- Bosh sahifa
- Yangiliklar
- Milliy yuksalishga chorlovchi kuch
Milliy yuksalishga chorlovchi kuch
Ona tili – milliy o‘zligimiz timsoli. Til – millat va
Vatan tushunchalari kabi muqaddas sanaladi. Shu bois uni Vatan kabi asrash,
himoya qilish lozim. Yurtimizda O‘zbek tili bayrami kunining alohida sana
sifatida nishonlanayotgani ana shu yo‘ldagi muhim qadamlardan biridir.
Ichki ishlar vazirligi akademiyasida “Davlat tili va maʼnaviyat – jamiyatning ikki ustuni” mavzusida bo‘lib o‘tgan tadbirda ona tilimizning barhayot kuch-qudrati ulug‘landi. Maʼnaviy-maʼrifiy kechaga Vazirlar Mahkamasining Maʼnaviyat va davlat tilini rivojlantirish masalalari departamenti, Respublika Maʼnaviyat va maʼrifat markazi, O‘zbekiston yozuvchilar uyushmasi hamda Alisher Navoiy nomidagi Toshkent davlat o‘zbek tili va adabiyoti universitetidan vakillar, taniqli olim va adabiyotshunoslar bilan bir qatorda, Akademiya kursantlari, Vazirlik qoshidagi akademik litseylar hamda ixtisoslashtirilgan maktab-internati o‘quvchilari taklif etildi.
– Har bir millat o‘z ona tili bilan tirikdir.
Mustaqillikka erishganimizdan so‘ng ona tilimiz tom maʼnodagi davlat tiliga
aylanib, xalqimizni buyuk marralarga safarbar etadigan beqiyos kuch sifatida
maydonga chiqdi. Ayniqsa so‘nggi besh yilda ona tilimizni rivojlantirish, uning
davlat tili sifatidagi maqomi va mavqeyini yuksaltirish, yosh avlodni ona
tiliga hurmat ruhida tarbiyalash masalalariga katta eʼtibor qaratilmoqda, –
dedi taʼlim maskani rahbari, polkovnik Rustam Xatamov.
Tilshunos olimlarning eʼtirof etishicha, O‘zbek tili bayrami xalqimiz maʼnaviy hayotidan tobora mustahkam o‘rin egallab bormoqda. Hozirgi kunda mamlakatimizda yashayotgan turli millat va elat vakillari o‘zbek tilini o‘rganishga katta qiziqish va istak bildirayotganlari ahamiyatga molik.
– Muhtaram Prezidentimiz “Yangi O‘zbekistonni, yangi
Renessans poydevorini barpo etishdek ezgu maqsadlarimizga erishishda, hech
shubhasiz, ona tilimizning hayotbaxsh qudratiga tayanamiz”, deya bejiz
taʼkidlamadilar. Chunki, o‘zligini tanigan har bir millat ona tili va
adabiyotini asrab-avaylaydi, uning rivoji yo‘lida bor kuch-salohiyatini
safarbar etadi, - dedi Vazirlar Mahkamasining Maʼnaviyat va davlat tilini
rivojlantirish masalalari departamenti mudiri professor Abdug‘affor
Qirg‘izboyev.
Bugun ichki ishlar organlarida ham davlat tilining
nufuzi va mavqeyini oshirish yo‘lida keng ko‘lamli ishlar amalga oshirilmoqda.
Bu davlat tilida ish yuritishni samarali tashkil qilish va qonun hujjatlariga
so‘zsiz rioya etilishini taʼminlashga xizmat qilmoqda.
Tadbirda O‘zbekiston Respublikasida xizmat ko‘rsatgan madaniyat xodimi, shoira Muhtarama Ulug‘ova, Ichki ishlar vazirining maʼnaviy-maʼrifiy ishlar samaradorligini oshirish, davlat tili to‘g‘risidagi qonun hujjatlariga rioya etilishini taʼminlash masalalari bo‘yicha maslahatchisi, podpolkovnik Xurshidbek Ro‘ziyev va boshqalar so‘z olib, mustaqil davlatchiligimiz timsoli bo‘lgan bebaho maʼnaviy boyligimizni asrab-avaylash va kelgusi avlodlarga yetkazish, ona tilimizning mavqeyini yana-da oshirish, bu borada o‘zbek tilshunosligida erishilayotgan yutuqlar va istiqboldagi muhim vazifalar haqida to‘xtalib o‘tishdi. Akademiya iqtidorli kursantlar kengashi faollari tomonidan ona tilimizni madh etuvchi sheʼrlar aytildi.
– Tilni qadrlash ona Vatanni eʼzozlash bilan barobar,
– deydi IIV Akademiyasi kunduzgi taʼlim 3-bosqich kursanti Muhammadyusuf
Sayfullayev. – Yurtimizda davlat tiliga eʼtibor bugun har qachongidan ham
yuqori. O‘quv muassasamizda “Cho‘lpon izdoshlari”, “Kitobxonlik”, “Yosh jurnalistlar”,
“Mahoratli suxandonlar” singari to‘garaklar faoliyati yo‘lga qo‘yilib,
kursantlarning o‘zbek tili va adabiyotini chuqur o‘rganishi uchun barcha
imkoniyatlar yaratilgan. Badiiy ijodga qiziquvchan yoshlar o‘z mahoratlarini
oshirib kelishmoqda.
Tadbirda Akademiya tomonidan otaliqqa olgan 121-sonli
o‘rta umumtaʼlim maktabi o‘quvchilari o‘rtasida o‘tkazilgan “Tilga eʼtibor –
elga eʼtibor” insholar tanlovi g‘olib va sovrindorlari taqdirlandi. O‘zbekiston
Kinematografiya agentligi va IIV Akademiyasi hamkorligida suratga olingan
“Cho‘lpon. Qush esdaligi” nomli hujjatli film namoyish etildi.
Ichki ishlar vazirligi akademiyasi
Matbuot xizmati