- Bosh sahifa
- Yangiliklar
- Parijda “O‘zbek tili bayrami” kuni nishonlandi
Parijda “O‘zbek tili bayrami” kuni nishonlandi
Mamlakatimizning Fransiyadagi elchixonasida tobora
yaqinlashib kelayotgan «O‘zbek tili bayrami»ga bag‘ishlangan madaniy tadbir
tashkil etildi, deb xabar bermoqda “Dunyo” AA muxbiri.
Tadbirda ushbu mamlakatdagi vatandoshlar
vakillari, xorijlik o‘zbek tili va adabiyoti olimlari va ixlosmandlari hamda
o‘zbekistonlik talabalar qatnashdi.
O‘zbekistonning Fransiya va Portugaliyadagi
elchisi Sardor Rustamboyev O‘zbekiston taraqqiyotining yangi bosqichida ona
tilimizning jamiyatdagi o‘rni va nufuzini oshirish bo‘yicha amalga
oshirilayotgan keng ko‘lamli chora-tadbirlar to‘g‘risidagi batafsil
maʼlumotlarni tadbir ishtirokchilari eʼtiboriga havola qildi.
Tadbirda Fransiya ijtimoiy tadqiqotlar instituti
ilmiy xodimi, navoiyshunos olim Mark Tutan hamda o‘zbekistonlik tadqiqotchi
Dilnoza Doto‘rayeva o‘zbek tilining tarixi va rivojlanishi to‘g‘risidagi
maʼruza bilan ishtirok etdi. Ular o‘zbek mumtoz adabiyotining rivojlanish
bosqichlari hamda o‘zbek tilini bugungi kundagi rivojlanishi bilan bog‘liq
fikrlarini o‘rtoqlashdi.
Shu bilan birga, vatandoshlarimiz ishtirokida
sheʼrxonlik va “Siz o‘zbek tilini bilasizmi?” viktorinasi ham o‘tkazildi. Unda 1-o‘rinni egallagan Parij Nanter universitetining magistranti
Humoyun Boboyev, 2-o‘rin sohibi - Versal pedagogika institutining magistranti
Xurshid Fayzullayev va 3-o‘rin egasi - Versal pedagogika institutining
magistranti Mohidil Xonimqulova esdalik sovg‘alar bilan taqdirlandi.
Fransiya
Sharq tillari va sivilizatsiyalari milliy institutida (INALCO) o‘zbek tilidan
tahsil olayotgan talabalar ham ushbu tadbirda ishtirok etishdi.
Dilnoza
Doto‘rayeva, Fransiya ijtimoiy tadqiqotlar instituti tadqiqotchisi:
- “O‘zbek tili bayrami” doirasida biz bugun ona tilimizning tarixi va
rivojlanishi bo‘yicha o‘z fikrlarimizni o‘rtoqlashdik. Agar biz tilimizni
rivojlantirmoqchi bo‘lsak, uning yozma kontentini boyitib bormog‘imiz lozim.
Ilm-fan va boshqa sohalarda uning qo‘llanilishini kengaytirishimiz kerak.
Dunyodagi tadqiqot ishlarini o‘zbek tiliga tarjima qilishimiz kerak.
Olimlarimiz o‘zbek tilida tadqiqot ishlarini ko‘paytirishsa, tilimiz yanada
ravnaq topadi.
Pyer
Giyom, Fransiya Sharq tillari va sivilizatsiyalari milliy instituti talabasi:
-
Men INALCOda o‘zbek tilini o‘rganayapman. O‘tgan yili Toshkent shahriga bordim.
Xalqingizning madaniyati va tarixini o‘rgandim. Bugun esa O‘zbekistonning
Fransiyadagi elchixonasida o‘zbek tili kuniga bag‘ishlangan tadbirda ishtirok
etish sharafiga muyassar bo‘ldim. O‘zbekistonliklarning barchasini yaqinlashib kelayotgan
O‘zbek tili kuni bayrami bilan tabriklayman.
Mirzohid
Rahimov, tarix fanlari doktori:
- Bugun elchixonada vatandoshlar va fransiyalik mutaxassislar ishtirokida
tashkil etilgan “O‘zbek tili bayrami” tadbirida ishtirok etganimdan
baxtiyorman. Men hozirgi kunda Fransiya milliy kutubxonasi va Milliy arxivida
izlanishlar olib borayapman. Aytib o‘tish kerakki, o‘zbek tilining mavqeini
xalqaro darajada targ‘ib qilish bo‘yicha ko‘p ishlar olib borilmoqda. Fursatdan
foydalanib, barcha yurtdoshlarimni ostonada turgan ushbu bayram bilan
tabriklayman.
dunyo.info