- Bosh sahifa
- Yangiliklar
- ASAKA
ASAKA
Andijon viloyati tarkibidagi tuman nomi. Mutaxassislar Asaka nomining kelib
chiqishini turlicha talqin qilishgan. Ayrim tadqiqotchilar Asaka nomining paydo
bo‘lishini Markaziy Osiyoda miloddan avvalgi VI–V asrlarda yashagan sak qabilalari nomi bilan bog‘lashadi.
Chunki bu qabila ba’zi tarixiy manbalarda “assakenlar” nomi bilan ham tilga
olingan.
Ularda “asvaka” – ot, “assaka” – otliqlar ma’nosini bildirgan. Qadimshunoslar vodiyning sharqiy qismida topilgan toshlardagi otlar tasviri bilan o‘z fikrlarini asoslashga harakat qilishgan va shu hududda qadimda nasldor otlar boqilgan, degan xulosaga kelganlar. Rus tarixchisi B.A.Litvinskiy Asaka tarixini Farg‘onada miloddan avvalgi VI–V asrlarda yashagan sak qabilalar bilan bog‘laydi.
Taniqli olim qadimgi yunon va hind manbalariga asoslanib, o‘tmishda
Pomirda yashovchi sak qabilalarining yurti Assakana, xalqi esa assake(n)lar deb
atalganligi, A. Makedonskiy O‘rta Osiyodan keyin, ana shu yo‘l orqali
Hindistonga o‘tganligini ta’kidlaydi. Arxeolog olim B.X.Matboboyev esa
Asaka tarixini Dayyuan (qadimgi Farg‘ona) davlati tarixi bilan bog‘liq deb
hisoblaydi. Uning talqinicha, Asaka so‘zi jonli hind tilida “asvaka” – ot,
“assaga, assaka” – otliqlar, chavandozlar degani, ya’ni assaka – otliqlar yurti
deb e’tirof etadi. Shu xulosaga asoslanib, 1997-yili Asaka shahriga
kiraverishdagi maydonda tulpor otning ramziy haykali qo‘yilgan. Taniqli
nomshunos olim S.Qorayevning yozishicha, ba’zi nasabnomalarda o‘zbek urug‘lari
orasida asaka va qirg‘izlarning sayaq qabilasi tarkibida asake urug‘i qayd qilingan. Oltinko‘l tumanidagi
Asakalik qishlog‘i va Ustyurt platosining janubidagi Asakaovdon botig‘ining
nomi ham shu etnik guruh nomi bilan bog‘liq bo‘lishi mumkin. Ammo bir qator
olimlar borki, ular Asaka nomi va uning tarixini ilk o‘rta asrlar bilan
bog‘laydi. Masalan, professor A.Teshaboyev Asaka so‘zini o‘zgacha talqin
qilgan. Olim qadimgi turkiy tilda “ass” – burgut, lochin degan ma’nolarni
anglatgan va o‘tmishda turk urug‘lari ichida “ass” – burgut (totemi) urug‘i ham
bo‘lganligi to‘g‘risida ayrim tarixiy manbalarda ma’lumotlar bor deydi. Shu
o‘rinda B.Ahmedovning Asaka nomini “ass” urug‘i bilan bog‘liq degan xulosasini
ham aytish mumkin. Olimning fikricha, hozirgi Asaka va uning atrofidagi adir va
vodiylarda ilk o‘rta asrlarda “ass” etnik guruhi vakillari yashaganlar. Bu
mulohazani tarixchi A.Muhammadjonov ham tasdiqlaydi va uning fikricha, Asaka
aslida Assikal shaklida talaffuz etilib, ass – turkiy urug‘, kal – suv yoki soy
demakdir.