- Bosh sahifa
- Yangiliklar
- Uzoqni yaqin, og‘irni yengil qiladi, ammo...
Uzoqni yaqin, og‘irni yengil qiladi, ammo...
Chindan ham, xalqimiz taʼbiri bilan aytganda transport vositalariga
shunday eʼtirof munosibdir. Azaldan inson uchun qulay vosita transport
sanalgan. Ot-arava, izvosh, velosiped, dastlabki transport vositalari sanaladi
desak, mubolag‘a bo‘lmas. Inson ehtiyojidan kelib chiqqan transport
vositalarisiz bugunimizni tasavvur etib bo‘lmaydi. Transport biz bilan hamisha
hamqadamdir. Texnika takomillashib borayotgan taraqqiyot shu qadar jadallashib
boryaptiki, inson aqlu-zakovatiga qoyil qolishdan o‘zga chora yo‘q.
Bu
borada jamoat transportlarining ham o‘rni bo‘lakcha. Bir manzildan, ikkinchi
manzilga darrovgina yetib olish ham aslida - baxt. Yo‘llar ravon, jamoat
transportlarining qulayligi kishi qalbida xotirjamlik baxsh etadi.
Hech o‘ylab ko‘rganmisiz, yo‘nalishli xizmat
ko‘rsatuvchi transportlarning avvalo manzil ko‘rsatilgan nomlavhasi
diqqatimizni o‘ziga ohanrabodek jalb etishiga. Avvalo
transportning manzil nomlavhasi bizga harakatimizning to‘g‘ri yo‘nalishini
taʼminlab beradi. Demakki, manzil nomlavhalari har kuni yuzlab, minglab,
millionlab yo‘lovchilar uchun yo‘l ko‘rsatuvchi mayoqdir.
Shu
o‘rinda haqli savol tug‘iladi? Manzil nomlavhalari o‘z ona tilida xato yozilgan
bo‘lsachi?! Bu xatolar yo‘lovchilar eʼtiroziga sabab bo‘layotgan bo‘lsachi?!
Yuqoridagi
savollarga javob topish hamda yo‘nalishli transport vositalari old oynasida
ilib qo‘yilgan nomlavhalarning Davlat tili to‘g‘risidagi Qonunga muvofiqligini
o‘rganish maqsadida bugun Buxoro tumanida faoliyat yuritayotgan jamoat
transportlari tuman hokimi maslahatchisi Z.Ergasheva, tuman IIB YHXB
inspektori, katta serjant Sh.Murodov, Xalq deputatlari Buxoro tuman Kengashi
deputati U.Sobirov ishtirokida o‘rganildi.
O‘rganish jarayonida “Galaosiyo-So‘fikorgar”, “Galaosiyo-Bog‘ikalon”‘, “Galaosiyo-Saxovat”, "Galaosiyo-Yangi turmush", “Galaosiyo-Sohibkor”, “Galaosiyo-Kobdin” yo‘nalishli transportlari hamda 37-avtobus yo‘nalishli transportlarida Davlat tili to‘g‘risidagi hamda Lotin alifbosiga asoslangan o‘zbek tili meʼyorlariga to‘g‘ri kelmaydigan yozuvlar olib qo‘yildi, haydovchilarga imlo qoidalariga qatʼiy amal qilishlari, transport oynalariga turli mazmundagi reklama varaqalarini yopishtirib qo‘ymasliklari borasida tushuntirishlar berildi.
Hurmatli tumandoshlar, aziz haydovchi va yo‘lovchilar! O‘zbek tilining mavqeyi va nufuzini oshirishga qaratilgan xayrli ishlarga o‘z hissamizni qo‘shaylik. Unutmaylik, kelgusi avlod uchun o‘zbek tili sofligini saqlab, ularga ona tilimizni meros qilib qoldirishga barchamiz masʼulmiz!
Z.Ergasheva,
Buxoro tumani hokimining maslahatchisi