- Bosh sahifa
- Maqolalar
- Baliqdan balchiqqa, balchiqdan Balxashga
Baliqdan balchiqqa, balchiqdan Balxashga
Etimologiya juda qiziqarli
soha. So‘zlarning boshidan kechirganlari, sarguzashtlari haqidagi fan deyish
mumkin. Biror so‘zning tarixini o‘rganib, qiziq hikoya o‘qiganday bo‘lasiz. Bal o‘zakli so‘zlar ham ana shundaylar
sirasiga kiradi.
Shavkat Rahmatullayev
qalamiga mansub “O‘zbek tilining
etimologik lug‘ati” kitobida aytilishicha, bal qadimgi turkiy tilda namlik,
suv maʼnosini anglatgan. Baliq so‘zi bal so‘ziga -i (qisqa i) qo‘shimchasini
qo‘shib feʼl yasash, so‘ng unga -q qo‘shimchasini qo‘shish orqali hosil
qilingan va suvda yashaydigan jonivor maʼnosini anglatgan.
Baliq so‘zi turli fonetik
o‘zgarishlarga uchrab, bir qancha slavyan va bolqon tillariga o‘tgan. Jumladan,
bolgar, serb, rumin, rus, ukrain kabi tillarda baliq va uning turi maʼnosini
beradi. Volga va Don daryolari havzalarida Baliqli nomli bir nechta daryo va
irmoqlar bor.
Balchiq so‘zi ham xuddi
shu o‘zakdan. “Tuproqning suyuq loy holati” maʼnosini ifodalovchi bu ot bal
so‘ziga kuchaytirish maʼnosini ifodalovchi -chi va -q qo‘shimchalarini qo‘shish
orqali yasalgan.
Eski Moskvada Balchuk
nomli tuman bor ekan. Balki, bu hudud bir paytlar doim loy-balchiq bo‘lib
yotgandir. Olimlar bu toponim etimologiyasini turkiy balchiq so‘zi bilan
bog‘lashadi.
Balxash – Qozog‘istondagi
ko‘l nomi. Balxash so‘zining ildizi ham bal o‘zagiga boradi. Mashhur tilshunos
Maks Fasmerga ko‘ra bu ko‘lning nomi yo‘sin bilan qoplangan botqoq joy, botqoqdagi yo‘sin,
balchiq, loy maʼnolarini beradi. Yo‘sin bu – zax yerlarda, hatto tosh va
daraxtlar ustida ham paydo bo‘lib qoladigan, yuzani qoplab oladigan mayda
yashil o‘simlik.
Qardosh turkiy tillarda
bal o‘zakli boshqa so‘zlar ham bor.
Qadimiy turkiy tilda shahar, kent maʼnosidagi baliq so‘zi keng qo‘llangan. Lekin u shakldosh, xolos, aslida umuman boshqa so‘z. Xonbaliq, Bo‘rbaliq, Beshbaliq kabi toponimlarda aynan ana shu baliq ishlatilgan.
Orif Tolib sahifasidan olindi