- Bosh sahifa
- Maslahatchi minbari
- AMIR TEMURNING MAʼNAVIY JASORATI
AMIR TEMURNING MAʼNAVIY JASORATI
Sohibqiron Amir Temur tavalludining 686-yilligiga bagʻishlanadi
9-aprel sohibqiron Amir Temur
tugʻilgan kun. 1336-yil (bundan 686-yil oldin) 9-aprelda Shahrisabzning
Xoʻja Ilgʻor qishlogʻida buyuk sarkarda, ilm-fan va madaniyat homiysi Amir
Temur dunyoga kelgan. Temurning yoshligi va yigitlik yillari mamlakat ogʻir ijtimoiy-siyosiy
ogʻir holatga tushib qolgan davrda kechgan. Sohibkiron siymosiga boʻlgan
cheksiz hurmat, ezgu ishlari, ibratli hayoti yoshlarimiz uchun doimo oʻrnak
boʻlib qolaveradi. Amir Temur va temuriylar sulolasi davrida maʼnaviyat va
maʼrifat boshqa sohalardan kam rivojlanmagan. Amir Temur — buyuk shaxs, yirik
davlat arbobi, sarkarda, qonunshunos isteʼdodli meʼmor shu bilan birga el
yurtini, xalqini sevgan, umr boʻyi bunyodkorlik bilan shugʻullangan inson.
Uning "Qay bir joydan bir gʻisht olsam, oʻrniga oʻn gʻisht qoʻydirdim, bir
daraxt kestirsam oʻrniga oʻnta daraxt ektirdim" degan soʻzlari
bunyodkorlik, yaratuvchanlik faoliyatining tasdigʻi hamda maʼnaviy jasorati
hisoblanadi.
Amir Temur zamonida yozilgan
asarlarni oʻrgansak, uning koʻp yaxshi xislatlari: toʻgʻrilik, maʼnaviyatlilik,
muruvvatlilik, el-yurtga mehr-muhabbat va boshqalarni kuzatish mumkin. Amir
Temurning “Temur tuzuklari”, Sharofiddin Ali Yazdining “Zafarnoma”si, Ibn
Arabshohning “Temur haqidagi xabarlarda taqdir ajoyibotlari” kabi asarlarda
keltirilgan sohibqironning ibratli ishlari, pand-nasihatlari va oʻgitlarida
maʼnaviy jasorati kuzatiladi. Bular
el-yurt va fuqarolarning tashvishi, raiyatparvarlik, mehr-muruvvat,
qoʻshnichilik odobi, mardlik va qahramonlik haqidagi oʻgitlaridir.
Amir Temur bobomizning tarix oldidagi
xizmati behisob katta. Oʻz davrida u feodal tarqoqlikka barham berib, el-yurtni
oʻz tugʻi ostiga birlashtirgan va markazlashgan yirik davlatni yaratgan. Bu
bilan hunarmandchilik, madaniyat va savdo-sotiq rivojiga mustahkam zamin
yaratib bergan. Hozirgi davrda “Temuriylar davlati”, “Temuriylar madaniyati”
haqida gapirilganda bu gaplarning zaminida albatta bobomizning ulkan xizmatlari
borligini doimo yodga olish maqsadga muvofiq.
Amir Temur saʼy-harakatlari bilan
ulkan isteʼdod, yuksak did bilan qurilgan madrasa-yu, masjidlar, saroylar-u,
bozorlar, xanoqohlar va boshqa inshootlarning son-sanogʻi yoʻq. Ahmad Yassaviy,
Zangi Ota maqbaralari, Bibixonim jome masjidi, Goʻri Amir, Oqsaroy va Shohi
Zinda meʼmoriy moʻjizalari singari saroy-bogʻlarning bugungi kunda savlat
toʻkib maʼnaviyat maskanlari sifatida ziyoratgohlar vazifasini bajarishi Amir
Temur maʼnaviy jasoratining bugungi avlodga qoldilran merosi hisoblanadi.
