- Bosh sahifa
- Maqolalar
- MILLATNING RUHI VA NURLI BOG‘ICHI
MILLATNING RUHI VA NURLI BOG‘ICHI
O‘zligimiz ko‘zgusi
So‘nggi yillarda mamlakatimizda ona tilimizning
rivoji, ravnaqi, barqarorligi yo‘lida bajarilayotgan keng qamrovli ishlarni o‘z
ko‘zimiz bilan ko‘rib, kuzatib, ishtirokchisiga aylanib turibmiz. Poytaxt
Toshkentda ham bu borada samarali ishlar olib borilmoqda.
Shahar ko‘chalarida qad rostlagan ulkan inshootlar,
ko‘rkam binolar nomlanishidagi xatoliklar, xorijiy tillarda yozilgan g‘aliz
jumlalar, peshlavhalardagi tushunarsiz holatlarni bartaraf etish bugungi
kunning eng dolzarb vazifasi. Bu borada tuman hokimlarining davlat tili
masalalari bo‘yicha maslahatchilari tomonidan tizimli ishlar yo‘lga qo‘yilgan.
Tuman hokimining maʼnaviy-maʼrifiy ishlar
samaradorligini oshirish, davlat tili to‘g‘risidagi qonun hujjatlariga rioya
etilishini taʼminlash masalalari bo‘yicha maslahatchilari tomonidan bozor va
ko‘chalar, jamoat joylarida uchrayotgan reklama, tashqi yozuvlar muntazam o‘rganib
borilmoqda. O‘rganish jarayonidagi noxush holatlar uchun obʼekt egalariga
ogohlantirish xatlari berilib, tushuntirish ishlari doimiy ravishda olib
boriladi.
Amalga oshirilayotgan keng ko‘lamli ishlar
natijasida, Toshkent shahrining markaziy ko‘chalaridagi reklama bannerlari
qariyb to‘liq lotin yozuvida va davlat tilida taqdim qilinmoqda.
Shu o‘rinda yaqinda qabul qilinib, kuchga kirgan
reklama to‘g‘risidagi qonun ham davlat tilining nufuzini oshirishga bevosita
xizmat qilayotganini alohida taʼkidlamoqchiman. “Davlat tili haqida”gi qonun
talablariga ko‘ra, Toshkent shahri va tuman hududida joylashgan barcha bino va
inshootlarning nomlari, reklama eʼlonlari lotin alifbosiga asoslangan o‘zbek
tilida yozilishiga katta eʼtibor qaratilmoqda.
Ammo, afsuski hali hamon baʼzi tadbirkor va
ishbilarmonlar davlat tili to‘g‘risidagi qonun talablariga bepisandlik va
eʼtiborsizlik bilan qaramoqda. Bozorlar hamda maishiy xizmat ko‘rsatish
shoxobchalarida faoliyat yuritayotgan baʼzi bir tadbirkor va ishbilarmonlarning
o‘z ona tiliga bepisand munosabati, keng jamoatchilik vakillariga sezilarli
taʼsir qilishini alohida taʼkidlamoqchiman. Chunki, ular bevosita xalq bilan
muloqot qiladi, xalqning orasida bo‘ladi.
Yaqinda, O‘zbekiston Respublikasining “Reklama
to‘g‘risida”gi yangi tahrirdagi qonunning mazmun-mohiyatini targ‘ib etish,
yangi joriy etilgan norma – reklamalarning davlat tilida bo‘lishi, bu borada
jamoatchilik va deputatlik nazoratini kuchaytirishga doir davra suhbati bo‘lib
o‘tdi. Unda deputatlarning davlat tilining ijrosi va nazorati yuzasidan qizg‘in
fikr, mulohazalari, taklif va eʼtirozlari tinglandi.
Davlatimiz rahbari ham deyarli har bir chiqishlarida
yurtimizning dunyoga yuz tutmog‘i uchun eng avvalo, ona tilimizning nufuzini
yanada oshirish, milliy tilimizga bo‘lgan eʼtiborni kuchaytirish zarurligi
haqida ko‘p taʼkidlaydi. Darhaqiqat, til millat ko‘zgusi, erkin hayotimizning
nurli bog‘ichidir. Ona tilimizning namunasi o‘laroq, reklama to‘g‘risidagi
qonunning kuchga kirishi esa, ezgu ishlarmizning amaliy natijasi va davomi
ekanligi bugun, ayni haqiqatdir.
Reklama davlat tilining ko‘zgusi, davlat tilining
darajasini belgilovchi yaqqol vositasi desak, mubolag‘a qilmagan bo‘lamiz.
Ayniqsa, poytaxt ko‘chalarida katta va kichik LED ekranlarda yal-yal
tovlanayotgan turli xil mazmundagi reklamalar xorijdan O‘zbekistonga kelgan har
bir xorijlikning ham eʼtiborini tortishi turgan gap.
Bugun O‘zbekistonning turizm salohiyati yildan-yilga
ortar ekan, ona tilimizning barqarorligi, adabiy tildagi jamoaviy
muloqotlarning rasman yo‘lga qo‘yilishi xalqimiz kayfiyatiga ijobiy taʼsir
qilishini yoddan chiqarmasligimiz va qonun hujjatlariga rioya etilishini
taʼminlashimiz nihoyatda muhim.
Til sohasida olib borilayotgan izchil islohotlar,
amalga oshirilayotgan ezgu ishlar kelajak avlodni ham, yurtga sadoqat, milliy
qadriyatlarimizga hurmat ruhida tarbiyalashga, O‘zbekistonda davlat tilini
to‘laqonli joriy etilishi va taʼminlanishiga munosib hissa qo‘shishiga
chorlaydi.
Akmal RO‘ZITOYEV,
Toshkent shahri hokimi maslahatchisi