- Bosh sahifa
- Yangiliklar
- Oqilona tashabbus
Oqilona tashabbus
Ma’lumki, 2021-yil 12-yanvar
kuni O‘zbekiston Respublikasi Prezidenti raisligida o‘tkazilgan Xavfsizlik
kengashining yig‘ilishida O‘zbekiston Respublikasi Qurolli Kuchlari tizimida
davlat tilining qo‘llanishini kengaytirish bo‘yicha bir qator vazifalar belgilab
berilgan edi.
Shunga ko‘ra, O‘zbekiston
Respublikasi Vazirlar Mahkamasining Ma’naviyat va davlat tilini rivojlantirish
departamenti tomonidan 2020-2030-yillarda o‘zbek tilini rivojlantirish va til
siyosatini takomillashtirish Konsepsiyasiga muvofiq Qurolli Kuchlar tizimlarida
davlat tilining qo‘llanilishini kengaytirish, qo‘shin va bo‘linmalar kundalik
faoliyatida undan to‘g‘ri va to‘liq foydalanish, o‘zbek tilidagi ilmiy
asoslangan harbiy atamalarni iste’molga kiritish, zamonaviy harbiy atamalarning
o‘zbekcha muqobillarini yaratish va bir xilda qo‘llanishini ta’minlash, harbiy
xizmatchilar va huquq-tartibot organlari xodimlarining davlat tiliga
hurmat-e’tiborini tubdan o‘zgartirish, ularda vatanparvarlik, milliy an’ana va
qadriyatlarga sadoqat tuyg‘ularini yanada oshirish bo‘yicha bir qator tadbirlar
amalga oshirib kelinmoqda.
O‘zbekiston Respublikasi
Prezidentining «O‘zbekiston Respublikasi Qurolli Kuchlari va huquqni muhofaza
qiluvchi organlari tizimida davlat tilining qo‘llanishini kengaytirishga doir
qo‘shimcha-chora tadbirlar to‘g‘risida» 2021-yil 12-iyul kunidagi F-5675-son
Farmoni bu boradagi islohotlarga yanada keng yo‘l ochdi. Ushbu oqilona tashabbus,
shubhasizki, O‘zbekiston Respublikasi Qurolli Kuchlari va huquqni muhofaza
qiluvchi organlari tizimida davlat tilining qo‘llanishini kengaytirish bilan
bog‘liq ishlarni yanada jadallashtirishga xizmat qiladi.
Farmoyish bilan harbiy
atamashunoslik bo‘yicha yetuk olim va mutaxassislardan iborat Zamonaviy harbiy
atamalarning davlat tilidagi muqobillarini ishlab chiqish, ularni iste’molga
kiritish va bir xilda qo‘llanishini ta’minlash bo‘yicha ishchi guruhi ilovaga
muvofiq tashkil qilingan bo‘lib, ushbu ishchi guruhiga bir qator vazifalar
yuklangan.
Shuningdek, Farmoyishda
O‘zbekiston Respublikasi Qurolli Kuchlari va huquqni muhofaza qiluvchi
organlari zimmasiga o‘z harbiy qism va muassasalarning kundalik faoliyatida
davlat tilidan to‘g‘ri va to‘liq foydalanishni ta’minlash choralarini ko‘rish;
kundalik faoliyatda qo‘llanayotgan harbiy sohaga doir atamalarning davlat
tilidagi ilmiy asoslangan muqobillarini ishlab chiqish bo‘yicha
chora-tadbirlarni amalga oshirish; rahbar kadrlarni lavozimlarga tayinlashda
nomzodlarning davlat tilini bilishi va davlat tilida ish yuritish ko‘nikmasiga
egaligini e’tiborga olish va yana bir qator vazifalar yuklangan.
