- Bosh sahifa
- Yangiliklar
- Til rivojiga bag‘ishlangan anjuman
Til rivojiga bag‘ishlangan anjuman
Buxoro viloyati hokimligi, BuxDU Pedagogika
instituti hamkorligida “Zamonaviy tilshunoslikning milliy yuksalish va ilmiy
tafakkur taraqqiyotidagi o‘rni” mavzusida respublika
ilmiy-amaliy anjumani bo‘lib o‘tdi.
Anjumanda so‘zga chiqqan viloyat hokimi, Oliy
Majlis Senati aʼzosi B.Zaripov, O‘zbekiston Respublikasi Vazirlar Mahkamasining
Davlat tilini rivojlantirish departamenti mudiri A.Qirg‘izboyev, Davlat tilida
ish yuritish asoslarini o‘qitish va malaka oshirish markazi rahbari I.Azimov,
BuxDU rektori O.Hamidov, Oliy Majlis Senati aʼzosi, falsafa fanlari doktori
A.Huseynova, taniqli tilshunos olimlar M.Abuzalova, B.Bahriddinova va boshqalar
tilshunoslikning anʼanaviy va zamonaviy yo‘nalishlari, davlat tilining
sofligini saqlash, lingvistik komptensiyani shakllantirish muammolari, o‘zbek
tili raqamli resursining takomillashtirilish, ona tili fani metodikasi
o‘qitilishining dolzarb jihatlari xususida fikr almashishdi.
— So‘nggi yillarda ona tilimizning mavqeyini
oshirish, uning davlat tili sifatidagi mavqeyini yuksaltirish borasida
qator islohotlar amalga oshirilmoqda. Ammo shuni ham taʼkidlash joiz biror soha
rivojiga ilmiy asosda yondashuv bo‘lmasa, u sohada taraqqiyot bo‘lmaydi,–deydi
Buxoro viloyati hokimining maʼnaviy-maʼrifiy ishlar samaradorligini oshirish,
davlat tili to‘g‘risidagi qonun hujjatlariga rioya etilishini taʼminlash
masalalari bo‘yicha maslahatchisi Akbar Rustamov.
—
Bugungi seminar tilimizni rivoji oldida turgan muammolarga ilmiy yechimlar
o‘rtaga tashlandi. Xususan, ayni paytda ona tilimiz faol so‘zlashuv tili
bo‘lgani holda zamonaviy texnologiyalar, kompyuterda undan foydalanish
imkoniyatlari nisbatan kam. Gap faqat matn kiritish haqida ketmayapti. Ingliz,
rus tillarida kiritayotgan matningizdagi so‘zlarni xato yoki to‘g‘riligini bevosita
aniqlashtirib, ostiga to‘lqinli chiziq chizgan holda xabar beradigan dasturlar
mavjud. Endilikda ona tilimizda ham ana shunday dasturlarni yaratish talab
etiladi.
Qolaversa,
qurilish, tibbiyot, texnologik uskunalar sohalarida ko‘pgina atamalar ajnabiy
tillarda yuritilmoqda. Holbuki chuqurroq tadqiq etilsa, ana shunday
atamalarning ona tilida ham tegishli muqobillari mavjud. Endilikda atamalar
lug‘atlari yaratish ham dolzarb vazifalardan biri bo‘lib turibdi.
Anjuman yalpi yig‘ilishidan so‘ng o‘z ishini shoʻbalarga bo‘lingan holda davom ettirdi.
Buxoro viloyati hokimligi Matbuot
xizmati