- Bosh sahifa
- Maqolalar
- «OMON YOR» QO‘SHIG‘INING PAYDO BO‘LISHI…
«OMON YOR» QO‘SHIG‘INING PAYDO BO‘LISHI…
Biz yaxshi bilgan o‘sha "Omon yor" — u
"bosmachi" deb atalganlar taqdiriga bog‘liqmi?
Omoncha ingrasangchi, Omon yor, Belingni bog‘lasangchi, Omon yor. Belingni
bog‘lab olib, Omon yor, Jo‘ramlab yig‘lasangchi, Omon yor...
«Omon yor» qo‘shig‘ini
barchamiz o‘zbek milliy qo‘shig‘i sifatida yaxshi bilamiz. Ammo nega
"Omoncha ingramoqda, jo‘ramlab yig‘lamoqda?" Shunday raqsbop
qo‘shiqqa o‘yin-kulgini, juda bo‘lmasa, hajvni ifodalovchi so‘zlar mos tushmas
edimi? Yo‘q tushmas edi! Chunki bu qo‘shiq tor bilan o‘yinga chorlovchi
sho‘xlikni emas, qalbni zirillatib, yig‘latuvchi qayg‘uni, millat dardini
o‘zida ifoda etadi.
«OMON YOR»DAGI OMON POLVON
KIM?
Omon polvon Mavlonqul o‘g‘li
1856-yil Namangan viloyati, Xizrobod (Qizil Rabot) qishlog‘ida o‘rtahol dehqon
oilasida tug‘ildi. Bolaligidan bir so‘zli, mard yigit bo‘lib ulg‘aydi. Kurash
tushib, ot choptirib, elning nazariga tushdi. Xalqning hurmatini qozongan Omon
polvon Qo‘qon xonligining eng taniqli eshonlaridan Hoji Muhammad Aminbekning
fatvosi oladi va mirobboshilikka tayinlanadi.
Aytishlaricha, chor-atrofda
dong‘i chiqqan Omon Qo‘qon tomonda katta bir uloqda yutqazib, uloqni oldirib
qo‘yadi. Ikki oti bilan ham quruq qaytgach, sheriklarini tashlab ortga qaytadi.
U Baliqchi degan hududga yaqinlashganda, yigitlari bilan Andijondan qaytayotgan
yangi hokim - yosh Turdali boyvachchani ko‘rib qoladi. Ularga yetib kelgach,
salomlashib, «Bek, otlarim yaramadi, samaningizni bering, sha’nimni tiklab
olay», deydi. Uzoq yo‘ldan o‘zi ham, oti ham terlab-pishgan Omon polvonga bek
otidan tushib, shartta jilovini qo‘liga tutqazadi. Hamrohlari
bekka «Shunday qimmat otni bir og‘iz so‘zga bervordingiz-a», deyishadi. Bek
esa, "Omon polvon oldimizga umid bilan kelayotgan edi. Xudo manzilini
yaqin qildi, yo‘limizdan chiqdi. Bizga polvonni sha’ni kerak. U yurt sha’nini
himoya qiladi. Bu bir ot xolos, yigitning sha’ni ming otdan qimmat
turadi", degan ekan.
Shunday qilib Omon polvon
samanni minib, Qo‘qon tomonga choptirib ketadi. Uloqning so‘ngida eng katta
yutuqlarini qo‘lga kiritib, g‘oliblik bilan qaytadi...
MILLIY OZODLIK UCHUN
JANG...
1918-yil Turkiston muxtoriyati
qonga botirildi, bolshevik qizil askarlari va arman doshnoqlarining qirg‘in barotlari
avj oldi, el qoni to‘kildi... Shunday taloto‘p zamonda Qizil Rabot qishlog‘ida
ariq oqsoqoli bo‘lgan Omon polvon xalq himoyasi uchun qo‘liga qurol tutishga
majbur bo‘ladi. Zarxonga kelgan piri Hoji Muhammad Aminbek eshon Omon polvonga
miltiq va bir necha yigit beradi. Shuningdek, qo‘rboshi unvoni va xalqdan soliq
yig‘ib olish huquqini beruvchi fatvo yozib, o‘z muhrini bosadi. Shundan so‘ng
Omon polvon ham Turkiston milliy ozodligi uchun hayot-mamot jangiga kirgan
istiqlolchilar safidan o‘rin oldi. U Farg‘ona vodiysida qizil armiyaga qarshi
qurolli harakat boshlagan 9 nafar harbiy qo‘mondonning biriga aylandi. Avval
Muhammad Aminbekning buyrug‘i bilan Namangan-Andijon o‘rtasidagi temir yo‘lni
buzdi. Muhammad Aminbekning Namanganga yurishida ishtirok etib, yigitlari bilan
Namangan shahrining vokzal tomonini qizil askarlardan tozalashga bosh-qosh
bo‘ldi.
