- Bosh sahifa
- Yangiliklar
- Ma’naviyat – barcha uchun daxldor masala
Ma’naviyat – barcha uchun daxldor masala
Jamiyat hayotining hech bir jabhasini ma’naviyatsiz
tasavvur etib bo‘lmaydi. Iqtisodiyot, sanoat, ishlab chiqarishu huquq-tartibot
sohalari ham bevosita ma’naviyat bilan chambarchas bog‘liq. Negaki, ma’naviyat
hayotiy, kasbiy mo‘ljal-munosabatlarni to‘g‘ri belgilashda, inson tafakkurining
to‘g‘ri shakllanishida asosiy omildir.
Davlatimiz rahbari raisligida
19-yanvar kuni ma’naviy-ma’rifiy ishlar tizimini tubdan takomillashtirish, bu
borada davlat va jamoat tashkilotlarining hamkorligini kuchaytirish masalalari
bo‘yicha videoselektor yig‘ilishida jamiyat hayotining tanasi iqtisodiyot
bo‘lsa, uning joni va ruhi ma’naviyat ekanini astoydil ta’kidlagani bejiz emas,
albatta.
O‘zbekiston Respublikasi
Davlat aktivlarini boshqarish agentligida soha xodimlarining ayni masalalar
yuzasidan dolzarb vazifalari nimalardan iborat ekanini atroflicha tahlil
etishga oid onlayn muloqotda bu haqda batafsil so‘z yuritildi.
Samimiy muloqotda agentlikning
markaziy apparati bilan birga tizimdagi tashkilotlar, hududiy boshqarmalarda
mehnat qilayotgan mutaxassislar ham ma’naviyat bilan bevosita bog‘liq bo‘lgan
jihatlar, milliy tariximiz, jadidchilik harakati, mustaqilligimizning ma’naviy
asoslari, o‘zbek tilining tarixi, bugungi kunda uning tobora tiklanib
borayotgan mavqe-maqomi xususida atroflicha fikr almashish imkoniga ega bo‘ldi.
Agentlik direktorining
ma’naviy-ma’rifiy ishlar samaradorligini oshirish hamda davlat tili
to‘g‘risidagi qonun hujjatlariga rioya etilishini ta’minlash masalalari
bo‘yicha maslahatchisi Jumanazar Meliqulov, olim va jurnalist Halim Saidov,
shoir Shodmonqul Salomov va boshqalar milliy ma’naviyatimizni tiklash, milliy
o‘zlikni anglash kabi masalalar bugungi yangilanib borayotgan O‘zbekistonda
tobora ko‘proq dolzarblik kasb etayotganini ta’kidladi.
Darhaqiqat, davlatimiz rahbari tashabbusi bilan mamlakatimizda uchinchi
Renessans poydevorini yaratishdek o‘ta murakkab va mas’uliyatli jarayonda
millatning ko‘zini ochishga, uni tanazzul va manqurtlikdan asrab qolishga,
mudom ziyoga chorlagan ma’rifatparvar bobolarimizning pok nomlarini xalqimizga
qaytarishga, umrini fido etgan ezgu maqsadlarning mohiyatini yoshlarga batafsil
tushuntirishga, ta’lim-tarbiya sohasini tubdan isloh etishga jiddiy e’tibor
qaratilmoqda.
Yurtimizda milliy adabiyot, madaniyat va san’at,
tarix, ilm-fanga bo‘lgan ulkan e’tibor, joylarda tashkil etilayotgan ijod
maktablari, “G‘alaba” yodgorlik majmuasining tashkil etilishi xalqimiz,
ayniqsa, yosh avlod ma’naviyatini yuksaltirish, ularning aslida kimlarning
avlodi ekanini teran anglashiga yaqindan ko‘maklashishda muhim omil bo‘lib
xizmat qilmoqda.
Har qancha murakkab va sinovli bo‘lmasin, 2020-yilda
qatag‘on qurbonlari merosini o‘rganish, ular xotirasini abadiylashtirish,
Alisher Navoiy tavalludining 580 yilligini keng nishonlash, ulug‘ bobomiz
asarlarini tadqiq etish, o‘zbek tilining mavqeyi va maqomini tobora
yuksaltirish, milliy adabiyotimiz, san’atimiz ravnaqiga munosib hissa qo‘shgan
fidoyi ijodkorlar xotirasini e’zozlash bilan bog‘liq ezgu tashabbuslar keng
quloch yozdi. Bularning barchasi esa hamyurtlarimizni ma’naviy yuksaklikka
eltishda alohida ahamiyat kasb etishi shubhasiz.
Bugun jahonda globallashuv, geosiyosiy manfaatlarning
to‘qnashuvi tobora keskin tus olayotgan murakkab jarayonda ma’naviy-ma’rifiy
masalalarga har qachongidan ham ko‘proq e’tibor qaratish, uyg‘oq vijdon sohibi
bo‘lish, teran va sog‘lom fikrlash, usti yaltiroq, biroq tag-zamiri g‘arazli
g‘oyalardan mudom ogoh va hushyor bo‘lish dolzarbligi tobora yaqqol ayon
bo‘lmoqda.
Maroqli, ham foydali kechgan onlayn konferensiyada
ishtirokchilar iqtisodiyot va ma’naviyatning o‘zaro hamohangligi,
hamyurtlarmizning faol fuqarolik pozitsiyasi, jadidchilik harakatining asl
mazmun-mohiyati, ma’rifatparvar bobolarimizning ibratli faoliyati, ezgu
maqsad-muddaolari haqidagi savollarga olimlar tomonidan batafsil javob berildi.
Nazokat
Usmonova, O‘zA
"uza.uz" saytidan olindi