- Bosh sahifa
- Yangiliklar
- TIL – MA’NAVIY YUKSALISHNING ASOSI
TIL – MA’NAVIY YUKSALISHNING ASOSI
Maʼlumki,
shu kunlarda yurtimiz bo‘ylab “Yangi
O‘zbekiston — Inson qadri ulug‘langan yurt” shiori ostida harakatlanayotgan
“Madaniyat karvoni” Samarqand viloyatida bo‘lib turibdi. Yozuvchi-shoirlar,
ziyolilar, madaniyat va sanʼat sohasi vakillaridan tarkib topgan Respublika
Maʼnaviyat va maʼrifat markazi targ‘ibotchilari viloyatning barcha go‘shalarida
davra suhbatlari, ijodiy uchrashuvlar o‘tkazishmoqda. Galdagi tadbir Markaziy
harbiy okrug Samarqand garnizoni Maʼnaviyat va maʼrifat markazi harbiy
xizmatchilar va ularning oila aʼzolari bilan bo‘lib o‘tdi.
Unda Respublika maʼnaviyat va maʼrifat markazi eksperti, xalqaro toifadagi spiker Jamila Shermuxammedova oilani mustahkamlashning huquqiy asoslari, xotin-qizlarning ijtimoiy faolligini oshirish, yosh oilalarini qo‘llab-quvvatlash, oilada milliy qadriyatlar rivoji va ularning yoshlar tarbiyasiga taʼsiri, oilada turli zararli illatlarga qarshi immunitetni hosil qilish, yoshlar tarbiyasida oila va taʼlim muassasasi hamkorligi kabi masalalar haqida qiziqarli maʼlumotlar bilan o‘rtoqlashdi.
Tadbir davomida O‘zbekiston Yozuvchilar
uyushmasi aʼzosi, maʼrifat targ‘ibotchisi, Iqtisodiy taraqqiyot
vazirligining maʼnaviy-maʼrifiy ishlar
samaradorligini oshirish, davlat tili to‘g‘risidagi qonun hujjatlariga rioya
etilishini taʼminlash masalalari bo‘yicha maslahatchisi Obiddin Maxmudov ona tilimiz xususida fikr bildirib, til va nutq
masalasi qadimdan millat maʼnaviyati va madaniyati takomilining bosh
omillaridan biri ekanligi, uning benihoya muqaddas va mo‘tabarligi haqida
batafsil tushunchalar berdi. Til shaxsning maʼnaviy kamolotida tafakkur
gulshani darvozalarini ochgan tengsiz bir vosita ekanligiga alohida to‘xtaldi.
Tadbirda, shuningdek, Vazirlar Mahkamasining Maʼnaviyat va davlat tilini rivojlantirish departamenti tashabbusi bilan Yangi O‘zbekiston taraqqiyotining rivojlanish yo‘lida o‘zbek tilining rasmiy maqomini mustahkamlashda olib borilayotgan saʼy-harakatlaridan biri sifatida “Davlat tilida ish yuritish” kitobining taqdimoti bo‘lib o‘tdi. O. Maxmudov kitobning ish yuritish hujjatlarida ahamiyatli taraflarini, foydali jihatlarini taʼkidlab, kitob haqida batafsil so‘zlab berdi.
Yakunda Markaziy harbiy okrug
Samarqand garnizoni Maʼnaviyat va maʼrifat markazi boshlig‘i Akbar
Abduxalilovga “Davlat tilida ish yuritish” kitobi shaxsiy tarkib bilan ishlash
maqsadida taqdim etildi. Shuningdek, ishtirokchilarga vatanparvarlik mavzusida
videorolik namoyish etilib, targ‘ibotchilar tomonidan maʼnaviy-maʼrifiy
kitoblar sovg‘a qilindi.