- Bosh sahifa
- Maqolalar
- Endi gazeta o‘qimaymizmi?..
Endi gazeta o‘qimaymizmi?..
Juda murakkab kechayotgan kabisa yilimiz barcha
sohalar kabi ommaviy axborot vositalari, ayniqsa gazetalar tahririyatlari
muammolarini keskinlashtirib yubordi.
Koronavirus pandemiyasi sababli joriy etilgan transport harakati
cheklovlari, shuningdek gazeta va jurnallar savdosiga ixtisoslashgan
kiosklarning uzoq muddat yopilishi chop etilgan nashrlarni obunachilarga va
o‘quvchilarga o‘z vaqtida yetkazib berilishiga to‘siq bo‘ldi.
Ana shu kutilmagan favqulodda holat vaziyatisiz ham yildan-yilga adadlari
kamayib borayotgan gazetalar tahririyatlarining moliyaviy ahvoli yanada
abgorlashdi. Chunki ularning chakana savdo tushumlaridan tashqari reklamadan
olayotgan daromadlari ham nihoyatda kamayib ketdi. Chunki reklama beruvchilar
ham o‘ta murakkab moliyaviy inqirozni boshidan kechirayotganlari yaxshi ma’lum.
Oqibatda qator, hatto partiyalarning, viloyat va shahar hokimliklarining
gazetalari ham chiqmay qoldi. To‘g‘ri, ularning aksariyati o‘z nashrlarini
elektron tarzda taqdim etishni davom ettirmoqdalar. Ammo minglab o‘quvchilar
qo‘llariga gazeta olmasliklariga odatlanib ham qoldilar.
Axborot texnologiyalari va kommunikatsiyalarini rivojlantirish vazirligi
ma’lumotlariga ko‘ra, bugungi kunda mamlakatimiz aholisini internet bilan
qamrab olish 97 foizni tashkil etgani, ularning 78 foizi keng zonali mobil
internetdan foydalanish imkoniyatiga egaligiga qaramasdan, gazetalarning
elektron shaklining o‘quvchilari ko‘p sonli emas. Ya’ni jurnalistlarning
mashaqqatli ijodiy mehnatlari mahsuli uning iste’molchilariga kutilgan darajada
yetib bormayapti.
Umuman, internetning har bir xonadonga kirib borayotganligi tufayli
kundalik bosma nashrlarning uzil-kesil inqirozga yuz tutishi muqarrarligi
to‘g‘risidagi bashoratlar mana o‘n yildan ko‘proq vaqtdan beri qizg‘in
munozaralar mavzusiga aylangan. Ayniqsa, COVID-19 pandemiyasi bu muammo
yuzasidan dolzarb amaliy ahamiyat kasb etdi.
Ochiq ma’lumotlardan mamlakatimizda 2020-yil boshida chiqib turgan
gazetalarning nechtasi qog‘oz shaklida nashr etilishi to‘xtatilganligiga
oydinlik kiritish imkoniyati topilmadi. Ammo bu faqat O‘zbekistonga emas, balki
butun dunyo uchun xos xususiyat ekanligi ayon.
Masalan, Rossiyada keyingi o‘n yilda (2009-2019) davriy bosma nashrlarining
soni 40 foizga kamaygan – 72 498 tadan 47 883 taga tushib qolgan. Bu
nashrlar tahririyatlarining daromadlari yiliga 8-10 foizga pasayib bormoqda.
Shuningdek, Umumjahon gazeta va axborot-noshirlik assotsiatsiyasi (WAN-IFRA)
ma’lumotlariga ko‘ra, keyingi besh yil davomida AQSHda gazetalarning adadi -
34, Fransiya va Buyuk Britaniyada – 31, Germaniyada – 24 foizga kamaygan.
Turkiyada keyingi o‘n yil davomida tahririyatlar o‘z o‘quvchilarining taxminan
yarmini yo‘qotdi: mamlakatdagi gazetalarning umumiy adadi 2,24 milliard
nusxadan 1,18 milliard nusxaga tushib qoldi.
Qozog‘iston Jurnalistika akademiyasining akademigi Asilbek Bisenboyevning
fikricha, 2020-yil oxirigacha mamlakatdagi bosma OAVlarning 40 foizi o‘z
faoliyatini to‘xtatishga majbur bo‘ladi. Faqat davlat hamda oligarxlar
guruhlari tomonidan moliyalashtirilayotgan gazetalargina saqlanib qoladi.
