- Bosh sahifa
- Yangiliklar
- Davlat tili ustuvorligini taʼminlashning qonuniy asoslari yaratildi
Davlat tili ustuvorligini taʼminlashning qonuniy asoslari yaratildi
21-oktabr – O‘zbek tili
bayrami kuni
Dunyodagi
yirik tillar katalogi – Ethnologue
maʼlumotlariga ko‘ra, 2020 yilga kelib kurrai zaminimizda 7 139 ta til
mavjud va ularning eng keng tarqalgan 40 tasida Yer aholisining uchdan ikki
qismi so‘zlashadi. Kommunikatsiyalarning rivojlanishi, globallashuv va
migratsiya, urbanizatsiya jarayonlari oqibatida ular soni ham kamaymoqda.
Statistik maʼlumotlar taxminan har ikki haftada bitta til “o‘lik tillar”
ro‘yxatidan joy olayotganini ko‘rsatadi.
Yana
qiziq jihati, dunyodagi barcha xalqlarning milliy mustaqilligi bo‘lsa-da,
ularning hammasi ham rasmiy tiliga ega emas. Bor-yo‘g‘i yuzga yaqinigina davlat
tili maqomini olgan. Albatta, biz bu borada faxr etsa arzigulik, munosib va
sharafli o‘rindamiz.
Tilimizning
bugungi ahvoli, uning davlat tili maqomini mustahkamlash borasidagi qonunchilik
meʼyorlari haqida Vazirlar Mahkamasining Maʼnaviyat va davlat tilini
rivojlantirish masalalari departamenti mudiri, tarix fanlari doktori, professor
Abdug‘affor QIRG‘IZBOYEV bilan
suhbatlashdik.
– Abdug‘affor aka, mavzuni tilning inson hayotidagi o‘rnidan
boshlasak...
–
Inson ona tili orqali dunyoni o‘zlashtiradi, tarixini o‘rganadi, o‘zligini
taniydi, maʼrifatli bo‘ladi. Shu tilda umr bo‘yi muloqot qiladi, faoliyat
yuritadi. Bu millat shaʼni, o‘zligi, bebaho qadr-qimmati. Ona tili davlat tili
maqomida bo‘lmagan xalqlar yaxshi ishlash, farovon hayot kechirish uchun
boshqa tillarni o‘rganishga majbur bo‘ladi.
O‘zbek
xalqi o‘z tarixi mobaynida ona tilida ish yurita olmagan, nutq so‘zlay olmagan
davrlarni ham boshidan o‘tkazdi. O‘zi yashaydigan mahallani, tug‘ilgan joyni
o‘z tilida nomlay olmagan paytlar ham bo‘ldi, bunga yaqin tarix guvoh.
1989-yil 21-oktabrda
ona tilimizga davlat tili maqomi berilgach, yaʼni “Davlat tili haqida”gi
tarixiy Qonun qabul qilinishi bilan fikrni erkin bayon qilish huquqi va katta
imkoniyat – ona tilida gapirish, ish yuritish, ijod qilishni qo‘lga kiritdik.
Shundan so‘ng mamlakatda ko‘plab amaliy ishlar boshlandi. “Davlat tili
haqida”gi Qonun ijrosini taʼminlash, ayrim o‘zlashma atamalar o‘rniga
yangilarini taklif qilish, ko‘chalar, geografik obyektlar nomlarini o‘zbek
tiliga o‘tkazish ishlariga kirishildi.
–
Oradan o‘ttiz yildan ortiq vaqt o‘tibdi: qo‘lga kiritgan natijalarimiz
quvonarlimi?
–
Afsuski, bu davr oralig‘ida o‘zbek tili o‘zining davlat tili sifatidagi
maqomini to‘la egallay oldi, deya olmaymiz. Yaʼni ish yuritishni davlat tiliga
to‘laqonli o‘tkazish vazifasi uddalanmadi. Buning natijasida keyingi yillarda
o‘zbek tili taʼlimi, o‘zbek tilida ish yuritish, nomlash ishlari, atamalardan
foydalanish masalalarida ko‘plab muammolar paydo bo‘la boshladi. Maʼlum
bo‘ldiki, birgina “Davlat tili haqida”gi Qonun bilan mavjud muammolarni hal
qilib bo‘lmas ekan.
