- Bosh sahifa
- Yangiliklar
- Lotin yozuviga asoslangan o‘zbek alifbosi keng jamoatchilik faolligi orqali amalga kiritiladi
Lotin yozuviga asoslangan o‘zbek alifbosi keng jamoatchilik faolligi orqali amalga kiritiladi
1995-yil 21-dekabrda
qabul qilingan “O‘zbekiston Respublikasining davlat tili haqida”gi qonuniga
o‘zgartishlar va qo‘shimchalar kiritish to‘g‘risida”gi qonun bilan davlat
tilini izchil joriy etish jarayonini takomillashtirish va lotin yozuviga
asoslangan o‘zbek alifbosiga mukammal o‘tilishini taʼminlash belgilab qo‘yilgan
edi. Aynan
shu yili o‘zbek tilining asosiy imlo qoidalari yaratilib, lotin yozuviga
asoslangan o‘zbek alifbosi amaliyotga bosqichma-bosqich joriy etila boshlandi.
Oradan 26 yil vaqt o‘tdi.
Lotin yozuviga asoslangan o‘zbek alifbosida taʼlim olishni boshlagan avlod
bugun davlat va jamiyatning turli sohalarida, boshqaruv organlarida faol mehnat
qilmoqda. Mamlakatimiz aholisining 60 foizdan ziyodini yoshlar tashkil etishini
nazarda tutadigan bo‘lsak, bugun yurtimizda lotin yozuviga asoslangan o‘zbek
alifbosida ish yuritishga tayyor avlod shakllandi, deb bemalol aytishimiz
mumkin.
Lekin
o‘tgan yillar mobaynida lotin yozuviga asoslangan o‘zbek alifbosida ish
yuritish, barcha ish qog‘ozlari va harakatdagi hujjatlarning to‘liq lotin
yozuviga asoslangan o‘zbek alifbosida bo‘lishini taʼminlash yuzasidan qatʼiy
talablar qo‘yilmadi. Ish yuritishda kirill va lotin yozuvining amal qilib
kelishi, tabiiyki, noqulayliklar va jiddiy muammolarni keltirib chiqardi.
Hukumatimiz
tomonidan 2021-yil 10-fevral kuni qabul qilingan “Lotin yozuviga asoslangan
o‘zbek alifbosiga bosqichma-bosqich to‘liq o‘tishni taʼminlash chora-tadbirlari
to‘g‘risida”gi qarori bilan bu boradagi muammolarning bartaraf etilishi
yuzasidan qatʼiy choralar belgilandi.
Yaqin
muddatlarda lotin yozuviga asoslangan o‘zbek alifbosiga bosqichma-bosqich
to‘liq o‘tishni taʼminlash bo‘yicha ishlab chiqilgan “yo‘l xaritasi”da
jamiyatimizda mavjud bo‘lgan eng muhim ijtimoiy muammoning yechimiga qaratilgan
ustuvor vazifalar belgilandi.
Jumladan,
lotin yozuviga asoslangan o‘zbek alifbosining yangi tahriri asosida “O‘zbek
tilining imlo qoidalari” tasdiqlanadi. O‘zbek tili alifbosi va yangi imlo
qoidalari asosida transliteratsiyaga mo‘ljallangan axborot dasturiy taʼminotlar
uchun yagona talab ishlab chiqiladi va amaliyotga joriy etiladi.
Turli
vazirlik, idoralar va tashkilotlarning xodimlari, mustaqil o‘rganuvchilar uchun
Alisher Navoiy nomidagi Toshkent davlat o‘zbek tili va adabiyoti universiteti
huzurida faoliyat ko‘rsatayotgan Davlat tilida ish yuritish asoslarini o‘qitish
va malaka oshirish markazi hamda uning 13 ta hududiy bo‘linmasida lotin
yozuviga asoslangan o‘zbek alifbosi, imlo qoidalari va davlat tilida ish
yuritishni o‘rganish bo‘yicha o‘quv kurslari tashkil etiladi. Eʼtiborli jihati,
o‘qish va o‘rganish istagida bo‘lgan aholi vakillarining bepul o‘qitilishi
taʼminlanadi.
Uzluksiz taʼlim tizimining
maktabgacha taʼlim bo‘g‘inidan boshlab bolalarning lotin yozuviga asoslangan
o‘zbek alifbosi va yangi imlo qoidalari bo‘yicha savodxonligini
shakllantirishga mo‘ljallangan ko‘rgazmali va tarqatma materiallar tayyorlash
yo‘lga qo‘yilsa, umumiy o‘rta va o‘rta maxsus taʼlim muassasalari uchun o‘quv
adabiyotlari, darsliklar to‘liq lotin yozuviga asoslangan o‘zbek alifbosida
nashr etiladi. Kirill alifbosida chop etilgan va kutubxonalarda saqlanayotgan
adabiyotlarning lotin yozuviga asoslangan o‘zbek alifbosidagi elektron
ko‘rinishlari bosqichma-bosqich yaratiladi.
Mamlakatimizda fuqaro shaxsini
tasdiqlovchi guvohnomalar, ID kartalar, fuqaroligi bo‘lmagan shaxs hamda chet
davlat fuqarolarining yashash guvohnomalarini takomillashtirilgan lotin
yozuviga asoslangan o‘zbek alifbosida bo‘lishini taʼminlash choralari
ko‘riladi.
“Yo‘l xaritasi”da kirill
yozuvidan lotin yozuviga savodli o‘giradigan dasturiy taʼminot hamda ularning mobil
ilovalari yaratilishini rag‘batlantirish nazarda tutilgan bo‘lib, bu, o‘z
navbatida, yoshlarni izlanishga va yangiliklar yaratishga undashi tabiiy.
Turli sohalar bo‘yicha
atamalar, joy nomlari, kishi nomlari lug‘atlari va o‘quv lug‘atlarining
tayyorlanishi, nashr etilishi va keng tarqatilishi aholining lotin yozuviga
asoslangan o‘zbek alifbosi va yangi imlo qoidalarini tez va oson o‘zlashtirib
olishiga xizmat qiladi.
Yurtimizning shahar va
qishloqlarida, joy va ko‘chalar, tashkilotlar nomlari, peshlavhalar, ommaviy
targ‘ibot vositalari, reklama va eʼlonlarning yangi tartibda yozilishini to‘liq
taʼminlashda keng jamoatchilikning faolligi va har birimizning masʼulligimiz
yaqin muddatlarda lotin yozuviga asoslangan o‘zbek alifbosiga to‘liq
o‘tishimizda muhim omil bo‘ladi.
Odina JAMOLDINOVA,
Oliy va o‘rta maxsus taʼlim vaziri maslahatchisi
"Yangi O'zbekiston" gazetasidan olindi