- Bosh sahifa
- Yangiliklar
- O‘zligimiz aks etgan chashma
O‘zligimiz aks etgan chashma
Til – milliy g‘ururimiz
Prezidentimiz Shavkat Mirziyoyev o‘zbek tiliga
davlat tili maqomi berilganining o‘ttiz yilligiga bag‘ishlangan tantanali
marosimdagi nutqida shunday taʼkidlab o‘tdi: “Dunyodagi qadimiy va boy
tillardan biri bo‘lgan o‘zbek tili xalqimiz uchun milliy o‘zligimiz va mustaqil
davlatchiligimiz timsoli, bebaho maʼnaviy boylik, buyuk qadriyatdir”. Ushbu
bebaho maʼnaviy boyligimizni asrab-avaylash va qadrlash borasida keyingi
yillarda juda katta ishlar olib borildi. Toshkent shahar va tumanlarida ham bu
borada eʼtiborga molik tadbirlar o‘tkazilib, davlat tili to‘g‘risidagi qonun
hujjatlariga rioya etilishi jarayonida mavjud bo‘lgan muammolar yechimini
topishda samarali natijalarga erishildi.
Mana 2021-yil ham kirib keldi. Zamon qanday
evrilmasin, qanday sinovlar bo‘lmasin, har qanday sharoitda ham til, maʼnaviyat
masalalari davlatimizning doimiy eʼtibor markazida bo‘ladi. So‘nggi yillarda
mamlakatimizda, o‘zbek tilining davlat tili sifatidagi nufuzi va mavqeyini
oshirish, mustahkamlash yuzasidan bir qator samarali ishlar amalga oshirildi.
Vazirlar Mahkamasining Davlat tilini rivojlantirish departamenti tomonidan jami
14 ta meʼyoriy-huquqiy hujjatlar, jumladan: 1 ta qonun, O‘zbekiston
Respublikasi Prezidentining 2 ta farmoni va 1 ta qarori, shuningdek, Vazirlar
Mahkamasining 10 ta qarori tayyorlandi va hayotga tatbiq etildi. Abdulla
Avloniy bobomizning “Milliy tilni yo‘qotmak – millatning ruhini yo‘qotmakdir”
taʼbiri bilan qaralsa, bu qonun, qaror va farmonlarning ahamiyati millatimiz
ravnaqi uchun qanchalik hayot va mamot masalasi ekanligi ayon bo‘ladi. Albatta,
aniq ko‘zlangan rejalarimizni davlatimiz rahbari tomonidan qabul qilingan
Farmon va qarorlar asosida amalga oshirib boramiz.
Qilingan ishlar haqida gapirsam, ko‘nglim to‘lganidan, to‘lmagan jihatlari ko‘proq desam xato emas. Aslida milliy til uchun faqat mutasaddilar emas, millatning har bir vakili masʼul bo‘lishi kerak.
Yorliqlarni o‘zbekchalashtiraylik, reklama
bannerlari davlat tilida bo‘lsin, degan harakatlar yiqilayotgan devorni
yamab-suvab qo‘yganday gap. Demakki, biz masalaning yuzasida yuribmiz. Ayniqsa,
ziyoli qatlam bu safning peshqadami bo‘lishi zarur va shart. Yaʼni, milliy ruh
ona sutidek insonning qon-qoniga singib ketishi kerak.
So‘nggi yillarda yurtdoshlarimiz qalbida,
ongida ona tilimizga munosabat keskin o‘zgardi. Atoqli adib Abdulla Qahhorning,
“Yo‘l qoidasini buzgan haydovchiga militsiya xodimi hushtak chaladi. Tilimiz
qoidasini buzgan kishiga esa nega hech kim hushtak chalmaydi”, degan gapi bugun
beixtiyor xayolimdan tez-tez o‘tyapti. Shu o‘rinda O‘zbekiston Respublikasi
Oliy Majlisi Qonunchilik palatasi deputati, zabardast yozuvchi Xurshid
Do‘stmuhammad taʼkidlagan ushbu fikrlarni keltirmoqchiman: “Davlat tili haqida
har kuni gapirish kerak, har xil gapirish kerak, hamma gapirishi kerak”!
Shu o‘rinda aytib o‘tish lozimki, ijtimoiy
tarmoqlarda davlat tili mutasaddilarga qarata aytilgan tanqidiy fikrlar keyingi
paytlarda anchagina “faollashdi”. Qay yo‘sinda bo‘lmasin, mulohazalar, turfa
fikrlar aytilayotgani shaxsan meni quvontiradi. Ha, keng jamoatchilik tomonidan
bildirilgan fikrlar xoh ijobiy va xoh salbiy bo‘lsin, minglab yurtdoshlarimizni
o‘zbek millatining jonu ruhi bo‘lgan tilimiz haqida qayg‘urishga, fikr
yuritishga, tortishishga, hatto jon kuydirishga chorlagani bilan quvonarlidir.
