- Bosh sahifa
- Yangiliklar
- Adiblar xiyobonida “Jahon tamaddunida – Temuriylar davri renessansi” mavzusida madaniy-maʼrifiy tadbir bo‘lib o‘tdi
Adiblar xiyobonida “Jahon tamaddunida – Temuriylar davri renessansi” mavzusida madaniy-maʼrifiy tadbir bo‘lib o‘tdi
Mustaqillik yillarida yurtimizda tarixni yozma
manbalar asosida tadqiq etishga eʼtibor kuchaydi, ajdodlarimiz tomonidan uzoq
o‘tmishda yaratilgan madaniy-maʼnaviy merosni o‘rganish va targ‘ib qilish
dolzarb masalalar qatoriga qo‘yildi.
Ilm-fan, madaniyat rivojiga
ulkan hissa qo‘shgan ajdodlarimizning unutilgan nomlari qayta tiklandi. Dunyo
tamaddunida biz faxr bilan tilga oladigan har ikkala sharq renessansi
ajdodlarimiz nomi bilan bog‘lanadi. Ilm-fan, adabiyot, madaniyat, sanʼatni
gullab yashnagan davri bu shubhasiz Temuriylar davri, chin maʼnoda
Temuriylar davri renessansi deyishga to‘la haqlimiz.
Anashu davrning atoqli va
dunyo tamadduniga katta hissa qo‘shgan allomalari buyuk mutafakkir Alisher
Navoiy va shoh va shoir Zahiriddin Muhammad Boburlar hisoblanadi.
Alisher Navoiy va Zahiriddin
Muhammad Boburlar kabi buyuk allomalar turkiy til rivojiga o‘zining yaratib
qoldirgan asarlarida insonparvarlik, xalqparvarlik, adolatlilik, go‘zallikni
tarannum etuvchi g‘oyalari bilan to‘yintirish bilan bir qatorda
ijtimoiy-siyosiy qarashlar ham keng qamrovga ega hisoblanadi.
Bu buyuk allomalar nafaqat
ijod jabhasida shu bilan bir qatorda davlat arbobi, davlat boshqaruvining
adolatli yo‘lini tutgan davlat arboblari sanaladi.
Shu boisdan Alisher
Navoiy va Zahiriddin Muhammad Boburni Temuriylar davri renescansining yirik
namoyondalari deb eʼtirof etiladi, ular yaratib qoldirgan nodir asarlarda
ko‘tarilgan g‘oyalar tadqiq etilib kelinmoqda.
Joriy yilning 5 fevral kuni
Adiblar xiyoboni Alisher Navoiy haykali poyida Davlat bojxona qo‘mitasi,
Bojxona instituti, O‘zbekiston Yozuvchilar uyushmasi bilan hamkorlikda
buyuk mutafakkir Alisher Navoiy tavalludining 580 yilligi hamda shoh va shoir
Zahiriddin Muhammad Bobur tavalludining 538 yilligi munosabati bilan “Jahon
tamaddunida – Temuriylar davri renescansi” mavzusida
madaniy-maʼrifiy tadbir tashkil etildi.
Tadbirda G‘ayrat Majid, Nurboy
Jabborov, Murodxon Kalonxonov, Olimjon Davlatov va Maʼmuna Zohidova kabi
O‘zbekiston Yozuvchilar uyushmasi aʼzolari va olimlar, shuningdek, Davlat
bojxona qo‘mitasi masʼul xodimlari, Bojxona instituti professor-o‘qituvchilari
va kursantlar ishtirok etishdi.
Tadbir Alisher Navoiy va
Zahiriddin Muhammad Boburning haykali poyiga gul qo‘yish marosimi bilan
boshlandi.
