- Bosh sahifa
- Maslahatchi minbari
- Davlat tiliga hurmatsizlik, uni kamsitish va buzib talqin etishga yo‘l qo‘yilmaydi
Davlat tiliga hurmatsizlik, uni kamsitish va buzib talqin etishga yo‘l qo‘yilmaydi
Yakunlangan haftada
mamlakatimiz parlamenti faoliyati bilan bog‘liq muhim voqea, bu – Oliy Majlis
Senatining o‘n oltinchi yalpi majlisi o‘tkazilgani va unda senatorlar
mamlakatimizdagi islohotlar samaradorligini yanada oshirishga qaratilgan 19 ta
masala, jumladan, 7 ta qonunni ko‘rib chiqqani bo‘ldi.
Muhokamalar jarayoni qizg‘in, bahs-munozara va fikr-mulohazalarga boy tarzda
kechdi. Yuqori palata a’zolari har bir masalaga atroflicha e’tibor qaratib,
hayotga tatbiq qilinishi mumkin, deb hisoblangan hujjatlarni ma’qulladi,
aksincha, hali maromiga yetmagan qonun asosli sabablari ko‘rsatilgan holda rad
etildi.
Mazkur yalpi majlis kun tartibidan «O‘zbekiston Respublikasining Davlat
tili to‘g‘risida»gi O‘zbekiston Respublikasining qonuniga o‘zgartish va
qo‘shimchalar kiritish haqida»gi qonun ham o‘rin olgan edi. E’tiborlisi, u
senatorlar tomonidan ma’qullandi.
Xo‘sh, nima uchun bu qonunga ehtiyoj tug‘ildi? Keling, shu haqda ayrim
fikr-mulohazalarimizni bildirib o‘tsak.
Ma’lumki, «Davlat tili haqida»gi qonun yurtimizda mustabid tuzum hali
o‘z hukmini o‘tkazib turgan murakkab bir davrda – 1989-yilning 21-oktabrida qabul
qilingan edi. Garchi o‘sha hujjatda davlat tilini hayotga to‘laqonli tatbiq
etish bilan bog‘liq barcha jihatlar qamrab olinmagan bo‘lsa-da, og‘ir bir
sharoitda tilimiz mavqeyini ko‘tarishga daxldor hujjatning kun tartibiga olib
chiqilishining o‘zi juda katta jasorat edi.
Chunki sobiq Ittifoq rahbariyati buni sira istamas, jilovni qo‘lidan
bergisi kelmasdi. Ammo fidoyi va vatanparvar ziyolilarimiz, keng
jamoatchilikning qat’iy shijoati bilan, qanchadan-qancha tortishuv hamda
bahs-munozaralardan so‘ng, qonun qabul qilingan. Bu O‘zbekistonning davlat
mustaqilligi sari qo‘yilgan ilk dadil qadam edi.
Oradan ikki yil o‘tib, O‘zbekiston Respublikasining davlat mustaqilligi
aynan ona tilimizda jahonga e’lon qilindi. Konstitutsiyamiz o‘zbek tilida
yozildi, o‘zbek tilida bitilgan madhiyamiz xalqaro maydonlarda yangray
boshladi... Bunday kunlarni ko‘rishni kimlar orzu qilib o‘tib ketmadi
deysiz.
Ammo yuqorida aytib o‘tganimizdek, qonunda ayrim istisnoli jihatlar ham
mavjudki, bu uning amalda to‘liq ishlashiga, davlat tilini hayotga to‘laqonli
joriy etishga imkon bermay kelayotgandi. Boz ustiga, yillar o‘tgach, zamon
talabi nuqtai nazaridan har qanday hujjatni ham takomillashtirishga ehtiyoj
seziladi.
Binobarin, Prezidentimiz Shavkat Mirziyoyev o‘zbek tiliga davlat tili
maqomi berilganining o‘ttiz yilligiga bag‘ishlangan tantanali marosimda ona
tilimizning davlat va jamiyat hayotidagi ta’siri va mavqeini yanada oshirish
bo‘yicha oldinda o‘ta muhim va dolzarb vazifalar turganini qayd etib, avvalo
«Davlat tili haqida»gi qonunni bugungi kun talablari nuqtai nazaridan
takomillashtirish zarurati mavjudligini ta’kidlagandi.
