- Bosh sahifa
- Yangiliklar
- Rossiyaning Novosibirsk shahrida “Til millat ko‘zgusi: O‘zbekiston” mavzusida tadbir bo‘lib o‘tdi
Rossiyaning Novosibirsk shahrida “Til millat ko‘zgusi: O‘zbekiston” mavzusida tadbir bo‘lib o‘tdi
O‘zbekiston Respublikasining
Novosibirsk shahridagi Bosh konsulxonasi, Tashqi mehnat migratsiyasi
agentligining Novosibirsk shahridagi vakolatxonasi hamkorligida o‘zbek tiliga
davlat tili maqomi berilganining 31 yilligiga bag‘ishlab “Til millat ko‘zgusi:
O‘zbekiston” mavzusida madaniy-maʼrifiy tadbiri tashkil etildi, deb xabar
qilmoqda “Dunyo” AA muxbiri.
Rossiya fanlar akademiyasi qoshidagi
Davlat ilmiy texnika kutubxonasining Sibir bo‘limining konferens-zalida tashkil
etilgan anjumanda Novosibirsk viloyati hukumati, ommaviy axborot vositalari va
turli millat vakillari qatnashdi.
Tadbir O‘zbekiston milliy
urf-odatlari, turizm salohiyati hamda buyuk bobokalonlarimiz merosini targ‘ibot
etuvchi videorolik taqdimoti bilan boshlandi.
“Davlat tili haqida”gi qonun
qabul qilinishi o‘zbek xalqining maʼnaviyatini yuksaltirish, milliy
qadriyatlarni asrab-avaylash, ona tilni rivojlantirish, uning betakror jozibasi
va go‘zalligini keng namoyish etish borasida ulkan tarixiy voqea bo‘lgani
taʼkidlanib, O‘zbekiston Respublikasi Prezidentining o‘zbek tilini yana-da
rivojlantirish va til siyosatini takomillashtirish chora-tadbirlari
to‘g‘risidagi farmoni qabul qilinganiga eʼtibor qaratildi, uning
mazmun-mohiyati va ahamiyati haqida so‘z yuritildi.
Anjuman doirasidagi badiiy-musiqiy
dasturda o‘zbek xalqining buyuk shoir va mutafakkirlari, atoqli davlat va
jamoat arboblari Mir Alisher Navoiy, Zahiriddin Muhammad Bobur va boshqa
allomalar qalamiga mansub asarlardan namunalar o‘qildi, sahna ko‘rinishlari
namoyish etildi. Shuningdek, “Siz O‘zbekistonni bilasizmi?” viktorinasi, o‘zbek
tilidagi tez aytishlar kabi kichik musobaqalar ham tashkil etildi.
Rossiya Fanlar akademiyasi qoshidagi
Davlat ilmiy texnika kutubxonasining Sibir bo‘limiga besh jildli “O‘zbek
tilining izohli lug‘ati” taqdim etildi. Mazkur nashrni kutubxona direktori
Andrey Guskov qabul qilib oldi.
Bunday tadbirlar Sibir federal okrugidagi boshqa yirik shaharlarida ham o‘tkaziladi.
NOVOSIBIRSK,
21-oktabr. “Dunyo” AA