- Bosh sahifa
- Yangiliklar
- O‘zbek tilida “Hh” va “Xx” harflar bitta tovushni ifodalaydimi?
O‘zbek tilida “Hh” va “Xx” harflar bitta tovushni ifodalaydimi?
Alifbo nega o‘zgarmoqda?
Har bir tilning o‘ziga xos tovushlari bo‘ladiki, ular boshqa tillardan
farqlanishga asos bo‘lib xizmat qiladi. O‘zbek tili boshqa qardosh turkiy
tillardan uch katta lahjani (qorluq, qipchoq va o‘g‘uz) o‘z ichiga olishi bilan
muayyan murakkablikka ega bo‘lib turibdi. Shunung uchun unlilar talaffuzi va
imlosida ham bir qator tushunmovchiliklar ko‘zga tashlanadi. Tog‘ri, o‘zbek
tilining hamma lahjasida ham “ i ” tovushi 4 xil (1. nafis, 2. keldi, 3. bilan,
4. qirmiz) talaffuz qilinmaydi. Jumladan, “ o‘ ” unlisi ham ikki xil aytilishi
hammaga ma’lum, biroq bu muammolarni alifboga bog‘lash shart emas. O‘zbek
tilida yana “ i ” va “ e ” tovushlarini farqlamaslik holatlari bor. Bularning
hammasini alifboga taqab bo‘lmaydi. Mazkur masalalar imlo qoidalari va fonetika
o‘qitish metodikasi bilan bog‘liq.
Muhokamaga qo‘yilgan yangi alifbo haqida mutaxassislar, keng jamoatchilik
- barcha o‘z munosabatini bildirmoqda.
Ayniqsa, “ h ” va “ x ” harflarini qo‘shib yuborish, bitta “ x ” harfiga
birlashtirish taklifini xalqning mutaxassis bo‘lgan va bo‘lmagan vakillari
qayta-qayta bildirishmoqda. “ H ” ˗ bo‘g‘iz undoshi o‘zbek tilining o‘ziga xos
tovushi hisoblanadi. “ H ” va “ x ” harflari ikki alohida tovushni ifodalaydi. O‘zbek
adabiy tilining muhim xususiyatiga aylanib bo‘lgan mazkur tovushlarni talaffuz
qila olmayotganimiz uchun birlashtirib yuborish mumkin emas, bularning barchasi
mamlakatda o‘qitish metodikasi talab darajasida emasligi bilan bog‘liq.
Aksariyat dars mashg‘ulotlarida, u filologlar tayyorlaydigan OTM bo‘lsin,
maktab ta’limi bo‘lsin fonetika, to‘g‘rirog‘i, orfoepiya yaxshi o‘qitilmaydi.
Shuning uchun na o‘qituvchi, na o‘quvchi o‘zbek tilining o‘ziga xos
tovushlarini talaffuz qila olmaydi, garchi ingliz yoki arab tiliga xos bo‘lgan
notanish tovushlarni risoladagidek qiroat bilan o‘qiy oladi. Bu biz o‘zbek tili
fonetikasini o‘qita olmayapmiz, degani bo‘ladi. Hech kim talaffuzda va imloda
farqlay olmaydi shuning uchun “ h ” va “ x ” tovushlarini bir harf bilan berish
kerak, deyish xato fikrdir. Ular o‘zbek tilining o‘z o‘rniga ega alohida
harflaridir.
O‘zgartirilayotgan grafemalar (o‘, g‘, sh, ch ) esa, qulay holatga
keltirilsa, o‘zbek tilining kompyuter texnologiyalari bilan integratsiyalashuvi
jadallashadi. Boshqa tovushlar bilan bog‘liq ta’kidlanayotgan muammolarni o‘qitish
metodikasi bilan hal qilish mumkin. Til
sohasida olib borilayotgan islohotlarni qo‘llab-quvvatlash tarafdoriman. Har
qanday yangilik - bir qulaylikdir.
G‘ofir
Hamroyev,
Pedagogika fanlar boʻyicha falsafa doktori