Tadbirda so‘z olgan
adabiyotshunos olimlar, yozuvchilar tomonidan Buyuk shoir va mutafakkir, atoqli
davlat va jamoat arbobi Alisher Navoiy va Zahiriddin Muhammad Boburning bebaho
ijodiy-ilmiy merosi nafaqat xalqimiz, balki jahon adabiyoti tarixida, milliy
madaniyatimiz va adabiy-estetik tafakkurimiz rivojida alohida o‘rin tutishi,
ular o‘zlarining sheʼriy va nasriy asarlarida yuksak umuminsoniy g‘oyalarni,
ona tilimizning beqiyos so‘z boyligi va cheksiz ifoda imkoniyatlarini butun
jozibasi va latofati bilan namoyon etib, yer yuzidagi millionlab kitobxonlar
qalbidan munosib va mustahkam o‘rin egallaganligini alohida taʼkidlab o‘tdilar.
Bu ikki buyuk allomaning ibratli hayot yo‘li, umuminsoniy g‘oyalarga
yo‘g‘rilgan asarlari asosida yoshlarimizni qurollantirib, vatani, xalqiga
xizmat qiladigan yosh avlodni tarbiyalashda eng munosib qo‘llanma bo‘lishini
aytib o‘tdilar.
Tadbirda Davlat bojxona
qo‘mitasi Raisi maslahatchisi H.Azizov so‘zga chiqib, g‘azal va sheʼriyat
sultoni, tasavvuf ilmining zargari Alisher Navoiy va ham shoir, ham sarkarda
Zahiriddin Muhammad Bobur kabi daholar badiiy ijodda, ilmda, davlat boshqaruvi
va harbiy sanʼatda obro‘ qozonishi faqatgina bu yo‘nalishlarda emas, balki
millat, xalqaro hamjamiyatning maʼnaviy tafakkuridagi yuksalishlarga xizmat
qilishini taʼkidladi. Ularning noyob isteʼdodi, qoldirgan boy merosi millat
nufuzi buyukligini saqlashga, nomini ko‘klarga ko‘tarishini aytib o‘tdi.
Bir so‘z bilan aytganda ular
va ulardek buyuk darajaga, oliy martabaga yetgan farzandlar xalqning baxti,
iqboli va saodatidir.
Tadbirda taʼkidlanganidek,
Alisher Navoiy ona zaminimiz Samarqandda 1465-yildan 1469-yilning bahorigacha
Fazlulloh Abu Lays madrasasida o‘qib, ilm olgan. Hozirda mazkur hududda masjid
faoliyat ko‘rsatayotgan bo‘lsada, madrasa saqlanib qolmagan. Mazkur joyni ham
muqaddas sanab, Alisher Navoiydek buyuk zotga ziyo ulashgan qadamjo va ilm
maskani sifatida eʼzozlanishi lozim. Samarqand shahri hokimi hirotlik Ahmad
Hojibekning yordamida ilk marta davlat ishlari bilan ham shug‘ullanishni
boshlaganligi eʼtirofga molik. Alisher Navoiyning Samarqanddagi siyosiy va
davlat faoliyati yuqori baholanib, unga “Chig‘atoy amiri” unvoni berilgan.
Hazrat Alisher Navoiy aynan
shu zaminda o‘zi “Qutbi tariqat” deb eʼtirof etgan Xoja Ahror Valiyni o‘ziga
pir, hammaslak bilgan. Xoja Ubaydulloh Ahror ham o‘z navbatida Navoiy
qalamining muxlisi sifatida shoir ijodiga yuksak baho bergan. O‘zaro xat yozishib
turishgan, bizgacha Xoja Ahrorning Navoiyga yozgan 128 ta xatlari yetib kelgan.
Yozishmalardan ikki ulug‘ zot o‘rtasidagi piru muridlik va ustoz-shogirdlik,
do‘st-birodarlik munosabatlarini anglash mumkin.
U tabiatan mehr va muruvvatda,
karam va saxovatda, kamtarlikda tengi yo‘q inson bo‘lgan. Kiyimiga ilashgan
chumolini uyasiga olib borib qo‘yganligi, chodiriga qo‘ygan musicha inini
paloponlari uchgunga qadar buzmaganligi hammamizga ibrat bo‘lishi ham farz, ham
qarz.
Tadbir davomida Bojxona instituti ijodkor
kursantlari g‘azalxonlik chiqishlarini yig‘ilganlarga havola etdilar.
H.Azizov
Davlat bojxona qo‘mitasi
raisining maslahatchisi
bojxona.uz