- Koronavirus – haftalik “muqobil” (ya’ni bepul) gazetalar uchun eng
qudratli qurol bo‘ldi, - deb hisoblashmoqda Garvard universiteti huzuridagi
Jurnalistikani rivojlantirish bo‘yicha Niman jamg‘armasi tadqiqotchilari. –
Bunday gazetalar AQSH va Kanadaning deyarli har bir yirik shahrida chiqib
turgan edi. Ular faqat reklama hisobiga kun ko‘rardi va asosan mahalliy
yangiliklar, madaniy hayot haqida yozishardi, jurnalistlar surishtiruvlarini
olib borishardi. Ularning mualliflari ko‘p marta jurnalistika sohasida AQSHning
nufuzli Pulitser mukofotiga ham sazovor bo‘lganlar. Ammo pandemiyadan keyin
ular o‘z faoliyatlarini tiklay olishlari amri mahol, chunki yirik homiylari
ham, qora kunga mo‘ljallab saqlab qo‘ygan sarmoyalari ham yo‘q.
Bozor iqtisodiyoti – beshafqat. Bu bozorda, shu jumladan ommaviy axborot
vositalari bozorida ham kuchlilar (moliyaviy jihatdan, dolzarblik,
innovatsiyalar, tezkorlik asosida) ustun chiqadi. Ana shu mezonlar nuqtai
nazaridan yondashiladigan bo‘linsa, milliy davriy bosma nashrlarimiz o‘z
faoliyatlarini davr talabiga hamohang tarzda tubdan o‘zgartirishda,
fikrimizcha, sustkashlik qilayotganlari yaqqol sezilib qoldi.
Prezidentimiz Shavkat Mirziyoyev ana shu muammolarni shu yil matbuot va
ommaviy axborot vositalari xodimlariga yo‘llagan tabrigida ham ko‘rsatib berdi:
“Albatta, bugun biz hamma sohada, jumladan, ommaviy axborot vositalarini
rivojlantirish borasida ham izlanishdamiz. Binobarin, bu yo‘lda yutuqlar bilan
birga, kamchilik va nuqsonlar bo‘lishi ham tabiiydir.
Bu haqda gapirganda, milliy media maydonimizda zamonning o‘tkir talab va
mezonlari, eng muhim tendensiyalarini ochib berish, tanqidiy tahlil, odamlar
kutayotgan mavzu va muammolarni dadillik bilan o‘rtaga tashlash hali ham
yetakchi o‘rin egallamayotganini aytishga to‘g‘ri keladi. Afsuski, aksariyat
axborot vositalarida ijtimoiy salmog‘i yengil bo‘lgan, hisobot va
balandparvozlik ruhidagi materiallar hanuz ustunlik qilmoqda”.
Davriy bosma nashrlar yangiliklar, hodisa va voqealarni o‘sha zahotiyoq,
to‘g‘rida-to‘g‘ri o‘z o‘quvchisiga yetakzib beradigan Internet bilan
tezkorlikda bellasha olmasligi aniq. Ammo hanuzgacha gazetalarimiz sahifalarida
ko‘pincha hammaga allaqachon ma’lum bo‘lgan axborotlarga duch kelaverasiz.
Bunday materiallarni gazetxonga taqdim etaverish bilan ular ishonchini qozonish
qiyin. Shu sababli ayrim o‘quvchilar gazetani o‘qib chiqishim uchun
sarlavhalarni ko‘zdan kechirishim kifoya qiladi deyishlari bejiz emas.
Shunday ekan, mamlakatimizda davriy bosma nashrlarning hozirgi murakkab
muammolarini qanday hal etish, gazetalarning ertangi kundagi taqdiri xususida
nima deyish mumkin. Agar yana xorij tajribasiga murojaat qilinadigan bo‘lsa,
bevosita koronavirus pandemiyasi vaziyatida davriy bosma nashrlarni
qo‘llab-quvvatlash bo‘yicha e’tiborga sazovor misollarni keltirish mumkin.
Kanada ma’murlari davlat byudjetida ommaviy axborot vositalarida reklama
uchun ko‘zda tutilgan 40 million dollarning 30 millionini milliy gazetalarda
qo‘shimcha reklamalar e’lon qilish uchun sarfladi.
Italiya va Ispaniya hukumati koronavirus pandemiyasi
sababli qat’iy karantin e’lon qilingan davrda ham gazeta va jurnallar savdosini
aholi uchun birinchi darajali ehtiyoj deb hisoblab, ular kiosklarini yopib
qo‘yishmadi.
O‘zbekistonda ham davriy bosma nashrlar o‘z o‘quvchilariga vaqtida yetib
borishi uchun zarur chora-tadbirlar ko‘rilmoqda. Bu haqda
“O‘zbekiston pochtasi” aksiyadlorlik jamiyatining bosh direktori Alisher Fayzullayev
quyidagilarni ma’lum qilgan:
- Gazeta yetkazish — bu ma’rifat, ma’naviyat yetkazib berish demak. O‘n
kundan keyin, bir oydan keyin qo‘lga yetib borgan gazeta hech kimga kerak emas.