Ana
shu muammolarning yechimi o‘laroq Prezidentimiz Shavkat Mirziyoyev tomonidan
2019-yil 21-oktabr kuni – o‘zbek tiliga davlat tili maqomi
berilganligiga 30 yil to‘lishi munosabati bilan “O‘zbek tilining davlat tili
sifatidagi nufuzi va mavqeini tubdan oshirish chora-tadbirlari to‘g‘risida”gi
tarixiy Farmon imzolandi. Mazkur hujjat mamlakatda davlat tilini rivojlantirish
ishlarining yanada jonlanishiga asos bo‘ldi.
Farmonda
belgilangan vazifalar doirasida yana bir muhim qadam – Vazirlar Mahkamasida
Maʼnaviyat va davlat tilini rivojlantirish masalalari departamentining tashkil
etilgani bo‘ldi. Departament mamlakatda davlat tilini rivojlantirish ishlarini
tashkil etish va muvofiqlashtirish masalalari bilan shug‘ullanib kelmoqda. O‘tgan
qisqa davr mobaynida tuzilmaning tashabbusi va bevosita ishtirokida o‘zbek
tilini ona tili va davlat tili sifatida rivojlantirish, mamlakatimiz hamda
xalqaro miqyosda uning nufuzini oshirish borasida bir qator tizimli ishlar
amalga oshirildi.
–
Masalan, qanday ishlar?
–
Masalan, qonun hujjatlarini takomillashtirish yo‘nalishda 1989-yildan 2019-yilgacha bor-yo‘g‘i bitta qonun asosida faoliyat yuritib kelgan bo‘lsak,
o‘tgan ikki yil mobaynida davlat tilini rivojlantirishga qaratilgan jami 19 ta
meʼyoriy-huquqiy hujjat, jumladan, 1 ta Qonun, O‘zbekiston Prezidentining 2 ta
farmoni va 3 ta qarori, shuningdek, Vazirlar Mahkamasining 13 ta qarori qabul
qilindi. Mazkur meʼyoriy hujjatlar asosida mamlakatda davlat tilida ish
yuritishni tartibga solish imkoniyati paydo bo‘ldi, har bir tizimda o‘zbek
tilining nufuzini oshirish, maʼnaviy-maʼrifiy ishlar samaradorligini oshirish
bo‘yicha rahbar maslahatchisi, bir so‘z bilan aytganda, nazoratchi, davlat
tilida ish yuritish ishlariga masʼul belgilandi.
Maslahatchilarning
saʼy-harakati bilan bugun vazirlik va idoralarda hujjatlar davlat tilida
yuritilmoqda. Shuningdek, har bir tashkilotda davlat tilini bilmaydigan boshqa
millat vakillariga o‘zbek tilini o‘rganish uchun qulay sharoitlar yaratib
berilmoqda.
Til
siyosatini qo‘llab-quvvatlash, istiqboldagi vazifalarni belgilab olish
maqsadida “Mamlakatimizda o‘zbek tilini yana-da rivojlantirish va til
siyosatini takomillashtirish chora-tadbirlari to‘g‘risida”gi PF-6084-son
Farmon, 2020 – 2030-yillarda
o‘zbek tilini rivojlantirish va til siyosatini takomillashtirish konsepsiyasi,
shuningdek, uni amalga oshirish dasturlari tasdiqlandi va bosqichma-bosqich
amaliyotga joriy etib borilmoqda.
Mazkur
Konsepsiya va uning amalga oshirish dasturi keyingi o‘n yillikda mamlakatda til
siyosati qanday bo‘lishi, o‘zbek tilini ilmiy rivojlantirish, sohaviy
terminologiyani takomillashtirish, hali amaliyotda bo‘lmagan o‘quv lug‘atlarini
yaratish va uzluksiz taʼlim tizimida davlat tili taʼlimi samaradorligiga hissa
qo‘shishni ko‘zda tutadi.
O‘zbek
tili va adabiyoti bo‘yicha fundamental va amaliy tadqiqotlar samaradorligini
yanada oshirish chora-tadbirlari ishlab chiqildi. Shu asosda keyingi yildan
boshlab o‘zbek tilini rivojlantirishga zamonaviy yondashuvni kuchaytiramiz.