Bu kabi muhokamalar, davlat tili maqomida bo‘lgan ona tilimizga munosabatimizni
namoyon qiladi, taʼbir joiz bo‘lsa elakdan o‘tkazadi.
Chunki Ona tili – umummillat xazinasi ekan, demak til oldidagi masʼuliyat, javobgarlik ham umummilliydir. Tiynatida milliy g‘ururi, o‘zlik viqori bor, men o‘zbekman degan har bir inson o‘zbek tilini shak-shubhasiz sevishi, u uchun qayg‘urishi, zarur bo‘lsa jonini fido qilishi kerak. Binobarin, bu masala faqat ziyolilarning yoki tilshunoslarning ishi emas, shu millat shu vatanga daxldor barchamizning dardu quvonchimiz bo‘lishi shart va muhim. Davlat tili haqida chiqarilgan har bir qonun bu yo‘lda bizning madadkorimiz, sarbonimizdir. Shuningdek, chekka-chekka qishloqlarda yashayotgan keksa otaxonu onaxonlarimizdan tilimizga oid unutilib borayotgan so‘zlarni yozib olishimiz, ularni isteʼmolda qo‘llash choralarini ko‘rishimiz lozim. Bu masalani har birimiz butun bir millatning ishi deb qarashimiz, unutilgan so‘zlarni tiklashga hissa qo‘shishimiz, borini boyitib borishda faol ishtirok etishimiz darkor. Xalqimiz o‘z taqdiriga loqayd, milliy qiyofasiga befarq millat bo‘lib qolmasin.
Rivojlangan davlatlarning aksariyatini kuzatadigan bo‘lsak, davlat tili haqidagi qonunlari nisbatan keskinroq talablar asosida ishlab chiqilgan bo‘lib, Rossiya, Germaniya, Fransiya, Gruziya, Ozarbayjon, Turkiya va boshqa mamlakatlarda davlat organlari va rasmiy hujjatlarda belgilangan davlat tilidan majburiy foydalaniladi. Qonun talablariga amal qilmaganlik uchun turli miqdorda jarima belgilangan.
Shunday ekan, barchamiz
yurtimizda o‘zbek tilining davlat tili sifatida nufuzi va mavqeyini oshirish bo‘yicha olib
borilayotgan nihoyatda adolatli va o‘z o‘rnida qabul qilinayotgan muhim Farmon
va qarorlarni qo‘llab-quvvatlashimiz, ona tilimizning qadr topishiga intilayotgan
barcha ziyolilarga ko‘makchi bo‘lishimiz zarur. Xususan, mamlakatimizda ona
tilimiz ravnaqiga berilayotgan eʼtibor — milliy tiklanishdan milliy yuksalish
sari ildam borayotganimizdan dalolatidir. Haqiqatan ham har bir xalqning tili millat ruhi, taqdiri, kelajagi
hisoblanadi. Xalqning, millatning ravnaqi, avvalo, tilining mavqeуi bilan o‘lchanadi va belgilanadi. Insoniyatga
xos ezgu fazilatlar ham odamzod qalbiga avvalo til, ona allasi orqali kiradi.
Shu maʼnoda, Ona tilimizni asrab-avaylash, ulug‘lash har birimizning muqaddas
burchimizdir.
Garchi ayni jarayondagi muammolar haqida ko‘p
gapirilayotgan bo‘lsada, amaliy natijalar juda kamdek. Ayniqsa, yarim xorijiy,
yarim o‘zbekcha so‘zlashadigan yoshlar qatlami bo‘y ko‘rsatayotganidan ogoh
bo‘lishimi zarur.
Eng avval bog‘cha, maktab, institut,
universitetlar, adabiyot va sanʼat milliy tilimizning lokomotiviga aylanishi
zarur. Shuningdek, mamlakatdagi barcha maktab o‘qituvchilari
va murabbiylar davlat tili normalariga muvofiq so‘zlash va yozishi majburiy bo‘lishi
kerak. Qolaversa, internet, xususan ijtimoiy tarmoqlarni davlat tilidagi
maʼlumotlar bilan to‘ldirib borish juda muhim.
Endi kundalik hayotimizdagi odatga aylangan
“okey”, “trend”, “lichka” kabi xorijiy, g‘aliz iboralardan yarim, chala
ruscha-o‘zbekcha so‘zlashuvlardan soat sayin “qutulib” borishimiz lozim.
Bugun o‘zbek tili taqdiri haqida faqatgina davlatning o‘zigina emas,
o‘zbekman degan har bir inson qayg‘urishi, kurashishi, ona tilini chin dildan
sevishi o‘ta muhim masaladir. Biz mutasaddilarning faliyatimiz asnosida ana
shunday jonkuyar, fidoyi, millatparvar zamondoshlarimiz yordamiga hamisha
ehtiyojimiz bor.
Akmal RO‘ZITOYEV,
Toshkent shahar hokimining maslahatchisi
"Yangi O‘zbekiston" gazetasining 2021-yil 8-yanvar, 5-sonidan olindi