- Bosh sahifa
- Yangiliklar
- O‘zbek tilida milliylik va til jozibasini saqlab qolish muammolari muhokama qilindi
O‘zbek tilida milliylik va til jozibasini saqlab qolish muammolari muhokama qilindi
Samarqand davlat
universitetida “XXI asr o‘zbek uslubshunosligining dolzarb masalalari” mavzusida
respublika ilmiy-amaliy konferensiyasi bo‘lib o‘tdi.
Anjumanda o‘zbek tili uslubshunosligida milliylik va
til jozibasini saqlab qolish, yangi yuzaga kelayotgan uslublar holatini
o‘rganish muammolari muhokama qilindi. bugungi kunda ommaviy axborot
vositalari, ijtimoiy tarmoqlar, shiddat bilan rivojlanayotgan iqtisodiyot,
turizm va boshqa sohalar uchun bu juda muhimdir.
Konferensiyaning sho‘’ba
majlislarida ushbu masalalar bo‘yicha tilshunos olimlarning ma’ruzalari tinglandi,
taqdimotlar qilindi.
– Samarqand tilshunoslik
maktabida uslubshunoslik bo‘yicha o‘z davrida salmoqli tadqiqotlar amalga
oshirilgan, – deydi o‘zbek tilshunosligi kafedrasi professori Suyun Karimov. –
Ayni paytda, soha oldida hal qilish lozim bo‘lgan muammolar ko‘p. Anjumanda hozirgi
zamon talabiga ko‘ra, internet uslubshunosligi bo‘yicha alohida muhokama
maydoni tashkil etdik. Ushbu jarayonda nafaqat tilshunos olimlar, balki magistr
va bakalavr talabalar ham ishtirok etishi ahamiyatlidir. Chunki fanning bugungi
va kelajakda rivojlanishida ularning muhim o‘rni bor.
– Mazkur tadbirdan o‘zim uchun juda ko‘p ma’lumot oldim, – deydi
filologiya fakulteti 1-bosqich talabasi Mashhura Kamolova. – Xususan,
filologiya fanlari doktori, professor Nizomiddin Mahmudovning uslubshunoslik
muammolari haqidagi fikrlari menda qiziqish uyg‘otdi. Endi bu yo‘nalishni
batafsil o‘rganish niyatidaman. Har qanday kasb egasi tilimiz uslubi, uning
nozik jilvalari va jozibasidan unumli foydalanishi zarur. Bu yuzasidan ham
konferensiyada fikr va mulohazalar almashildi.
Samarqand davlat
universiteti
Axborot xizmati