Vaqtida yetkazib berish kerak, bu dolzarb masala. Bu sohada ham o‘zgarishlar
bo‘lishi rejalashtirilgan, markazlashtirilgan tizim bo‘ladi.
Pochta, shuningdek, matbaa nashrlari uchta hudud - Termiz, Urganch va
Nukusga samolyotda yetkaziladi. Qolgan viloyatlarga mashinada yetkaziladi,
kechasi chiqib ketadi, ertalab boradi.
Yaqin-yaqingacha kelgan pochta keyin tuman markaziga peshingacha yetib
borardi. Tuman markazidan aloqa bo‘limiga olib borib, egasining qo‘liga
yetkazilgunicha ertasi kuni bo‘lib ketishi mumkin edi.
Endi biz bosma davriy nashrlarni tuman markazidan to‘g‘ridan-to‘g‘ri
yetkazib berishni rejalashtirganmiz. Matbuot nashrlarini yetkazib berishni
tezlashtirish maqsadida ularni obunachining manziliga markazlashgan holda
amalga oshirishni takomillashtirish bo‘yicha elektroskuterlar va
velosipedlardan foydalanish mo‘ljallangan. Ushbu tajriba ayni paytda Farg‘ona,
Andijon va Namangan viloyatlarida sinovdan o‘tkazilmoqda. 2021-yildan boshlab
gazeta va jurnallar butun mamlakat bo‘ylab shunday tartibda yetkaziladi.
Shahar joylarida avtomatik pochtomat qurilmalarini joriy etish ham ko‘zda
tutilgan. Oldin, jumladan to‘qqiz qavatli uyga kiraverishda pochta qutisi
bo‘lardi, gazeta shuning ichiga solib ketilardi. Hozir ular yo‘q. Pochta
xizmatchilari to‘qqizinchi qavatgacha chiqadi, eshigingizni taqillatadi, hech
kim ochmagandan keyin qaytib ketadi yoki eshigingiz tagiga qo‘yib ketsa, birov
ko‘tarib ketishi mumkin bo‘lardi.
Endi esa o‘sha joylarda pochtomat qurilmalari o‘rnatish rejalashtirilgan. U
avvalgi pochta qutisidan farq qiladi. Qurilma katta kurerlik jo‘natmalari uchun
ham moslashtirilgan. Pochtomatni faqat maxsus parollar bilan ochib olish mumkin
bo‘ladi.
“O‘zbekiston pochtasi” aksiyadorlik jamiyati bu yil veb-saytida onlayn
obuna bo‘lish imkoniyatini ham yaratgan. Obunaga to‘lovni “Payme" to‘lov
tizimi orqali masofadan turib amalga oshirish mumkin.
Davriy bosma nashrlari axborot-kommunikayiya texnologiyalari jadal
rivojlanayotgan bugungi kunda OAV bozorida raqobatbardosh bo‘lishlari uchun,
aftidan, o‘z shakllarini o‘zgartirishlari talab qilinmoqda. Pandemiya holatiga
qaramasdan, masalan, “Darakchi” haftaligi va uning ilovalari o‘z
faolityatlarini muvaffaqiyatli davom ettirmoqdalar.
Gazetalar yangiliklar, xabarlar va voqealarni o‘z o‘quvchilariga yetkazib
berishda internet bilan raqobatbardosh bo‘la olmas ekan, nashr etish shaklini
haftalikka o‘tkazish, ehtimol to‘g‘riroq bo‘lar. Bu holda
jurnalistlar gazetxonlarga eskirib bo‘lgan kechagi kungi voqea-hodisalarni
emas, balki obunachilarini qiziqtira oladigan dolzarb, qiziqarli, tahliliy,
publitsistik materiallarni taqdim etish imkoniyatiga ega bo‘lishlari mumkin.
Umuman, davriy bosma nashrlari muayyan sohaga ixtisoslashishi maqsadga
muvofiq bo‘lardi, degan fikrdamiz. Jumladan,
mamlakatimizda xalqaro mavzular chuqur va keng yoritib boriladigan nashrga
ehtiyoj bor, deb o‘ylaymiz. Yoki millionlab avtomobil egalari bor yurtimizda
bevosita ularni qiziqtira oladigan maxsus avtohavaskorlar haftalik gazetasining
istiqboli yo‘q, deb o‘ylaysizmi? Huddi shuningdek tomorqa xo‘jaliklari uchun
haftanoma nashr etilsachi? Bu ro‘yxatni ancha davom ettirish mumkin.
Ya’ni aytmoqchimizki, gazetalardan yaqin-orada voz
kecha olmaymiz. Hamma
gap jurnalistlarimizning bugungi kun voqeligiga hamnafas bo‘lishida qolgan.
Erkin ERNAZAROV,
O‘zbekistonda
xizmat ko‘rsatgan jurnalist
"uza.uz" saytidan olindi