Bugun jamiyatimiz aʼzolari barcha sohada tezkorlik va qulaylikni afzal
bilmoqda. Kitob shaklidagi lug‘atlarning ham o‘ziga xos alohida o‘rni bor, ammo
davr barcha sohada elektronlashishni talab qilmoqda, shuning uchun 2022-yildan boshlab o‘zbek tilining milliy korpusini
yaratish, tilning internetdagi elektron platformasini yaratish ishlariga
alohida eʼtibor beriladi.
O‘zbekiston
Respublikasining “O‘zbek tili bayrami kunini belgilash to‘g‘risida”gi
Qonunining qabul qilinishi ham katta ijtimoiy ahamiyatga ega bo‘ldi. Endi bu
kunda nafaqat taʼlim muassasalari, balki oilalarda, mahallalar, tizim
tashkilotlarida o‘zbek tili bayrami ommaviy nishonlanadi. Xalq orasida ona
tilimizning obro‘si yuksalib boradi, milliy qadriyatga aylanadi.
–
Darvoqe, Vazirlar Mahkamasining “Rahbar kadrlar va masʼul lavozimlarga
tayinlanadigan shaxslarning davlat tilini bilish darajasini aniqlash va ularga
davlat tilini bilish bo‘yicha daraja sertifikatini berish tartibi to‘g‘risidagi
nizomni tasdiqlash haqida”gi 52-son qarori mohiyati haqida alohida to‘xtalib
o‘tsangiz...
–
Maʼlumki, davlat tiliga eʼtibor har bir tizimda uning rahbaridan boshlanadi.
Agar tashkilot rahbari ona tilini qadrlasa, davlat tiliga hurmat bilan
munosabatda bo‘la olsa, tizimda davlat tilida ish yuritish, o‘z-o‘zidan
rivojlanib boraveradi. Rahbar davlat tilini talab darajasida bilmasa, jamoada
tilga munosabat shunga yarasha bo‘ladi.
Shu
maʼnoda Vazirlar Mahkamasining mazkur qarori asosida yangi tayinlanadigan har
bir rahbar kadr davlat tilini bilish bo‘yicha daraja sertifikatiga ega bo‘lishi
shart ekanligi belgilab qo‘yildi. Bu – kelgusida jamiyatimizning barcha
sohalarida o‘zbek tilining mavqeini oshiradi, davlat tilini o‘rganishga bo‘lgan
qiziqish va ehtiyojni paydo qiladi.
Har
bir xalq hayotida yozuv katta ahamiyatga ega bo‘lgani bois, tilimizni ifodalab
beruvchi lotin yozuviga asoslangan o‘zbek alifbosiga bosqichma-bosqich to‘liq
o‘tishni taʼminlash chora-tadbirlari bo‘yicha ham qaror qabul qilinganidan
xabadorsiz.
–
Bunga qanday ehtiyoj bor edi?
–
Maʼlumki, lotin alifbosi o‘zbek tiliga xos bo‘lgan ko‘plab tovushlarni
to‘g‘ridan-to‘g‘ri ifodalay oladi. Bu alifbodan bugungi kunda rivojlangan
mamlakatlarning o‘ttiz foizi foydalanadi. Shu maʼnoda, lotin alifbosi jahoniy
taraqqiyot, texnika va internet tilini ifodalab turgani bilan ham ahamiyatli.
Lotin
yozuviga asoslangan o‘zbek alifbosiga ayrim o‘zgarishlar kiritilishi ham
ijtimoiy zaruratdan kelib chiqdi. O‘zingiz bilasiz, bugungi davr shiddat bilan
ishlash, tezkor faoliyat yuritishni talab qiladi. Tilni kompyuter
texnologiyalari bilan integratsiya qilish jarayoni ayrim harflarning
yozilishida noqulayliklar, ortiqcha vaqt sarflanishiga olib kelayotganini
ko‘rsatmoqda. Albatta, alifbo va imlo masalalarini isloh qilishda
shoshma-shosharlikka yo‘l qo‘yib bo‘lmaydi, shu sababli u olimlar va
jamoatchilik tomonidan keng muhokama qilinmoqda, takliflar o‘rganilmoqda.
–
Davlat tilining obro‘sini oshirish uchun nom berish masalalariga ham alohida
eʼtibor berish lozim, shunday emasmi?
