- Bosh sahifa
- Yangiliklar
- O‘zbek tili fani bo‘yicha o‘quv dasturlarining uzluksizligini taʼminlashga bag‘ishlangan davra suhbati bo‘lib o‘tdi
O‘zbek tili fani bo‘yicha o‘quv dasturlarining uzluksizligini taʼminlashga bag‘ishlangan davra suhbati bo‘lib o‘tdi
Bugun, 17-iyun
kuni Vazirlar Mahkamasi huzuridagi Taʼlim sifatini nazorat qilish davlat
inspeksiyasida o‘zbek tili
fani bo‘yicha o‘quv dasturlarining uzluksizligini taʼminlashga bag‘ishlangan
davra suhbati bo‘lib o‘tdi.
Unda Vazirlar Mahkamasining Maʼnaviyat va Davlat tilini rivojlantirish departamenti boshlig‘i Abdug‘affor Qirg‘izboyev, Taʼlim inspeksiyasi rahbariyati, Maktabgacha taʼlim, Xalq taʼlimi, Oliy va o‘rta maxsus taʼlim vazirliklari mutasaddilari, oliy taʼlim muassasalari professor-o‘qituvchilari va amaliyotchi pedagoglar ishtirok etdi.
Yurtboshimizning 2020-yil 6-noyabrdagi 4884-son
qarorida “Maktabgacha, umumiy o‘rta, professional va oliy taʼlim o‘quv
dasturlarining uzviyligini taʼminlash” vazifasiga Taʼlim inspeksiyasi,
Maktabgacha, Xalq taʼlimi, Oliy va o‘rta maxsus taʼlim vazirliklari masʼul
ijrochi sifatida belgilangan. Unga ko‘ra mutaxassis olimlar, tajribali
o‘qituvchilar ko‘magida o‘zbek tili fanidan uzviy konsepsiya va har bir taʼlim
turi uchun alohida o‘quv dasturlari loyihalari tayyorlandi va Taʼlim
inspeksiyasi portaliga (http://www.uzviylik.tdi.uz)
joylashtirilgan. Tahlillarga ko‘ra takrorlangan, uzviyligi taʼminlanmagan,
yangilanishi zarur bo‘lgan, olib tashlanadigan va boshqa taʼlim turiga
o‘tkaziladigan mavzular aniqlanib, dasturlar takomillashtirishda davom etmoqda.
Davra suhbatida "O‘zbek tili fani bo‘yicha
O‘zbekiston Respublikasi uzluksiz taʼlim dasturlari majmuasi" qizg‘in muhokama
etildi. Muhokamalar davomida davlat tilini rivojlantirish borasida amalga
oshirilayotgan islohotlar samaradorligi va uning uzluksiz taʼlim tizimidagi
o‘rni, maktabgacha, umumiy o‘rta va oliy taʼlim tizimida o‘zbek tili bo‘yicha
taʼlim uzviyligini taʼminlash, xalqaro tajribalardan foydalanish borasida
amalga oshirilgan ishlar yuzasidan o‘zaro fikr almashildi.
Asosiy eʼtibor maktabgacha taʼlim tizimida 6-7
yoshli bolalarni maktabga tayyorlashda davlat tilining o‘rni, umumiy o‘rta
taʼlim uchun o‘zbek tilidan Milliy o‘quv dasturi, o‘rta maxsus va professional
taʼlim hamda oliy taʼlimda filologik va nofilologik yo‘nalishda o‘zbek tilining
o‘qitilishi bilan bog‘liq muammolarga qaratildi.
Respublikamizda taʼlim rus, qoraqalpoq, qozoq, tojik, qirg‘iz, turkman tillarida olib boriladigan maktablarda o‘zbek tilini o‘qitish metodikasi yangi ko‘rinishda, yaʼni xorijiy tilni o‘rgatish metodikalariga asoslanib yaratilganligi soha vakillari orasida ko‘plab savollarni va qarshi fikrlarni yuzaga keltirdi.
Muhokamalar yakunida bu
borada shoshmasdan, o‘quv dasturlarini ekspertizadan, tajriba-sinovdan
o‘tkazish orqali joriy etish takliflari bildirildi, aks holda takomiliga
yetmagan o‘quv dasturlari asosida yaratilib chop etilayotgan darsliklar ham
moliyaviy jihatdan, ham mazmunan salbiy oqibatlarga olib kelishi mumkinligi
qayd etildi.