- Bosh sahifa
- Yangiliklar
- Davlat tili taraqqiyoti: muammo va yechimlar
Davlat tili taraqqiyoti: muammo va yechimlar
Alisher Navoiy nomidagi Toshkent davlat o‘zbek tili va adabiyoti
universiteti huzuridagi Davlat tilida ish yuritish asoslarini o‘qitish va
malaka oshirish markazi tomonidan universitet binosida “Davlat tili
taraqqiyoti: muammo va yechimlar” mavzusida respublika ilmiy-amaliy anjumani
o‘tkazildi.
Anjuman o‘zbek tilining
bugungi kundagi o‘rni, ahamiyati, imlo masalalari, davlat tili sifatida nufuzi,
lug‘atlar tuzish bilan bog‘liq masalalar, shuningdek, ta’lim bosqichlarida
davlat tilining o‘qitilishiga doir soha mutaxassislarining tadqiqotlari,
izlanishlari bilan yaqindan tanishish maqsadida tashkil etildi.
Tadbirda Alisher Navoiy nomidagi Toshkent davlat o‘zbek tili va
adabiyoti universiteti rektori, filologiya fanlari doktori, professor
Sh.Sirojiddinov, O‘zbekiston Respublikasi Vazirlar Mahkamasining Ma’naviyat va
davlat tilini rivojlantirish departamenti mudiri A.Qirg‘izboyev, O‘zbekiston
Respublikasi Oliy va o‘rta maxsus ta’lim vazirining fan va innovatsiyalar
bo‘yicha o‘rinbosari, yuridik fanlar doktori, professor Rahimjon Hakimov va
boshqalar bugungi kunda o‘zbek tili rivojiga va uning nufuzini yanada oshirish
masalalariga alohida e’tibor qaratilayotganini alohida qayd etdi.
Anjuman yalpi
majlisida tegishli tashkilotlar, tilshunos olimlar tomonidan o‘zbek tilining
bugungi kundagi o‘rni, ahamiyati, davlat tili sifatida nufuzi, davlat tiliga
munosabat, imlo masalalariga bag‘ishlangan ma’ruzalar tinglandi. Shuningdek,
til masalasidagi muammo va uning yechimlari, lug‘atlar tuzish bilan bog‘liq
masalalar, davlat tilida ish yuritishdagi muammoli va mulohazali masalalar
bo‘yicha chiqishlar muhokama qilindi.
Yalpi yig‘ilishdan so‘ng “Lotin yozuviga asoslangan o‘zbek alifbosi va
imlosi”, “Davlat tilida ish yuritish masalalari”, “Neyming(nomlash)
tilshunosligi va tashqi yozuvlarni tartibga solish masalalari”, “Soha
lug‘atlarini tuzish va terminologiya masalalari” hamda “Ta’lim bosqichlarida
davlat tilining o‘qitilishi masalalari” mavzularida alohida sho‘balarga
bo‘lingan holda anjuman o‘z ishini olib bordi.
D.Mamatova,
O‘zA