Prezidentimiz tomonidan qabul qilingan "O‘zbek tilining davlat
tili sifatidagi nufuzi va mavqeуini tubdan oshirish chora-tadbirlari
to‘g‘risida"gi Farmonda aynan ushbu masala Vazirlar Mahkamasi zimmasiga
yuklatildi. Ya’ni qonunning yangi tahrirdagi loyihasini ishlab chiqish va
O‘zbekiston Respublikasi Oliy Majlisi Qonunchilik palatasiga kiritish
belgilandi. Shu asosda huquqiy poydevorni mustahkamlash bilan bog‘liq
jarayonlarga kirishildi.
Qonun loyihasi ishlab chiqildi. Parlamentga taqdim etildi. Uning
muhokamasida keng jamoatchilik, xususan, vazirlik, idora va xo‘jalik
birlashmalari rahbarlarining ma’naviy-ma’rifiy ishlar samaradorligini oshirish,
davlat tili to‘g‘risidagi qonun hujjatlariga rioya etilishini ta’minlash
masalalari bo‘yicha maslahatchilari ham takliflari bilan qatnashdi.
Vazirlar Mahkamasining Ma’naviyat va davlat tilini rivojlantirish
masalalari departamenti tomonidan til bo‘yicha maslahatchilar bilan tez-tez
o‘tkazib turiladigan muloqotlarda ham qonunchilikning amalda ishlashiga xalal
berayotgan omillar, muammolar xususida doim so‘z yuritiladi, ularni birgalikda bartaraf
etish yuzasidan takliflar o‘rtaga tashlanadi.
Ko‘plab hayotiy, achchiq misollar keltiriladi. Masalan, ayrim shaharlar
ko‘chalaridagi reklama va tashqi yozuvlar, e’lonlarning juda katta qismi
xorijiy tillarda ekani, jumladan, rus tilida yozilgani, ba’zi tadbirkorlarning
o‘zi birorta xorijiy tilni bilmasa-da, ochgan do‘konining tepasiga chet tilida
e’lon yopishtirishi, O‘zbekistonning qaysidir bir chekka qishlog‘ida umuman
boshqa millat vakili yo‘q bo‘la turib, do‘konga «Мы открылись» («Biz ochildik»),
deya yozib qo‘yilishi kabi holatlar, haqiqatan ham, dilni xira qiladi.
O‘zbek tilida bitilganlarida esa imlo xatolar ko‘p uchraydi. Nahotki
ona tiliga hurmat, munosabat shu bo‘lsa, degan savollar o‘rtaga tashlanadi.
Bunday holatlarga qarshi faqatgina Vazirlar Mahkamasining Ma’naviyat va davlat
tilini rivojlantirish masalalari departamenti emas, butun jamiyat kurashishi
kerakligi aytiladi.
Departament mudiri Abdug‘affor Qirg‘izboyevning qayd etishicha, yangi
tahrirdagi qonun qabul qilinsa, ahvol butunlay o‘zgaradi. Endi javobgarlik
qat’iylashadi. Davlat tiliga hurmatsizlik qilish, uni kamsitish va buzib talqin
etishga yo‘l qo‘yilmaydi. Xususan, yangi qonunda reklama bannerlari, e’lon va
peshlavhalar to‘liq davlat tilida bo‘lishi belgilanmoqda. To‘g‘ri, bu masala
huquqiy jihatdan mustahkamlab qo‘yilyapti. Lekin aslida qalbida g‘ururi,
Vataniga muhabbati bor inson hech qanday ta’sir chorasi yoki eslatmalarsiz ham
ona tilini qadrlaydi, uni asrab-avaylashga intiladi.
Ta’kidlash joiz, qonunda davlat organlari va tashkilotlari faoliyatida
davlat tilining qo‘llanilishi, ish yuritish tili, davlat organlari va
tashkilotlari tomonidan o‘tkaziladigan tadbirlarda davlat tilining
qo‘llanilishi, normativ-huquqiy va boshqa hujjatlar, shuningdek, ularning loyihalarida
foydalaniladigan til, jismoniy va yuridik shaxslarning murojaatlarida
ishlatiladigan til, sud ishlarida yuritiladigan til, fuqarolik holati
dalolatnomalarini qayd etish, fuqaroning shaxsini va huquqlarini tasdiqlashda
qo‘llaniladigan til masalalari ham batafsil belgilangan.
Umuman aytganda, qonunning qabul qilinishi ijtimoiy hayotning barcha
jabhasida davlat tilining rivojlanishi va keng ommalashishiga xizmat
qiladi.
Shavkat ORTIQOV,
Investitsiyalar va tashqi savdo
vazirining maslahatchisi
uza.uz