–
Gapingiz to‘g‘ri. Bugun respublikamizning deyarli barcha hududlarida maishiy
xizmat ko‘rsatish obyektlariga qo‘yilgan nomlarni qoniqarli deb bo‘lmaydi. Shu
maʼnoda hukumatimiz tomonidan imzolangan “Savdo, ishlab chiqarish va xizmat
ko‘rsatish obyektlariga nom berishni takomillashtirish chora-tadbirlari
to‘g‘risida”gi qaror bu boradagi ishlarni tizimli tashkil qilishga sharoit
yaratib berdi.
Shuningdek,
o‘zbek tilining nufuzini oshirish uchun tilimizda faol qo‘llanuvchi atamalarni
ham qayta ko‘rib chiqish, imkon qadar o‘zlashma atamalarni o‘zbekcha
muqobillari bilan almashtirish va muomalaga kiritish masalalarini tizimli
tashkil etish maqsadida Vazirlar Mahkamasi huzurida Atamalar komissiyasi
faoliyati yo‘lga qo‘yilganligini alohida taʼkidlash lozim. Tilimiz sofligini
taʼminlash, milliy o‘ziga xoslikni avaylab-asrash uchun bu nihoyatda zarur.
Shaharu
qishloqlarimiz, aholi gavjum manzillar hamda mamlakatimiz qon tomiri bo‘lgan
yo‘llar bo‘yida barpo etilgan targ‘ibot qurilmalaridagi yozuvlarni tartibga
solish ham asosiy masalalarimizdan hisoblanadi.
O‘tgan
davr mobaynidagi o‘rganishlar natijasida mavjud tashqi yozuvlarning 32 359
tasi o‘zgartirilishi lozim ekani aniqlandi. Ularning 22 742 tasi (70,3%)
xorijiy tilda yozilgan, 9 617 tasi (29,7 %) imlo xato bilan yozilgan tashqi
yozuvlardir.
Olib
borilgan tushuntirish va targ‘ibot ishlari natijasida 20 063 ta yoki 62%
tashqi yozuvlarni o‘zgartirishga erishildi. Ularning 13 953 tasi (69,5%)
xorijiy tilda va 6 110 tasi (30,5 %) davlat tilida imlo xatolar bilan yozilgan.
Xorijiy tilda yozilgan 5 025 ta (25%) peshlavha, 4 899 ta (24,4%)
reklama, 4 029 ta (20,1%) boshqa eʼlon va axborot matnlari davlat tilida
yozilishi taʼminlandi. Davlat tilida imlo xato bilan yozilgan 1 998 ta
(10%) peshlavha, 1 826 ta (9,1%) reklama, 2 286 ta (11,4%) boshqa eʼlon va
axborot matnlaridagi xatolar to‘g‘rilandi.
Shuningdek,
2021 yilning 9 oyida geografik obyektlarga nom berish
va ularni qayta nomlash to‘g‘risidagi takliflarni davlat ekspertizasidan
o‘tkazish bo‘yicha Kadastr agentligining ekspert komissiyasiga 16 227 ta
nom ekspertizadan o‘tkazish uchun taqdim etildi. Shundan 13 165 ta
geografik obyekt nomlariga qonunchilik hujjatlariga muvofiqligi yuzasidan
ijobiy ekspert xulosalari berilishi taʼminlandi. 3 062 ta nom qonunchilik
hujjatlari talablariga nomuvofiq deb topilib, qayta ko‘rib chiqish uchun
hududiy komissiyalarga qaytarildi.
Viloyat,
tuman (shahar) xalq deputatlari Kengashlarining tegishli qarorlari bilan
tasdiqlangan 15 062 ta nom o‘rganib chiqildi. Qonunchilik hujjatlariga
muvofiq bo‘lgan 12 250 ta nom belgilangan tartibda Geografik obyektlar
nomlarining davlat reyestri bazasiga kiritildi.
Hozirga
qadar davlat reyestrida 120 880 ta geografik obyekt nomlari jamlangan. Ularning
2 861 tasi maʼmuriy-hududiy birliklar nomi, 110 356 tasi aholi punktlari va
ularning tarkibiy qismlari, 1 707 tasi transport va muhandislik-texnik
infratuzilma obyektlari, 5 956 tasi esa tabiiy obyektlar nomi sanaladi.
–
Aholi o‘rtasida tilni targ‘ib qilishning eng yaxshi usuli undan samarali
foydalanishni yo‘lga qo‘yish hisoblanadi, shunday emasmi?
