- Bosh sahifa
- Yangiliklar
- Xalq yozuvchisi bilan uchrashuv
Xalq yozuvchisi bilan uchrashuv
Alisher Navoiy
nomidagi Toshkent davlat o‘zbek tili va adabiyoti universitetida O‘zbekiston
xalq yozuvchisi Isajon Sulton bilan adabiy uchrashuv bo‘lib o‘tdi.
Adabiyotshunos olimlar, talaba-yoshlar va so‘z
ixlosmandlari ishtirokidagi tadbirda universitet rektori Shuhrat Sirojiddinov
Isajon Sulton asarlarining bugungi o‘zbek adabiyotida tutgan o‘rni, badiiy
saviyasi haqida alohida to‘xtaldi.
Shuningdek, adibning yangi chop etilgan «Alisher Navoiy» romani adabiyot olamida katta voqelik bo‘lganini e’tirof etdi.
Adabiy kechada professorlar
Bahodir Karimov, Abdulla Ulug‘ov, dotsent Umida Rasulova va boshqalar Isajon
Sulton nasri jozibasi, o‘ziga xosligi, adibning badiiy salohiyati yuqori
ekanligini alohida e’tirof etishdi.
– Hazrat Navoiyning hayot yo‘lini
yoritish uchun hamma ham kuch topa olmaydi, –deydi adabiyotshunos olim Bahodir
Karim.– Buning uchun yozuvchida salohiyat, ilm va katta sabr kerak. Isajon
Sulton ana shu hislatlarga ega ijodkor. Bunga yangi chop etilgan «Alisher
Navoiy» romani yaqqol misoldir. Ushbu roman shunchaki yozilgan asar emas. Bu
ijodkorning uzoq yillik ijodi, mehnati samarasi o‘laroq dunyo yuzini ko‘rgan. Asar
yengil o‘qilmaydi. Unda har bir gapda olam ma’no, turli mulohaza anglashiladi.
Qolaversa, Isajon Sulton Oybek domlaning Navoiy romanidan qariyb 80 yil o‘tib,
ushbu romanni yozishga jasorat qilganligi bilan ham ahamiyatli.
Isajon Sultonning «Alisher Navoiy» romani uch ming nusxada, «Adabiyot» nashriyotida chop etilgan.
Adabiy kecha so‘nggida yozuvchi
Isajon Sulton ijod mashaqqati, quvonchi va iztirobi haqida gapirdi. Yangi chop
etilgan «Alisher Navoiy» romanining yozilish tarixi haqida qisqacha to‘xtalib
o‘tdi.
Yozuvchi talabalar tomonidan berilgan savollarga javob berdi. Ijodkor
o‘quvchilar bilan o‘zining tajriba va mahoratlarini bo‘lishdi.
D. Mamatova, O‘zA