- Bosh sahifa
- Yangiliklar
- Tashqi reklama: Raqobatni qonunni buzish orqali yengib bo‘lmaydi
Tashqi reklama: Raqobatni qonunni buzish orqali yengib bo‘lmaydi
O‘zbekiston Respublikasining yangi tahrirdagi “Reklama to‘g‘risida”gi Qonuni 6-moddasi, “Davlat tili haqida”gi Qonuni 20-moddasida reklama matnlari, lavhalar, eʼlonlar, narxnomalar va boshqa ko‘rgazmali hamda og‘zaki axborot matnlari davlat tilida eʼlon qilinishi, uning boshqa tillardagi tarjimasi kichik o‘lchamda berilishi mumkinligi qayd etilgan.
Ammo
afsuski, baʼzi savdo do‘konlari yoki xizmat ko‘rsatish shahobchalari
peshtoqidagi tashqi yozuvlarda ajnabiy tildagi lavhalar uchrab turibdi.
Mazkur
holatning oldini olish maqsadida viloyat hokimining 2022-yil 13-dekabrdagi
8500-sonli bayoni bilan viloyatdagi barcha tashqi yozuvlarni tartibga keltirish
borasida tegishli mutasaddilarga topshiriqlar berildi.
Topshiriq
ijrosini taʼminlash maqsadida viloyat hokimining maʼnaviy-maʼrifiy ishlar
samaradorligini oshirish, davlat tili to‘g‘risidagi qonun hujjatlariga rioya
etilishini taʼminlash masalalari bo‘yicha maslahatchisi Akbar Rustamov,
monopoliyaga qarshi kurashish boshqarmasi bo‘lim boshlig‘i Malik Qobilov
tomonidan tashqi reklama yozuvlarini chop etish va o‘rnatish faoliyati bilan
shug‘ullanuvchi tadbirkorlik subʼektlari o‘rtasida targ‘ibot tadbirlari olib
borildi.
Uchrashuv
davomida tadbirkorlik subyektlariga
reklama va boshqa tashqi yozuvlarni chop etishda tegishli qonunchilik
hujjatlariga qatʼiy rioya etish, reklama maydonining 60 foizidan kam bo‘lmagan
qismida davlat tilidagi yozuvni joylashtirish tartibiga qatʼiy amal qilish
borasida tegishli tushuntirishlar berildi.
Suhbatlar
jarayonida maʼlum bo‘ldiki, qariyb barcha tadbirkorlar yangi tahrirdagi
“Reklama to‘g‘risida”gi qonun bilan yaxshigina xabardor. Ammo ko‘pgina
holatlarda buyurtmachining noqonuniy talabi, yaʼni ajnabiy tildagi matnni chop
etish buyurtmasi rad etilgan bir paytda boshqa tadbirkor tomonidan
qanoatlantirilayotganligi sohada nosog‘lom raqobat muhitining yuzaga kelishiga
sabab bo‘lmoqda. Buning natijasida qonun talablariga rioya etgan tadbirkor
buyurtmadan “quruq” qolib, “uchar” raqobatchi barcha buyurtmalarni ilib
ketmoqda. Shu bois ham sohadagi ko‘pgina tadbirkorlar mijozni “begona”
qilmaslik ilinjida qonun buzilishi holatlariga qo‘l urishmoqda. Yuqoridagi
holatlardan kelib chiqib yangi tahrirdagi qonun kuchga kirgan uch oylik davrda
mazkur faoliyat turi bilan shug‘ullanuvchi tadbirkorlarga moslashish uchun
sinov davri berilganligi, endilikda sohadagi har bir qonun buzilishiga tegishli
choralar qo‘llanilishi xususida ogohlantirishlar berildi.
Hozircha tadbirkorlarga mazkur yo‘nalishda tegishli
tushuntirishlar berilyapti. Tegishli xulosaga kelgan subyektlarning aksariyati
o‘z yozuvlarini davlat tili qonunchiligi talablariga moslashtirishmoqda. Qonun
talablariga bo‘ysunmagan shaxslarga chora ko‘rish bo‘yicha esa tegishli
tartibda huquqni muhofaza qiluvchi organlarga daʼvolar kiritilmoqda.
Zero, gap millatimiz ko‘zgusi bo‘lmish ona tilimiz
haqida borar ekan, bunda hech birimiz befarq bo‘lishga haqqimiz yo‘q.
Viloyat hokimligi matbuot
xizmati