Ona tilim, omon boʻl mangu!

Barchaga ayonki, millatning millat bo‘lib yuksalishida davlat tilining ahamiyati katta. U har qanday davlatning tarixiy taraqqiyoti negizida vujudga kelgan, o‘zlikni anglash, milliy ong va tafakkurning in’ikosi, avlodlar o‘rtasidagi ruhiy-ma’naviy bog‘liqlik vositasi bo‘lib xizmat qiladi. Davlat tili mamlakatda yashaydigan turli millat va elatlar yakdilligini ifoda etadi. Xalqning davlat sifatida rivojlanib, yuksalishiga asos bo‘ladigan boshqa omillar kabi davlat tili shu yurtda yashovchi fuqarolarning or-nomusi, g‘ururi kabi ulug‘lanadi.

O‘zbekiston Respublikasi Prezidentining 2019-yil 21-oktabrdagi “O‘zbek tilining davlat tili sifatidagi nufuzi va mavqeini tubdan oshirish chora-tadbirlari to‘g‘risida”gi PF-5850-son farmoni hamda Vazirlar Mahkamasining Ma’naviyat va davlat tilini rivojlantirish masalalari departamenti videoselektor majlisining 2021-yil 13-iyuldagi 18-son bayoni ijrosi yuzasidan O‘rmon xo‘jaligi davlat qo‘mitasi tomonidan joriy yilning 14-sentabr kuni O‘rmon xo‘jaligi ilmiy-tadqiqot institutida “O‘zbek tili bayrami kuni”ga bag‘ishlangan “Ona tilim, omon bo‘l mangu!” nomli ma’rifiy tadbir tashkil etildi.

Unda O‘rmon xo‘jaligi ilmiy tadqiqot instituti direktori o‘rinbosari Nurilla Muxsimov, O‘zbekiston Respublikasi Prezidenti huzuridagi Davlat boshqaruvi akademiyasi “Ma’naviyat va ma’rifat” kafedrasi dotsenti, filologiya fanlari nomzodi Ulug‘bek Saidov, O‘rmon xo‘jaligi davlat qo‘mitasi raisining Ma’naviy-ma’rifiy ishlar samaradorligini oshirish, davlat tili to‘g‘risidagi qonun hujjatlariga rioya etilishini ta’minlash masalalari bo‘yicha maslahatchisi Malika Abduxakimovalar ishtirok etishdi. 

Tadbirda tilimiz ravnaqi yo‘lida qilinishi lozim bo‘lgan amaliy ishlar, qachon va kimdan boshlashimiz darkorligi, o‘z ona tilimizni chuqur o‘rganish orqali boshqa tillarni o‘rganish madaniyatiga amal qilish zarurati, tilimizni kelajak avlodlarga sof holda etkazish, shu tilda go‘zal asarlar yaratish, xalqaro miqyosda ham muloqot vositasiga aylantirish yo‘llari haqida gapirildi. Shuningdek, jadid ma’rifatparvarlarining turkiy til ravnaqi yo‘lidagi fikrlari, amalga oshirgan ishlari, dunyo olimlarining tilning siyosatda tutgan mavqei borasidagi qarashlariga munosabat bildirildi. 

Tadbir yakunida institut jamoasi mavzu yuzasidan o‘z fikr-munosabatlarini bildirib, ona tilimizda bitilgan go‘zal g‘azallardan namunalar o‘qidilar.

O‘rmon xo‘jaligi davlat qo‘mitasi