- Bosh sahifa
- Yangiliklar
- “Suv energiyasi” va yangilanib borayotgan atamalar
“Suv energiyasi” va yangilanib borayotgan atamalar
Til taraqqiyotida,
lug‘at tarkibida ilmiy-sohaviy atamalar ham o‘ziga xos o‘rin tutadi. Ilm-fan,
texnika, kasb-hunarning biror sohasiga xos aniq va barqaror so‘z yoki so‘zlar
birikmasi tilshunoslikda atama deb yuritiladi. Atamalar ham tilning boyish va rivojlanish
manbalari hisoblanadi. Chunki ilm-fan hamisha o‘sish va o‘zgarishda bo‘lib, til
lug‘atini yangilab, kengaytirib turadi.
So‘nggi yillarda
mamlakatimizda davlat tilini rivojlantirish borasida olib borilayotgan amaliy
harakatlar doirasida Atamalar komissiyasi faoliyati yo‘lga qo‘yildi. Shunga
ko‘ra, soha terminlari tizimini takomillashtirish, tartibga solish, o‘zlashgan
atamalarning o‘zbekcha muqobillarini shakllantirish, terminologiya bo‘yicha
lingvistik va leksikografik tadqiqotlar olib borish ishlari yanada aniq va
manzilli amalga oshirilishi belgilandi. Zamonaviy o‘zbek atamashunosligida
atama yasash va tanlash metodlari, ularning samarasi, qabul qilinayotgan
atamalarning adabiy til meʼyorlariga mos kelishi va faol qo‘llanishi,
atamalarning sohaviy qatlamlari yuzasidan yangi shakl va mazmundagi tadqiqotlar
ustida izlanishlar olib borish, amaliy tavsiyalar ishlab chiqish har qachongida
ham dolzarb ahamiyatga ega bo‘ldi.
Xususan,
gidroenergo sohasiga tegishli atamalarning lingvistik, leksikografik va
semasiologik xususiyatlarini tadqiq etish, o‘z va o‘zlashgan qatlamlari,
yasalish usullari va mavzuiy guruhlarini aniqlash, adabiy til va boshqa nutq
uslublarida qo‘llanishining o‘ziga xos jihatlarini o‘rganish, o‘zlashmalarning
muqobillarini yaratish o‘zbek tili taraqqiyotini taʼminlashga muayyan darajada
xizmat qiladi.
Tahlillar
ko‘rsatadiki, bugungi kunda gidroenergo sohasida qo‘llanib kelinayotgan
atamalarning asosiy qismini o‘zlashma so‘zlar tashkil etadi. Buni biz mazkur
tushunchaning o‘zidanoq aniq bilib olamiz: “gidro” – yunonchadan rus tili
orqali o‘zlashgan so‘z bo‘lib, “suv” degan mazmunni anglatadi, qo‘shma so‘zning
tarkibiy qismi sifatida suv yoki suv havzasiga oid tushunchalarni ifodalaydi.
“Energetika” so‘zi ham asli yunon tiliga mansub bo‘lib, rus tili orqali qirib
kelgan: fan, texnika, sanoat va umuman xalq xo‘jaligining turli ko‘rinishdagi
energiya ishlab chiqarish, uzatish va ulardan foydalanish bilan bog‘liq bo‘lgan
sohasini ifodalaydi. Ushbu ikki so‘z birikuvidan “gidroenergo” so‘zi hosil
qilingan, yaʼni “suv energiyasi”.
Gidroenergetika xalq
xo‘jaligining zamonaviy rivojlanayotgan, ishlab chiqarish ehtiyoji yuqori,
shuningdek, xalqaro hamkorliklar uchun keng imkoniyatlarga ega bo‘lgan sohasi.
Shu boisdan ham bu tizimda faoliyat taqozosiga ko‘ra, o‘zlashma, xususan, rus
tili va rus tili orqali kirib kelgan so‘zlar nisbatan faol qo‘llanadi: gidrogenerator,
gidrodinamika, gidrograf, gidroinshoot, gidrometrik, gidromexanika, gidromodul,
gidrotexnika, gidrotrubina, elektromontyor, elektroskop, elektrotexnik,
energetik, energosistema kabilar. Gidroenergetika tizimida suv
zahiralaridan oqilona foydalanish orqali elektr energiyasi olinishini eʼtiborga
olsak, ushbu soha atamalari “suv”, “energetika”, “elektr”, “qurilish”,
“mexanika” tushunchalari bilan bog‘liq so‘zlar asosiga shakllanganligi
oydinlashadi. Jamiyat hayotiga gidroenergetik tushuncha va hodisalar,
narsa-buyumlar, qurilmalar va inshootlarning kirib kelishi bilan o‘zbek tili
lug‘at tarkibida ham o‘sish va o‘zgarishlar sodir bo‘lib borayotganligi, ushbu
so‘zlar hisobiga til boyligi kengayganligini ko‘rishimiz mumkin.