Bejizga, “Agar bizning qudratimizni bilmoqchi boʻlsangiz, qurgan binolarimizga
boqing” demagan, sohibqiron bobomiz. Tarixchi Sharofiddin Ali Yazdi Amir Temur
“Obodonlikka yaraydigan biror qarich yerning ham zoye boʻlishini ravo
koʻrmasdi”, deb yozadi. Bugun esa yurtimizda olib borilayotgan Yashil makon
umumilliy loyihasida obodonlashtirish, koʻkalamzorlashtirish ishlarida
sohibqiron oʻgitlari shior vazifasini bajarmoqda.
Amir Temur jahon tarixida chuqur iz
qoldirgan shaxs. Ammo maʼlum davr tarix kitoblarida Temur bobomizni zolim,
qonxoʻrga chiqarib, teskari tushuntirishlar berildi. Aslida Sohibqiron
kamdan-kam buyuk shaxslar hayotida uchrovchi maʼnaviy-axloqiy, vatanparvar
xislatlariga ega inson boʻlgan. Bular ko‘plab manbalarda, xalq yaratgan
rivoyat, hikoyalarda talqin qilingan. Masalan, Temur navkarlari bilan bir
qishloqda vaqtincha qoʻnim topgan boʻladi. Bir kuni ertalab sigir yetaklab
kelayotgan ayolga koʻzi tushib ajablanadi. Erini chaqirib sababini
surishtirganda, uyida navkarlar borligini, ularning oldiga xotinini tashlab
keta olmasligini aytadi. Gap nimadaligini tushungan Sohibqiron shundan
keyin odamlarning uyiga joylashmaydigan, ochiq joylarda oʻtov tikib yashaydigan
boʻladi. Uning yoʻriqlarida aholining molini, qoʻy-echkisini oʻgʻirlagan
navkarlarga oʻlim jazosi berilishi yozib qoʻyiladi.
Amir Temur haqidagi “Ulugʻ saltanat”
romani muallifi, Oʻzbekiston xalq yozuvchisi Muhammad Ali Sohibqironning
maʼnaviy olami nihoyatda rang-barang boʻlgan va ularda ruhiy poklik, halollik,
qattiqqoʻllik, kechirimlilik, bagʻrikenglik, fidoyilik, mehribonlik fazilatlari
yuqori boʻlgan, deb taʼkidlaydi. Temur maʼnaviyatini anglatuvchi bosh mezon
“Kuch-adolatdadir” degan shiordir. Amir Temurning maʼnaviy-maʼrifiy qarashlari
va oʻgitlari “Temur tuzuklari”da yaqqol bayon etilgan. “Temur tuzuklari” —
podsholarning turish-turmush va axloq-odob normalarini belgilovchi risoladir.
Bu bebaho tarixiy asarda, hokimlar va vazirlarning
vazifalari, masʼuliyati, aholi haq-huquqlarini himoya qilish, sipohlarga
munosabat kabi hayotiy maʼnaviy-axloqiy qoidalar oʻz ifodasini topgan. Jumladan,
oʻgitlardan “Yuz ming otliq askar qila olmagan ishni bir toʻgʻri tadbir bilan
amalga oshirish mumkin”, degan fikrlari barchamiz uchun katta ibrat maktabidir.
Amir Temurning “Millatning dardlariga
darmon boʻlmoq vazifangizdir. Zaiflarni koʻring, yoʻqsillarni boylar zulmiga
tashlamang. Adolat va ozodlik dasturingiz, rahbaringiz boʻlsin” degan oʻgitlari
farzandlarimizni el-yurt, Vatan haqida qaygʻurishga chorlovchi maʼnaviy shior
desak mubolagʻa boʻlmaydi.
