
Vazirlik
tasarrufidagi o‘n ikkita oliy va yetmish to‘rtta o‘rta tibbiy taʼlim
muassasasining tillar kafedralari qoshida tashkil etilgan “Yuzma-yuz” va
“Nishona” to‘garaklari tomonidan o‘zbek tiliga doir bilim berish bilan birga,
yoshlarni qiziqtiruvchi turli ijodiy kechalar, mushoiralar tashkil etilayotgani
yoshlar ongiga davlat tilining boy va nafis jozibasini yetkazish, davlat tilini
yana-da rivojlantirish hamda unga bo‘lgan ijobiy munosabatni
barqarorlashtirishga xizmat qilishi aniq.
Tarixiy
tajribalar shuni ko‘rsatadiki, tilni saqlash, uning mavqeini ko‘tarishda xalq
birligi juda muhim. Mana shu birlik bo‘lmasa, har qanday millat tilini
halokatdan saqlab qolish imkoniyati zaiflashib, milliy davlatchilikka putur
yetishini barchamiz anglab yetishimiz zarur. Ana shundagina tilimizni tom
maʼnoda davlat tili darajasiga ko‘tarish faqat soha mutasaddilarining emas, har
birimizning sharafli vazifamiz ekanini chuqur his qilamiz.
O‘rol ABILOV,
Sog‘liqni
saqlash vazirining maslahatchisi