Shunday ekan, ushbu e’tibor va
imkoniyatlardan oqilona foydalangan holda, O‘zbekiston Respublikasi Qurolli
Kuchlari va huquqni muhofaza qiluvchi organlari o‘z tizimlarida davlat tilini
rivojlantirishi, uni keng targ‘ib qilishi, harbiy xizmatchi va xizmatchilarning
davlat tilida ish yuritish borasidagi malakalarini oshirishi, buning uchun
munosib shart-sharoit yaratishi, davlat tilini rivojlantirishga oid
ilmiy-uslubiy loyihalarni qo‘llab-quvvatlashi, samarali amalga oshirishi,
ma’naviy-ma’rifiy ishlar, xususan, davlat tili targ‘ibotiga bag‘ishlangan
tadbirlarni yanada jadallashtirishi, jamoalarda davlat tiliga hurmat
tuyg‘ularini yuksaltirishi lozim.
Jumladan, O‘zbekiston
Respublikasi Favqulodda vaziyatlar vazirligi tizimida ham bu borada bir qator
ishlar amalga oshirib kelinmoqda. Vazirlik tizimida tashkil qilingan ishchi
guruhlar tomonidan hududiy boshqarmalar va tarkibiy tuzilmalardagi tashqi
yozuv, peshlavha va stendlar davlat tili talablariga muvofiqlik jihatdan ko‘rib
chiqilib, ushbu tadbirlar jarayonida ularni yangilash, ma’nan eskirgan tashqi
yozuvlarni bartaraf qilish ishlari amalga oshirilmoqda.
Farmoyishning 4-bandi «d»
kichik bandi («Barcha ish yuritish hujjatlari, turli blankalarning lotin
yozuviga asoslangan o‘zbek alifbosida bo‘lishini ta’minlash») yuzasidan
Favqulodda vaziyatlar vazirligining tegishli ko‘rsatmalari chiqarilib, ushbu
hujjatlarga asosan vazirlik tizimida joriy yilning 1 avgust kuniga qadar
hududiy boshqarma va tarkibiy tuzilmalar, ularning quyi bo‘g‘inlarining
nomlari, atamalar, peshlavhalar, ommaviy targ‘ibot vositalari, reklama va
e’lonlar; ish qog‘ozlari va turli blanklarning lotin yozuviga asoslangan o‘zbek
alifbosida bo‘lishi ta’minlash bilan bog‘liq chora-tadbirlar amalga oshirildi.
Mazkur tadbirlar jarayonida
vazirlik tizimi bo‘yicha jami 304 ta nom, 329 ta atama, 1191 ta peshlavha, 2297
ta ommaviy targ‘ibot vositasi, 137 ta reklama va e’lonlar matni, 1782 ta
ish qog‘ozi, 808 ta blank, 840 ta muhr va shtamplarning lotin yozuviga
asoslangan o‘zbek alifbosida bo‘lishi ta’minlandi va hozirda ushbu ishlar
izchil davom ettirilmoqda. Bu borada vazirlikning Shahrisabz shahridagi
“Temurbeklar maktabi» harbiy akademik litseyi tajribasi namuna sifatida tanlab
olinib, tizimga keng tatbiq qilindi.
Vazirlik tomonidan chiqarilgan
hujjatlar davlat tilida ish yuritish nuqtai nazaridan xatlovdan o‘tkazilib,
yakuniy natijalarga ko‘ra, hujjatlarni qat’iy ravishda davlat tilida ishlab
chiqish tartibi yo‘lga qo‘yildi. Joriy yilning 1-yarmi davomida Qashqadaryo,
Andijon, Farg‘ona, Namangan va Xorazm viloyatlari Favqulodda vaziyatlar
boshqarmalari tizimlarida ma’naviy-ma’rifiy ishlar, davlat tilida ish yuritish
holati o‘rganildi. Muammolar o‘rnida bartaraf qilinib, mutaxassislarga zarur
amaliy yordamlar ko‘rsatildi. O‘rganish tadbirlari davomida tashqi yozuv,
peshlavha va stendlar bilan bog‘liq bir qator kamchiliklar bartaraf qilindi.
