- Bosh sahifa
- Yangiliklar
- Haqiqiy bilim va mahorat sinovi
Haqiqiy bilim va mahorat sinovi
Har bir xalqning tarixi, maʼnaviy qadriyatlari va qiyofasi, avvalo, ona
tilida aks etadi. Shu bois, ona tilimizni yosh avlodga betalafot
yetkazish xalqimiz kelajagini asrash yo‘lidagi muhim qadamdir.
Mamlakatimizda
o‘zbek tilini davlat tili sifatida rivojlantirishga jiddiy eʼtibor
qaratilmoqda. Bu borada qabul qilingan normativ-huquqiy hujjatlar, ayniqsa,
Maʼnaviyat va davlat tilini rivojlantirish masalalari departamentining tashkil
etilishi o‘zbek tilining davlat tili sifatida nufuzini oshirish borasidagi
ishlarni tizimli amalga oshirish imkoniyatini yanada kengaytirdi.
Mazkur departament, Xalq taʼlimi vazirligi va
Respublika taʼlim markazi hamkorligida O‘zbekiston Respublikasi davlat
mustaqilligining 30 yilligi munosabati bilan umumtaʼlim muassasalarida faoliyat
yuritayotgan o‘zbek tili o‘qituvchilari o‘rtasida “Yilning eng yaxshi o‘zbek tili o‘qituvchisi” tanlovi eʼlon qilinishi
bu borada olib borilayotgan ishlarning yana bir amaliy ifodasi bo‘ldi.
Pandemiya sharoitiga qaramay, o‘tgan yili
Maʼnaviyat va davlat tilini rivojlantirish masalalari departamenti hamkorligida
o‘tkazilgan “O‘zbek tili bo‘yicha eng
yaxshi videodars” tanlovida mamlakatimizdagi umumtaʼlim maktablarining
to‘rt yarim mingdan ortiq o‘zbek tili o‘qituvchisi faol ishtirok etdi.
Shu o‘rinda “Yilning
eng yaxshi o‘zbek tili o‘qituvchisi” tanlovini tashkil etishdan ko‘zlangan
asosiy maqsad nima, degan savol tug‘ilishi tabiiy. Bundan muddao umumtaʼlim
maktablaridagi o‘zbek tili o‘qituvchilari orasidan mahoratli, tashabbuskor
pedagoglarni aniqlash, ularni munosib rag‘batlantirish hamda o‘zbek tilining
davlat tili sifatida o‘qitilishi bo‘yicha zamonaviy yondashuvlarini
ommalashtirishdan iboratdir.
Tanlov ikki yo‘nalishda — taʼlim o‘zbek tilida
hamda rus va qardosh tillarda olib boriladigan o‘quv muassasalaridagi
o‘qituvchilar orasidan g‘oliblarni aniqlashni ko‘zda tutadi.
Mazkur tanlov g‘oliblari I darajali diplom, pul
mukofoti, “Xalq taʼlimi aʼlochisi” ko‘krak nishoni bilan mukofotlanadi.
Sentabr-oktabr
oylarida tanlovning tuman (shahar), viloyat hamda respublika bosqichlari
o‘tkaziladi. 21-oktabr — O‘zbek tili
bayrami
kuni arafasida tanlovning respublika bosqichi g‘oliblari taqdirlanadi.
Shu
yilning 20-iyulidan tanlovda qatnashish istagidagi o‘qituvchilarni ro‘yxatga
olish boshlangan edi. Ayni kunlarda “Yilning
eng yaxshi o‘zbek tili o‘qituvchisi” tanloviga ro‘yxatga olish yakunlandi.
Hozirga
qadar 24 ming 670 nafar o‘qituvchi tanlovda qatnashish uchun ro‘yxatdan o‘tdi.
Bu esa o‘zbek tili o‘qituvchilarining o‘z kasbiy faoliyatini rivojlantirishga
ishtiyoqi yuqoriligidan dalolat beradi.
Qolaversa,
pedagoglar o‘rtasida bunday tanlovlarning o‘tkazilishi ularning o‘zaro tajriba
almashuvi, o‘z ustida ko‘proq ishlashi va izlanishi uchun sog‘lom raqobat
muhitini yaratadi. Sog‘lom raqobat esa taʼlimda rivojlanish va sifat darajasini
oshirishga xizmat qiladi.
Nasiba
MAMARAIMOVA,
Xalq taʼlimi vazirining maslahatchisi