– Fikringizga qo‘shilaman. Bu borada Maʼnaviyat va
davlat tilini rivojlantirish masalalari departamenti tashabbusi bilan qabul
qilingan bir qator meʼyoriy hujjatlar qatorida “O‘zbekiston Respublikasining
fuqaroligiga qabul qilishda davlat tilini bilish darajasini aniqlash tartibi
to‘g‘risidagi nizomni tasdiqlash haqida”gi qarorni alohida taʼkidlab
o‘tmoqchiman. Bu mamlakatimizda o‘zbek tilini targ‘ib qilish, aholi orasida
rasmiy tilning maqomini oshirish, davlat tilida ish yuritish ishlarini takomillashtirishga
xizmat qiladigan hujjatdir.
Boshqa millat vakillari uchun o‘qishga va ishga
kirishda muayyan qulayliklar yaratiladi. Tashkil etilgan malaka oshirish
markazlarida o‘qib, tegishli daraja sertifikatini qo‘lga kiritgach, har bir
tashkilotda o‘zbek tilidan o‘z bilim darajasini amalda isbotlash uchun har
safar sinovdan yoki suhbatdan o‘tishga zarurat bo‘lmaydi.
Til o‘qitishning xorijiy tajribasiga tayangan
holda o‘zbek tilini ona tili va davlat tili sifatida o‘qitishning zamonaviy
metodikasini yaratish maqsadida Vazirlar Mahkamasining “Umumtaʼlim fanlarini
bilish darajasini baholashning milliy test tizimini joriy etish to‘g‘risida”gi
qarori eʼlon qilindi. Mazkur hujjat o‘zbek
tilining davlat tili sifatida o‘qitilish mazmunini zamon talablariga moslashtirish
imkonini beradi.
Buning
afzalligi shundaki, kelgusida umumtaʼlim maktabini bitirgan o‘quvchi o‘zbek
tili bo‘yicha egallagan ko‘nikma va malakasi bo‘yicha testdan o‘tgach, tegishli
sertifikat bilan oliy taʼlim muassasasiga mazkur fan bo‘yicha imtihonsiz qabul
qilinishi ko‘zda tutilgan.
Departament
tomonidan “Davlat tili haqida”gi Qonun loyihasining yangi tahriri hamda ushbu
qonun qabul qilinishi munosabat bilan ayrim qonunchilik hujjatlariga o‘zgartish
va qo‘shimchalar kiritish haqidagi qonun loyihalari tayyorlandi. Hozirgi kunda
o‘zbek tilini yana-da rivojlantirish va til siyosatini takomillashtirishga
qaratilgan o‘nga yaqin normativ-huquqiy hujjat loyihasi ishlab
chiqilmoqda. Departament tomonidan davlat tili to‘g‘risidagi qonunchilik
hujjatlari ijrosi uzluksiz monitoring qilib boriladi.
Davlat
tilini o‘qitish va malaka oshirish bo‘yicha ham keng qamrovli amaliy ishlar
qilinmoqda. Xususan, Alisher Navoiy nomidagi Toshkent davlat o‘zbek tili va
adabiyoti universiteti huzuridagi Davlat tilida ish yuritish asoslarini
o‘qitish va malaka oshirish markazi va uning hududiy bo‘limlarida davlat
organlari
va tashkilotlaridan 5 507 nafar, aholidan – 50, o‘zga millat vakillaridan
– 93, xorijlik fuqarolardan 66 nafar tinglovchi o‘zbek tilini bilish va
davlat tilida ish yuritish bo‘yicha malaka oshirdi.
O‘zbek
tilini o‘rganishga nafaqat mamlakatimiz aholisi tomonidan, balki jahon
miqyosida ham talab ortib bormoqda. Jumladan, Toshkent davlat o‘zbek tili va
adabiyoti universiteti huzurida tashkil etilgan markazda tahsil olgan 66 nafar
xorijlik tinglovchining 30 nafari Afg‘oniston, 24 nafari Turkiya, 3
nafari Janubiy Koreya fuqarosi. Shuningdek, 2 nafardan AQSH va Rossiya, 1
nafardan Fransiya, Italiya, Janubiy Afrika, Yaponiya va Turkmaniston fuqarosi
taʼlim oldi. Bu raqamlar kun sayin o‘sib borayotgani o‘zbek tilining dunyo
miqyosidagi nufuzi sekin-asta oshib borayotganini ko‘rsatadi.