Shuningdek, tuzuklarda “Menga
yomonlik qilib, boshim uzra shamshir koʻtarib, ishimga koʻp ziyon
yetkazganlarni ham, iltijo bilan tavba-tazarru qilib kelgach, hurmatlab
yomon qilmishlarini xotiramdan oʻchirdim, martabalarini oshirdim. Ular
bilan muomalada shunday yoʻl tutdimki, agar xotiralarida menga nisbatan shubha-yu-qoʻrquv
boʻlsa, unut boʻlardi”. “Menga hasad qilib, oʻldirishga qasd qilgan
kishilarga shunchalik sovgʻa-inʼomlar berib, muruvvat-u ehson koʻrsatdimki, bu
yaxshiliklarni koʻrib, xijolat teriga gʻarq boʻldilar. Hamisha mening
roziligimni olib ish tutgan doʻstlarim oldimga panoh tilab kelganlarida, ularni
oʻzimning taxt-u davlatimga sherik qilib, hech qachon ulardan mol-mulk va
tirikchilik ashyolarini ayamadim”. “Hech kimdan oʻch olish payida
boʻlmadim. Tuzumni totib, menga yomonlik qilganlarni parvardigori olamga
topshirdim”, deb yozilgan. Yuqoridagi tusuklarda yana bir bor sohibqiron
bobomizning maʼnaviy jasoratini koʻrishimiz mumkin.
Temur tuzuklarida yana “Adlu ehson
bilan jahon gulshani obod boʻladi” deb yozilgan. Bunga Sohibqiron butun
umri davomida amal qilib, kambagʻal bechoralar, musofir,
gadolarning boshini silaydi, dehqonchilik qilishga, chorva tutishga,
imorat tuzatishga mablagʻi yoʻq fuqarolarga yordam berishni
tayinlaydi. Yana bir sahifalarida “Raiyat ahvolidan ogoh boʻldim,
ulugʻlarini ogʻa qatorida, kichiklarini farzand oʻrnida koʻrdim», deb yozishida
ulkan maʼno mujassamdir. Yoki Mamlakat ishlari tuzugida, Saltanatim martabasi
boʻlmish toʻra-tuzuklar va qonun-qoidalarni ham shu oʻn ikki toifaga bogʻlab
tuzdim. ...Birinchi toifa–sayyidlar, ulamo, shayxlar va fozillarni oʻzimga
yaqinlashtirdim. ...Diniy, huquqiy masalalarni oʻrtaga tashlab, qimmatli
fikrlar bildirishardi. Halol va haromga oid masalalarni men ulardan oʻrgandim”,
deb yozadi. Yuqoridagi misollardan koʻrinib turibdiki, sohibqiron boshqaruvda
maʼnaviyat, tarbiyaga eʼtibor berish, ulamolar, shayxlar, fozillar
maslahatlarini eshitish kabi xislatlari bayon etilgan.
Xulosa qilib aytish mumkinki, buyuk
ajdodlarimiz xususan maʼrifat homiysi, yuksak maʼnaviyat egasi Amir Temur
merosi bugungi kunda xalqimiz uchun ruhiy-maʼnaviy poklanish va milliy oʻzlikni
anglash uchun bitmas-tuganmas boylik hisoblandi. Nafaqat Oʻzbekistondagi
balki Oʻrta Osiyodagi tarixiy obidalar, goʻzal maskanlarning koʻpchiligi Amir
Temur davrida vujudga kelgan. Temuriylar davri har sohada chinakam
uygʻonish davri boʻldi, Amir Temurning maʼnaviy jasorati, Amir Temur hazratlari
amal qilgan hayotiy mezonlar bugungi shiddat bilan oʻzgarayotgan Yangi
Oʻzbekiston taraqqiyotida, kundalik ishlarimizda, davlatimiz salohiyatini
oshirish, xalq farovonligini yuksaltirish sari bosayotgan qadamlarimizda har
doimgidan-da yuqoriroq darajada namoyon boʻlib boraveradi.
Abdurahim Nasirov,
Taʼlim sifatini nazorat qilish davlat inspeksiyasi
boshligʻi maslahatchisi, filologiya fanlari doktori,
dotsent.