To‘raqo‘rg‘onlik Dadaboy qo‘rboshi va uychilik Maqsud qo‘rboshilar uning
eng yaqin safdoshlari edi. Bundan tashqari, yana o‘nlab mayda o‘zbek va qirg‘iz
qo‘rboshilarga rahbarlik qilib, jami yigitlari soni 2500-3000 nafarga borardi.
Madaminbek shahid bo‘lganidan so‘ng, Shermuhammadbekning rahbarligi ostida
bo‘ldi. 1922-yilda Omon polvon Mavlonqul o‘g‘li Norin daryosidan Chustgacha
bo‘lgan hududlarni o‘z nazoratiga oladi. Biroq harbiy qonunlarni nazar-pisand
etmagan bolshevik ma’murlari uni sindirish uchun har qanday tubanlikdan
qaytmadilar. Avval, doimiy qochqinlardan toliqqan turmush o‘rtog‘i Qorasoch
begimni, so‘ng uni qidirib kelgan yagona o‘g‘lini hiyla bilan hibsga oladi.
Shunda Omon polvon "bitta-yu bitta o‘g‘lim, shuni qaytarib bersalaring
berdinglar, bo‘lmasa, hammangning kallangizni olaman", deb tahdidli
xitobnoma yo‘llaydi. Kechga yaqin ikki qizil askar avval ayolini, so‘ng
o‘g‘lini qaytarib olib keladi. Biroq sovetlarning tinimsiz fitnalari va og‘ir
sharoit yigitlarni o‘ta toliqtirgan edi...
ADOVAT VA XIYONAT QURBONI
Omon polvon shunday kunlarning birida sobiq do‘sti mullo Nurqul
mirobboshining "yarash oshi" taklifiga rozi bo‘ladi. Aslida mullo Nurqul
ancha vaqtdan buyon maxsus bo‘limdan qurol-yarog‘ va buyruq olib, Omon
polvonning iziga tushgan edi. Yaqubbek ham mullo Nurqulning fitnasiga rozi
bo‘lib, xiyonat yo‘lini tutadi. Ular 1923-yil 24-may kuni qo‘rboshi Omon
polvonni hukumatga topshirishga qaror qiladi. Bu xiyonatdan xabar topgan Bayoz
qo‘rboshi Yaqubbekdan Omon pahlavonni qo‘yib yuborishini talab qiladi. Biroq bu
vaqtda Yaqubbekning akasi Ahmadbek allaqachon qizil askarlarni boshlab kelgan
edi. Shu tariqa kurash va uloqlarda halol g‘alabasi bilan xalq olqishini olgan,
janglarda jon olib, jon berib, dushmanlarining ham e’tirofini topgan Omon
polvon makr-hiylaning, adovat va xiyonatning qurboni bo‘ldi. 1923-yil 27-may kuni Omon polvonni topshirganligi
evaziga katta unvon va imtiyozlar ilinjida garnizonga borgan Yaqubbek Parpiboy
o‘g‘li ham yigitlari bilan hibsga olindi...
OMON POLVONGA
QARSHI BO‘HTONLAR...
Mullo Mirzo Ali «Farg‘ona» gazetasida Omon pahlavonni
"olabo‘ji" qilib ko‘rsatib, maqola yozadi. «Qo‘rboshi Omon polvonning
ushlanishi haqida» nomli maqolada uni «har kunda 20-30 begunoh fuqaroning
boshini kesar edi», deb ta’riflaydi. Hattoki Olabuqalik qirg‘izlardan mullo
Nurqul mirobboshi afandi O‘rozali hoji o‘g‘li degan kimsa hiyla bilan Omon
polvonni tutib, hukumatga topshirganini alqab she’r ham bitadi: Andijon, Oloy,
Xo‘qondan, Oshib yurgan Omondi. Jami otryad yetolmay, Shoshib yurgan Omondi.
Qomob berding Afandi! Yangiqo‘rg‘onda milisa, Yeta olmog‘on Omong‘a, Jami
otryad yig‘ilib, Ota olmag‘on Omong‘a, Kosondan chiqqan milisa, Tuta olmag‘on
Omong‘a, Kengash bilan osh qilib, Kirgizib qo‘yding Afandi...
1923-yil 11-iyun Namanganning «Sharq» teatri binosi Omon polvonning
sudini ko‘rishni istagan tomoshachilar bilan to‘ldi. Sud raisi, a’zolari,
qoralovchilar, hatto mudofaachilar bo‘lgan "sud teatri" uch kun davom
etdi. Omon polvon Mavlonqul o‘g‘li, Yaqubbek Parpiboyev, shuningdek,
Abdug‘affor Xoliqqulboyev, Otaqul Darvesh o‘g‘li, Hakimboy Abdiboy o‘g‘li,
Xudoyberdi Do‘stboy o‘g‘lilar qora kursiga o‘tqazildi. Son-sanoqsiz shohidlar go‘yoki,
Omon polvon tomonidan o‘ldirilgan insonlarning ayollari, onalari ularning
suratlarini ko‘tarib kelib, davo qildilar...