Vazirning birinchi
o‘rinbosarining ko‘rsatmasiga asosan Qoraqalpog‘iston Respublikasi, Toshkent
shahar va viloyatlar FVBlari hamda tarkibiy tuzilmalarida rahbarning
ma’naviy-ma’rifiy ishlar samaradorligini oshirish, davlat tili to‘g‘risidagi
qonun hujjatlariga rioya etilishini ta’minlash masalalari bo‘yicha
maslahatchisi vazifasi munosib nomzodlarga yuklatilgan bo‘lib, ular tomonidan
vazirlik tizimida davlat tilida ish yuritish bilan bog‘liq tadbirlar tashkil
etib kelinmoqda.
Hozirgi kunda vazirlik tizimi
harbiy xizmatchilari va xizmatchilari belgilangan rejaga asosan Alisher Navoiy
nomidagi Toshkent davlat o‘zbek tili va adabiyoti universiteti huzuridagi
Davlat tilida ish yuritish asoslarini o‘qitish va malaka oshirish markazi hamda
uning hududiy bo‘linmalarida o‘z malakalarini oshirib kelmoqdalar. Joriy
yilning birinchi yarim yilligida vazirlik Markaziy apparatida har haftaning
juma kuni o‘tkaziladigan Ma’naviyat va ma’rifat mashg‘ulotining bir qator
mavzulari davlat tiliga bag‘ishlanib, ularga taniqli tilshunos olimlar va
ijodkorlar taklif etilib, ma’naviy-ma’rifiy tadbirlar tashkil qilindi.
Vazirlik tizimida davlat
tilini rivojlantirish, uni faol targ‘ib qilish, jamoalarda o‘zbek tiliga
nisbatan chuqur hurmat-ehtirom tuyg‘usini
qaror toptirish maqsadida
maslahatchi tomonidan jami 20 ga yaqin, tizim xodimlari tomonidan 10 dan ortiq
maqolalar chop etildi. Shu bilan birga, vazirlikning «Vaziyat» gazetasida
«Maslahatchi minbari» rukni tashkil qilinib, ushbu ruknda vazirlik tizimidagi
maslahatchilarning davlat tili targ‘ibotiga oid maqolalari chop etib
kelinmoqda. Bundan tashqari, bugungi kunda O‘zRFA O‘zbek tili, adabiyoti va folklori
instituti bilan hamkorlikda vazirlik tizimi uchun «Davlat tilida ish yuritish»
qo‘llanmasi hamda «Aholi va hududlarni favqulodda vaziyatlardan muhofaza
qilishga oid terminlar lug‘ati»ni tayyorlash ishlariga kirishilgan.
Albatta, bunday tadbirlarni amalga
oshirishda vazirlik, qo‘mita va davlat xizmatlari rahbarlarining
ma’naviy-ma’rifiy ishlar samaradorligini oshirish, davlat tili to‘g‘risidagi
qonun hujjatlariga rioya etilishini ta’minlash masalalari bo‘yicha
maslahatchilarining zimmasiga ulkan mas’uliyat yuklanadi. Ular bu boradagi
ishlarda oldingi safga chiqishlari, o‘z jamoadoshlarini davlat tilining
nufuzini oshirishdek ezgu va xayrli ishlar sari ruhlantirishlari, undashlari
lozim.
Bunda ma’naviy-ma’rifiy
ishlarga mas’ul xodim va mutaxassislarning ham hissasi katta bo‘lishi kerak.
Bugun ma’naviyatchilar va davlat tili bo‘yicha maslahatchilar bir jamoa bo‘lib,
bir yoqadan bosh chiqarib ishlaganlaridagina kutilgan natijalarga erishish
mumkin. Chunki ma’naviyat va til tushunchalari bir-biriga uzviy, egizak
so‘zlardir. Biri ikkinchisisiz yashay olmaydi.
Shunday ekan, egallab turgan
vazifamiz, kasbimiz, faoliyatimizdan qat’i nazar, barchamiz ma’naviyat, jondek
aziz ona tilimiz, ya’ni davlat tilining faol targ‘ibotchisi va fidoyisi
bo‘lishimiz lozim. Zero, ona tilimiz – bugunimiz va nurli kelajagimiz
ko‘zgusidir.
Bahodir Valiyev,
Favqulodda vaziyatlar vazirining maslahatchisi
uza.uz