- Bosh sahifa
- Yangiliklar
- YANGI NASHRLAR RUKNI: ilk bor “Areal lingvistika” darsligi nashr qilindi
YANGI NASHRLAR RUKNI: ilk bor “Areal lingvistika” darsligi nashr qilindi
Samixon Ashirboyevning “Areal lingvistika” darsligi
sharhi
Oʻzbek tilshunosligida areal
lingvistika nisbatan yosh fan hisoblanadi. Bu fan qiyosiy-tarixiy tilshunoslik negizida
shakllangan bo‘lsa-da, u keyinchalik dialektologiya bilan birga rivojlandi va uning
natijalariga asoslandi. Endilikda u mustaqil fan darajasiga ko‘tarildi. Areal lingvistika
oliy ta’limning “Lingvistika (oʻzbek tili)”, “Folklorshunoslik va dialektologiya”
magistratura mutaxassisliklari o‘quv rejalarida majburiy fanlar blokidan joy oldi
va uning ta’limi bo‘yicha tajribalar to‘plandi. Bu darslikda areal lingvistika fani
o‘rganadigan muammolar, uning boshqa lingvistik fanlar ichida tutgan o‘rni, dialektologiya
va arealogiyaga munosabati yoritilgan. Areal lingvistikaning paydo bo‘lishidagi
ikki davr - tayyorgarlik va yangi davr haqidagi qarashlarga tahlil berilgan, ayniqsa,
bu fanning o‘rganish metodlari masalasi atroflicha bayon qilingan. Areal lingvistika
darsligida ilk bor uning mazmuni shakllantirildi: lingvistik areal, areallarning turlari va tiplari,
izoglossa masalasi, takson, uning intensional va ekstensional turlari toʻgʻrisidagi
tavsiflar turli manbalar materiallarini tahlil qilish asosida berilgan. Darslikdan,
shuningdek, innovatsiya, lingvistik kontaktologiya, tillar va dialektlarni zonalarga
ajratish, lingvistik karta va atlaslar, kontinuum, til va dialektlar sistematikasi,
klaster tushunchalari o‘zining keng ifodasini topgan. Ayniqsa, Mahmud Koshg‘ariyning
areal lingvistik qarashlariga yuksak baho berilganki, bu fikr jahon areal lingvistikasida
tan olinishi zarur bo‘ladi. Areal lingvistikaning ushbu sanab o‘tilgan masalalari
turkiy
tillar va oʻzbek tili hamda uning shevalariga tatbiqan yoritilgan. Eng muhimi,
areal lingvistika va lingvistik geografiya munosabatiga aniqlik kiritilgan, ya’ni
ular, adabiyotlarda ko‘rsatilganidek, ayni bir
tushunchalar bo‘lmay, balki lingvistik geografiya areal lingvistikaning til
va shevalarni kartalashtirish ishi bilan shugʻullanadigan bir bo‘limi hamda bir
metodi ekanligi oʻzining zaruriy ifodasini topgan. Darslikda bu sohaga oid glossariy
ham berilgan bo‘lib, ular shu fan bilan qiziquvchilarga areal lingvistika
bilimlarini mustahkamlashga yordam beradi. Darslikdan magistrantlar bilan birga, ilmiy xodimlar ham foydalana
oladilar.