Mamlakatimiz
Prezidentining o‘zbek tilini ilmiy jihatdan rivojlantirish, uning nufuzini
oshirish, til siyosatini takomillashtirishga doir farmonida muhim vazifalar
qo‘yilgan. Ularni amalga oshirish uchun moddiy jihatdan shart-sharoit zarur
edi. Hukumatimizning “O‘zbekiston Respublikasi Vazirlar Mahkamasi huzurida
O‘zbek tilini rivojlantirish jamg‘armasining faoliyatini tashkil etish to‘g‘risida”gi
qarori bu boradagi muammolarni hal etishda muhim omil bo‘ldi. Bugun mazkur
jamg‘arma mablag‘lari o‘zbek tilini rivojlantirishga doir, ilmiy tadqiqotlar,
innovatsion loyihalar, jamiyat uchun zarur bo‘lgan turli sohalarga doir
lug‘atlar, qo‘llanmalar, darsliklarni chop etish, o‘zbek tilining mahalliy va
xalqaro targ‘ibotiga yo‘naltirilmoqda.
Departament tashabbusi bilan respublika olimlari
hamkorligida sohaviy terminologiyani rivojlantirish bo‘yicha “Xalqaro atama
elementlarning izohli-illyustrativ lug‘ati”, “Ijtimoiy-siyosiy atamalarning
izohli lug‘ati” “Yuridik terminlarning ruscha-o‘zbekcha lug‘ati”, “O‘zbek tili
meʼyorlari – Punktuatsiya” ilmiy-ommabop o‘quv qo‘llanmasi, “Bank-moliya
terminlarining izohli lug‘ati”, “O‘zbek harbiy terminologiyasi” o‘quv
qo‘llanmasi kabi kitoblar ham chop etildi.
Shuningdek, o‘zbek tilini kompyuter
texnologiyalari bilan integratsiya qilish borasida “O‘zbek tilining milliy
korpusini yaratish”, “O‘zbek tili o‘quv lug‘atlarining elektron platformasini
yaratish” kabi ilmiy-amaliy loyihalar bajarilmoqda.
O‘zbek adabiy tilining asoschisi, tilimiz va
adabiyotimiz, shuningdek, maʼnaviyatimiz rivojiga katta hissa qo‘shgan
donishmand shoir merosini chuqur o‘rganish va targ‘ib qilish maqsadida “Buyuk
shoir va mutafakkir Alisher Navoiy tavalludining 580 yilligini keng nishonlash
to‘g‘risida”gi Prezident qarori imzolandi. Qaror ijrosi doirasida O‘zbekiston
Respublikasi Fanlar akademiyasi O‘zbek tili, adabiyoti va folklori institutida
Alisher Navoiy hayoti va ijodiga bag‘ishlangan anʼanaviy respublika
konferensiyasi, Samarqand davlat universitetida Alisher Navoiyning hayoti va
faoliyatiga bag‘ishlangan Respublika ilmiy-amaliy konferensiyasi, Toshkent
davlat sharqshunoslik universitetida “Alisher Navoiy dunyo sharqshunoslari
nigohida” mavzularida xalqaro ilmiy-amaliy anjumanlar o‘tkazildi.
O‘zbek tilida ijod qilish, o‘z iqtidorini ona tili
imkoniyatlaridan foydalanib namoyish qilish, tilimiz jozibasini ko‘rsatish
bo‘yicha tanlovlar eʼlon qilib borilmoqda. Xususan, respublikamizdagi oliy
taʼlim muassasalarida tahsil olayotgan va faoliyat yuritayotgan yoshlar
o‘rtasida ilk bor “Ilhom” mukofoti tanlovi o‘tkazildi. Ushbu tanlovning
Respublika bosqichi uchun 82 ta oliy taʼlim muassasasidan 182 ta ijodiy ish
qabul qilindi. Shundan 3 ta asosiy va 6 ta
rag‘batlantiruvchi mukofot uchun g‘oliblar saralandi. Bunday tanlovlar orqali
yosh avlodda ona tiliga hurmat, badiiy adabiyotga havas, iqtidorni oshirib
borishga rag‘bat shakllanadi.
