- Bosh sahifa
- Yangiliklar
- Tojikiston Milliy kutubxonasida «O‘zbek tilining izohli lug‘ati» kitobi taqdimoti bo‘lib o‘tdi
Tojikiston Milliy kutubxonasida «O‘zbek tilining izohli lug‘ati» kitobi taqdimoti bo‘lib o‘tdi
DUSHANBE, 20-avgust. /«Dunyo» AA/. Tojikiston Milliy
kutubxonasida «O‘zbek tilining izohli lug‘ati» kitobi taqdimoti
o‘tkazildi, deb xabar bermoqda «Dunyo» AA muxbiri.
Mazkur tadbir mamlakatimizning Dushanbedagi elchixonasi tomonidan
Tojikiston Milliy kutubxonasi rahbariyati bilan hamkorlikda tashkil
qilindi.
Lug‘at besh jilddan iborat bo‘lib, O‘zbekiston Respublikasi Vazirlar
Mahkamasining Davlat tilini rivojlantirish departamenti tashabbusi bilan
O‘zbekiston Fanlar akademiyasining bir guruh olimlari tomonidan
tayyorlangan.
Taqdimotda «O‘zbek tilining izohli lug‘ati»ni yaratish bo‘yicha olib
borilgan izlanishlar, o‘zbek tilining xalqaro maydonda tutgan o‘rni va
mohiyatini yuksaltirishda lug‘atning tutgan o‘rni haqida batafsil
ma’lumot berildi.
— Bugungi tadbir uchun O‘zbekiston elchixonasiga minnatdorlik
bildiramiz, — dedi Tojikiston Milliy kutubxonasi direktori
J.Fayzalizoda. — «O‘zbek tilining izohli lug‘ati» kitobini O‘zbekiston
tomonidan Tojikistonning Milliy kutubxonasiga sovg‘a qilinganidan
xursandmiz. Ushbu lug‘at Tojikistonda o‘zbek tilini o‘rganuvchilar va
ushbu tilda so‘zlashuvchilar uchun muhim manba bo‘lib qoladi.
“O‘zbek tilining izohli lug‘ati” Tojikiston Milliy kutubxonasining
xorijiy kitoblar va qo‘llanmalar bo‘limidan joy oldi. Shuningdek,
kitobxonlar kutubxona sayti orqali lug‘atning elektron nusxasini
ko‘chirib olishlari, unda foydalanishlari mumkin bo‘ladi.
Uchrashuv chog‘ida O‘zbekiston bilan Tojikiston o‘rtasida
madaniy-gumanitar sohalarni yanada rivojlantirish maqsadida Tojikiston
Milliy kutubxonasi va Alisher Navoiy nomidagi O‘zbekiston Milliy
kutubxonasi o‘rtasida hamkorlik memorandumimi imzolash yuzasidan fikr
bildirildi.
Tojikiston tomoni hamkorlikning huquqiy asosi ikki kutubxona
aloqalarining yanada yuksalishi hamda tajriba almashishni yo‘lga
qo‘yishga xizmat qilishini qayd etdi.
O‘z navbatida, O‘zbekiston elchixonasi vakillari ushbu rejalarni amalga
oshirish maqsadida hozirgi pandemiya bilan bog‘liq sharoitni inobatga
olgan holda ikki kutubxona vakillari uchrashuvlarini onlayn shaklda
o‘tkazish, unda barcha tashkiliy masalalarni kelishib olishni taklif
qildi.
Hamkor tomon ushbu g‘oyani qo‘llab-quvvatlab, onlayn uchrashuv kuni va
mavzusi bo‘yicha batafsil ma’lumot taqdim etishini ma’lum qildi.
Manba: “dunyo.info”
sayti
Bizning faoliyatimizni kuzatishda davom eting!
Bizning manzil:
http://til.gov.uz/uz/ | https://t.me/dtrdep