HUKM VA IJRO
“...Butun
kishilar oyoq uzra turgan holda ma’yublarning gunohlariga yarasha hukmlari
e’lon qilinur: 1-Omon polvon bosmachiliq tashkiloti tuzulg‘onidan beri qilg‘on
ishlarini birma-bir aytib chiqib, natijada jinoyat qonunining birinchi bobining
72-statyasiga muvofiq jazoga hukm qilinur. 2-Hakim Abdiboy o‘g‘li 3-Abdug‘affor
Xoliqquli o‘g‘li 4-Xudoyberdi Do‘stboy o‘g‘illari ham sud vaqtida bo‘yinlariga
qo‘yilgan ayblariga muvofiq mazkur hukm bilan jazoga mustahiq bo‘lsalar ham
lokin Abdug‘affor Xoliqquli boy o‘g‘li yosh bo‘lib ochiqdan ochiq bosmachiliq
qilmag‘oni uchun o‘z yurtidan to‘rt yil badarg‘a qilinib mulk va ashyosi
musodara qilinmoqg‘a; Xudoyberdi Do‘stboy o‘g‘li ham mulk – ashyosidan mahrum
qilinib 10 yil hibsga hukm qilindi. Ammo Omon polvon bilan Hakim Abdiboy
o‘g‘lilari jinoyat va qilg‘on gunohlari ortuq darajada bo‘lganlikdan butun bor
yo‘qlari musodara o‘zlarini otishga hukm qilinib, harbiy holatni nazarda tutub,
72 soat suroq berilmasdan hukm darhol ijro qilinur. Ammo Yaqubbek bilan Otaqul
Darvesh o‘g‘ullari ham bosmachiliq bilan ayblanganliklari sababli 72-moddaga
muvofiq hukmga mustahiq bo‘lsalar ham lokin gunohlari, ishlari ochuv
bo‘lmaganlik sababdan ishlarini butunlay haqiqat qilib chiqmoq uchun osobiy
otdelga topshirilur. Omon polvon bilan Hakim Abdiboy o‘g‘liga o‘z hukmlari
bildirilganidan keyin ikkovining qo‘lini orqasiga bog‘lab, o‘lim jazosidan
qutulg‘on ma’yublardan ajrotub osobiy otdelga keltirildi.
Bunda bir oz turganidan keyin Namanganning shimol tomonidagi adirga
qarab harakat qilindi. Otish marosimiga taxminan ikki mingdan ortiq xalq
tomoshog‘a chiqqan edi. Qabr Tayyor bo‘lganidan keyin ma’yublarni olib kelib
osobiy otdelning komendanti tomonidan Omonning bo‘yniga nagan bilan bir o‘q
qo‘yildi. U cho‘zulub qolg‘ondan keyin Hakimboyni to‘g‘rilab unga ham qo‘yildi.
Bundan keyin Omonga ikki o‘q – Hakimboyga bir o‘q otilib, qabrga tashlanub,
ustidan tuproq tortildi. Farg‘onadagi bosmachiliq harakatining olti yilliq bir
qahramoni bo‘lgan Omon polvon mojarosiga shuning bilan xotima berildi».
«Farg‘ona» gazetasidan olindi.
«OMON
YOR» QO‘SHIG‘INING PAYDO BO‘LISHI…
O‘sha vaqtlarning o‘zida Namangan va atrof qishloqlarida «Omon yor»
qo‘shig‘ining 9 turi el orasida paydo bo‘ldi. Ularning eng mashhurlari «Omon
yor», «Omoncha», «Omondor», «Omon-o», «Omon bor»lar bo‘lib, jumladan,
«Omonda tur, Omonda tur, Omon yor,
Inson bo‘lsang va’dangda tur,
Omon yor.
Omon ekan, Omon ekan, Omon
yor,
Shundoq qiziq zamon ekan, Omon
yor...»
«Omoncha» esa, Omon polvoning yigitlari orasida bo‘lib, vatan, din
va millat erki deb halok bo‘lgan farzandining xabarini eshitgan onaning tilidan
madh etildi. Yana bir turi «Omoni» bo‘lib
Omon polvoning tilidan:
Uchqo‘rg‘on yo‘ling qursun,
Ichmayman suving qursun.
Bek akamni o‘ldirgan,
Xolxo‘ja yuzing qursin...
Albatta, bu
qo‘shiqlarning har biri haqida uzoq muhokama qilish mumkin. Lekin bir narsa
aniqki, sho‘ro hukumati qanday talqin etmasin, ularning «bosmachilik» deb
nomlagan harakati chin ma’noda yurt istiqlol uchun hayot-mamot jangi, ularning
yetakchilari esa, chin ma’noda milliy qahramonlardir.
Bahrom IRZAEV,
tarix fanlari bo‘yicha falsafa doktori
uza.uz saytidan olindi
#ma'naviyat