Departament
tashabbusi bilan tashkil qilinayotgan nufuzli tanlovlardan yana biri –
O‘zbekiston Respublikasi mustaqilligining 30 yilligiga bag‘ishlab,
mamlakatimizda amalga oshirilayotgan keng ko‘lamli islohotlar jarayonida davlat
tilining hayotimizdagi o‘rni va nufuzini oshirish, o‘zbek tilining
siyosiy-huquqiy, ijtimoiy-iqtisodiy, maʼnaviy-maʼrifiy jabhalarda to‘laqonli
joriy etilishi hamda faol qo‘llanishini rag‘batlantirishga qaratilgan “Qadring baland bo‘lsin, ona tilim!”
respublika tanlovidir. Unda departament tashkil etilgandan buyon respublika
miqyosida tizimli amalga oshirilgan ishlar sarhisob qilinadi. Eng yaxshi tizim,
hudud va ilmiy tadqiqotlar saralab olinadi. Shu maʼnoda “Davlat tilida ish
yuritish yo‘lga qo‘yilgan eng yaxshi tizim”, “Davlat tilida ish yuritish yo‘lga
qo‘yilgan eng yaxshi hudud” va “O‘zbek tilini rivojlantirishga doir eng yaxshi
ilmiy-amaliy loyiha”, shuningdek, xalq taʼlimi tizimi xodimlari uchun “Eng
yaxshi o‘zbek tili va adabiyoti o‘qituvchisi” kabi nominatsiyalar bo‘yicha
tanlovlar o‘tkazilmoqda.
– Til
siyosati nafaqat ichki, balki mamlakat tashqarisida, yaʼni xalqaro miqyosda ham
chora-tadbirlarni amalga oshirishni talab etadi. Bu boradagi vaziyatga ham
oydinlik kiritib o‘tsangiz...
–
Xalqaro hamkorlik yo‘nalishida Afg‘oniston Islom Respublikasining Hirot
shahridagi buyuk shoir va mutafakkir, davlat arbobi Alisher Navoiy
maqbarasidagi qurilish va taʼmirlash ishlari bo‘yicha Ishchi loyiha
tayyorlanib, afg‘onistonlik mutaxassislar bilan kelishishga erishildi. Yaqin
vaqt ichida qurilish ishlarini boshlash bo‘yicha zarur choralar qo‘rilmoqda.
Buyuk
shoir va mutafakkir, atoqli davlat va jamoat arbobi Alisher Navoiyni yurtimiz
va xorijiy mamlakatlarda keng targ‘ib qilish maqsadida Alisher Navoiy nomidagi
xalqaro jamoat fondi tashkil etildi.
Yetakchi xorijiy ijtimoiy tarmoqlar ro‘yxati
shakllantirildi hamda ularning foydalanuvchilari haqidagi maʼlumotlar
tayyorlandi. Jumladan, kompyuter tillari tarkibiga o‘zbek tilini qo‘shish
maqsadga muvofiq deb hisoblangan ijtimoiy tarmoqlar maʼmuriyatlari bilan
muzokaralar olib borildi. Natijada foydalanuvchilari
soni 500 million nafarni tashkil etuvchi “Likee” ijtimoiy tarmog‘ining
interfeysiga o‘zbek tili kiritildi.
Xorijda
istiqomat qilayotgan vatandoshlarning madaniy va til o‘zligini, ularning milliy
anʼana va qadriyatlar bilan uzviyligini saqlab qolish maqsadida yurtdoshlar.uz
sayti ishga tushirildi.
Shu
o‘rinda alohida taʼkidlash lozimki, mamlakat Prezidenti xalqaro minbarlarda
o‘zbek tilida chiqish qilib, davlat tilimiz nufuzini oshirishda shaxsiy namuna
ko‘rsatgan bo‘lsa, bugun vazirlik, korxona va tashkilotlarimiz rahabarlari ham
o‘z tizimlarida ona tilimizga katta eʼtibor qaratib, ish yuritish, targ‘ibot va
tashviqot qilish, ilmiy rivojlantirish ishlariga o‘zlarining munosib
hissalarini qo‘shib kelmoqda.
Bir
so‘z bilan aytganda, maʼrifatparvar bobomiz Abdulla Avloniyning “Har bir
millatning dunyoda borlig‘ini ko‘rsatadurgan oyinai hayoti uning tili va
adabiyotidur. Milliy tilni yo‘qotmak millatning ruhini yo‘qotmakdur” degan
purhikmat so‘zlari zamirida ayni haqiqat yotganini bugun har qachongidan ham
yaxshi anglab turibmiz.
“Yangi O‘zbekiston” muxbiri
Nodir
MAHMUDOV suhbatlashdi