Gidroenergetik atamalar
tizimida gidro va energetika mavzuiy sistemasi markaziy o‘rinni egallaydi va
quyidagi ichki guruhlardan tashkil topadi:
1) suv va suv xo‘jaligi bilan bog‘liq
tushunchalarni ifoda etuvchi atamalar;
2) elektr-energiya bilan bog‘liq tushunchalarni
ifoda etuvchi atamalar;
3) gidroenergetik qurilish materiallarini ifoda
etuvchi atamalar;
4) gidroinshootlar va gidroqurilmalarni
ifodalovchi atamalar;
5) suv va energiyadan foydalanish hamda
taʼmirlash jarayonlarini ifoda etuvchi atamalar;
6) soha mutaxassisliklari va faoliyat
jarayonlari bilan bog‘liq atamalar.
Bu atamalarni ham o‘z
navbatida yana bir necha ichki guruhlarga ajratish mumkin. Shu o‘rinda
taʼkidlash kerakki, gidroenergetika atamalari murakkab tarkibiy tuzilmalardan
iborat bo‘lib, ushbu jihati bilan til tizimining boshqa birliklaridan farqlanib
turadi. Bu sohada biz, xususan, sodda (kaskad, suv, daryo, nov,
zovur, to‘g‘on), qo‘shma (gidroloyiha, gidroinshoot, elektrstansiya,
gidrograf, elektromexanik), birikma (suv ombori, suv resurslari, drenaj
moduli, tik zovur, kapital qurilish), qisqartma (GES
(gidroelektrstansiya), UK (unitar korxona), AJ (atsiyadorlik jamiyati), MCHJ
(masʼuliyati cheklangan jamiyat)) shaklidagi atamalarni ham uchratamiz.
Ko‘rinadiki, o‘zbek tilining
gidroenergetik terminologiyasi o‘z lisoniy ko‘rsatkichlariga ega mikrotizim
sifatida til sistemasida alohida o‘rin tutadi. Bu esa gidroenergetika sohasida
qo‘llanilayotgan barcha atamalarni “suv energiyasi”ga xos birlashtiruvchi
sxemasi asosida “O‘zbek tilining gidroenergetik terminlari” mavzuiy guruhi
doirasida tizimlashtirish, izohli lug‘atlarini shakllantirish imkonini beradi.
Demak, rivojlanib borayotgan
bugungi tilshunoslik ilmida Gidroenergetika sohasiga taalluqli atamalarga doir
muammolar, ularning leksik-semantik va tarkibiy tuzilishi, shakllanish tarixi
va usullari kabi masalalar tadqiqiga ehtiyoj tug‘ilishi tabiiy. Bu o‘z
navbatida, atamashunoslikda Gidroenergetika terminlarining ham tarkibiy,
mavzuiy, semantik, leksikografik xususiyatlarini ilmiy tadqiq etish, sohaga
tegishli chet so‘zlarni qabul qilishda o‘zbekcha muqobillarini tanlash
zaruratini kun tartibiga qo‘yadi. Zotan, Gidroenergetika sohasida ham ish
yuritish, o‘qish va o‘qitish ishlarini to‘liq o‘zbek tilida olib borish, soha
atamalarini lingvistik tadqiq etish hozirgi o‘zbek tilining davlat tili
sifatidagi maqomi va nufuzini oshirish borasidagi milliy-amaliy harakatlarni
jadallashtirishga, tilimiz umrboqiyligini taʼminlashga sezilarli hissa bo‘lib
qo‘shiladi.
Surayyo PO‘LATOVA,
“O‘zbekgidroenergo” AJ boshqaruvi raisining maslahatchisi
Feruza AZIMOVA,
“O‘zbekgidroenergo” AJ muharriri
"Yangi O'zbekiston" gazetasining 2021-yil 14-yanvardagi 9-sonidan